Taun Baru China

Setipak enggau menua Malaysia ke diuan pupu raban bansa, kenang pengarang sekali tu mega enggai tinggal ngenang pengerami ke deka diintu raban bansa China kena 3hb Februari tu iya nya pengerami Taun Baru China. Taun tu raban bansa China ngintu Taun Tikus Belanda iya nya taun jelu dalam pengarap China.

Kebuah Ngintu Taun Baru

Bansa China endang jeman ari peturun aki ini sida enda kala enda ngintu taun baru. Tu bisi kaul enggau cherita ke bisi nyadi dulu kelia. Agi dulu kelia bansa China diau betumpuk ba tebing sungai siti. Pengidup sida dia lantang bendar laban utai nyamai endur ngulih lalu pia mega bumai sida pan deka mih bulih padi. Tang pengelantang ke baka nya enda lama diasaika sida laban sekali lebuh malam hari sida dikachau utai ke enda temu penatai enggau gamal. Sida semina nyangkaka utai nya bansa jelu. Utai nya datai ngerusak sereta munuh sekeda mensia ke diau dia.

Nyadi penusah ke baka nya ukai nyadi sekali aja. Udah ketiga kali sida ensepi penusah laban jelu nya, dia sida ke diau dia nanyaka runding ngagai orang tuai siku ke bepenemu. Orang tuai nya lalu nerang ngagai mensia mayuh iya nya jelu nya enda datai belama tang iya semina datai ngachau maya lemai hari iya ke 365 kali. Orang tuai nya mega madah ngagai sida, jelu nya takutka utai tiga bengkah; iya nya utai inggar, utai tampak enggau utai bechura mirah.

Nya alai maya lemai ke 365 kali, dia orang be menua nya nyikap diri enggau senyata laban sida nganti penatai jelu nya. Pia mega, semua rumah dipasang api magang,, semua utai ke bisi dipeda dichat mirah magang lalu mensia mayuh ngenjing richah sebelah nya dia. Lebuh maya jelu nya patut datai, mensia mayuh endang nganti tang jelu nya enda datai. Semua sida ke diau ba endur nya dia gaga magang laban nadai utai dikenangika ngachau agi.

Lalu bepun ari nya, semua sida ke dia besetuju magang ngerami lemai nya genap taun dikena ngingatka diri udah lepas ari penusah. Lalu nya mega ngepunka bansa China ari jeman dulu kelia nyentukka sehari tu ngintu lemai nya genap-genap taun lalu nya ke dikumbai ngintu Taun Baru China.

Mantar Taun Baru

Kira dua minggu sebedau mantar taun baru semua bansa China endang nyendiaka diri deka ngintu hari nya. Rumah dilagu enggau naka pemanah, ngepan bebeli baru; duit lama ditukar enggau duit baru ngambika diberika ang pau; utang enti bisi mesti dibayar sebedau taun baru. Lalu pia mega lebuh malam semua rumah endang terang laban api.

Lemai taun baru nya tauka mantar taun baru nya mega maya begempuru makai begulai enggau diri sebilik. Barang diri sebilik ke jauh endang nguji enggau naka ulih mulaika diri ke rumah. Udah makai lemai baka nya, pengerami pan belabuh. Tuai enggau biak sama bela ngenyenangka ati diri.

Penti Pemali Maya Taun Baru

Lebuh taun baru, semua bansa China endan naka ulih nguji enda nyebut leka jaku ke jai. Semua sida endang ngena ngepan ke baru; geladak rumah enda tau disapu lalu semua utai tajam baka lungga enggau guntin endang dilalai ba endur ke teguh.

Maya taun baru, sid arapka hari keterubah iya nya hari pengada manuk; hari kedua pengada ukui, hari ketiga pengada babi; hari keempat pengada bedus, hari kelima pengada chapi; hari keenam pengada kuda; hari ketujuh hari mensia enggau hari kedelapan nya hari utai ke beigi-igi baka jagung enggau padi. Nya alai maya taun baru, semua bansa jelu ke disebut nya tadi endan enda tau dibunuh maya hari pengada sida.

Nya mih kebuah bansa China endang nyediaka mayuh macham utai pakai sebedau hari taun baru. Nambahka nya sida arapka enti bisi laluh pemakai taun baru, nya baka sampi deka bulih pengeraja. Lalu pia mega ba maya hari ketujuh, iya nya hari pengada mensia, nya alai sida endang makai sayur enggau ikan ke agi mata. Kebuah pia laban nya pengarap sida. Sayur enggau ikan mata nya ngajihka sida gayu guru, gerai nyamai nguan menua.