Tisih Belalauka Sekula

SISTEM Tisih Belalauka Sekula tauka Pentaksiran Berasaskan Sekolah (PBS) berengkah dipejalaika dalam taun 2011. Iya dianggap program ti tegap ke udah diaturka Opis menteri Pelajar dikena nambah pemanah pengulih nembiak dalam peresa kelebih agi baka Ujian Pencapaian Sekolah Rendah (UPSR) enggau Penilaian Menengah Rendah (PMR). Besenutuk enggau nya mega, sistem PBS meri perati ngagai tisih dikena belajar sereta tisih senentang pelajar. Tu nyadika rapat langkah ti meri fokus berat dikena nentuka nembiak nguasa enggau sistematik tiap-tiap tikas ngajar enggau belajar (P & P).

Pemujur PBS tu ila deka diperati nengah pemutus peresa UPSR dalam taun 2016 lalu PMR nya dalam taun 2014.

PBS tu tisih ke betukuh holistik ti nyengkaum nilai intelek, emosyen, rohani sereta jasmani bepelasarka Falsafah Pendidikan Kebangsaan enggau Kurikulum Standard Sekolah Rendah (KSSR). PBS tu mungkur tisih dalam bidang akademik enggau ukai akademik. Kedua-dua bidang tu ngangkat sereta meri autonomi ngagai raban pengajar dikena sida bejalaika tisih formatif (tisih maya proses ngajar enggau belajar) enggau sumatif (tisih ba ujung unit pelajar) ba tikas sekula.

PBS ngundan empat komponen ke nyengkaum Tisih Tikas Sekula (Pentaksiran Sekolah); Pusat; Aktiviti Jasmani enggau Sukan sereta Tisih Psikometrik iya nya tisih meratika ulah enggau personaliti nembiak. Tiap-tiap komponen tu ngundan tukuh kediri empu dikena nisih nembiak.

Ambika banding Tisih Tikas Sekula nya pugu elemen dalam proses ngajar enggau belajar (P & P) laban iya diperatika ulih negapka pelajar nembiak kelimpah ari ngangkatka tikas ngajar raban pengajar. Iya mega ulih meri info tauka penerang ti ulih diakun betul dalam nama-nama pekara ke bekaul enggau pengulih sereta pejalai tiap-tiap proses P & P. Tisih Tikas Sekula beguna bendar dikena nentuka pengajar enggau pemesai sekula nya bebendar ulih ngasilka modal mensia ti harmoni sereta setimbang.

Iya disempamaka baka proses ke majak dipejalaika dikena nagihka komitmen tinggi sereta kuing-tuju ke terang ari raban pengajar tauka pemesai sekula ngambika sida ulih terus ngemansangka potensi tiap-tiap nembiak ngagai tikas maksimum.

Dikena ngemanahka pengawa nisih tikas sekula ke udah bisi dikena kemaya hari tu siti Tisih Bepelasarka Standard (Pentaksiran Rujukan Standard) bisi diperambu ngambika ulih meratika pemansang enggau penumbuh (growth) pelajar sereta prestasi siku-siku nembiak. Tisih nya dikumbai Standard Prestasi, iya nya proses ngulihka penerang senentang tikas pengulih nembiak belalauka standard prestasi ti udah ditetapka nitihka tikas pengulih ke udah dirintaika dalam dokumen kurikulum.

Tisih Bepelasarka Standard tu ukai manding pengulih siku-siku nembiak enggau nembiak bukai tang ngeripotka prestasi siku-siku nembiak nya  dalam pelajar iya nengah chara ti nerangka pemansang enggau penumbuh (growth) iya belalauka penerang standard.

Standard Prestasi tu endang dikearapka nyadi siti penerang dikena nerangka pengulih nembiak dalam sesebengkah bidang ba siti-siti timpuh pelajar iya belalauka penanda tikas (bench mark) ti udah dilanggur. Kelimpah ari nya, Standard Prestasi tu mega ulih nyadika penyanding penemu  ngagai semua orang ke bisi kaul dalam bidang pelajar baik iya nengah chara terus tauka enda dikena mandangka enggau terang tuju ke deka dijapai dalam sistem pelajar menua.

Dikena ngelancharka pejalai PBS tu, raban pengajar enda tau enda ngambu Dokumen Standard Kurikulum (ti ngundan pekara ti patut dipejalar lalu dikenataika dalam proses P & P) enggau Dokumen Standard Prestasi nya nyadika batang penyanding penemu sida. 

Besenutuk enggau nya mega, pekara bukai baka pengawa dikena nyaminka kualiti patut diperatika ba semua aspek enggau renggat pengawa ke nisihka nembiak. Nya alai, tiap-tiap individu ke bisi diserangkung dalam sistem tisih tu ngembuan tanggung pengawa nyamin kualiti enggau tikas standard tisih ti dipejalaika. 

Tisih ti bekualiti ngasilka info tauka penerang ti nemban sereta mandangka utai ke amat nyadi senentang tikas pelajar nembiak. Penerang ti nemban nya taja pan relatif ulih mantu nyaup sida ke ngaga polisi ngatur ubah pemansang dikena ngangkatka proses ngajar enggau belajar. Taja pia, nama-nama indikator ti dikena dalam nyaminka kualiti dalam tisih patut mega mungkur beberapa aspek ke nyengkaum kesahan, kebolehpercayaan, kebolehtadbiran enggau keadilan.

Dalam konteks tu, pengawa nyamin kualiti pemujur PBS tu ulih dijapai nengah proses pementoran, penyelarasan, pemantauan enggau pengesanan.

Nya alai, proses ngemanahka sistem ti udah dipejalaika KPM nengah PBS tu mandangka enggau terang sistem peresa tikas pusat baka UPSR enggau PMR ke dipejalaika kemaya hari tu ukai agi siti chara peresa dikena nyukat pengulih nembiak dalam bidang pelajar aja. Kelimpah ari nya, PBS mega dikearapka ulih ngasilka nembiak ke lati laban tisih nya dipejalai ari renggat ke tumu sereta ukai semina nisih bidang akademik tang mega mungkur seregah diri, sukan enggau kokurikulum.