Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Jumaat, 13 Januari 2012

Tulis Jawi Majak Kurang Dikena



Tulis Jawi nya siti seni tulis ti udah berabad-abad lama iya dikena ba Nusantara. Penatai tulis Jawi tu bisi kait terus enggau penatai pengarap Islam ke Nusantara. Tulis Jawi datai ari tulis Arab lalu urup ti dikena nya urup  Arab ke dipasuk ke dalam sistem tulis jaku Melayu. Tulis Jawi nya tulis rasmi ti dikena ba menua Brunei sereta dikena mega di Malaysia, Filipina enggau Indonesia.

Tulis ti keterubah diguna di Nusantara nya tulis Pallava Grantha ti asal datai ari India selatan. Tulis tu mansang dikena kenyau jeman Perintah Islam Pasai lalu udah nya dikerembai ke Perintah Melaka, Perintah Johor enggau mega  Aceh ba abad ke-17. Tanda ti mandangka tulis tu bisi di Malaysia nya lebuh orang sejarah tetemuka tulis nya ba Batu Bersurat Terengganu ti ditulis kena 702 Hijrah tauka 1303 Masehi. Tulis  rumi ti pengabis iya ditemu nya maya pengujung kurun ke-19. 

Tu nunjukka tulis Jawi udah datai ke menua tu dulu ari tulis rumi. Tulis Jawi nya  tulis rasmi ba Negeri-negeri Melayu Tidak Bersekutu maya sekeda menua Malaya dipegai British. Kemaya hari tu tulis Jawi semina diguna dalam pengawa ti bekaul enggau pengarap Islam sereta adat istiadat Melayu kelebih agi di Johor, Kedah, Kelantan, Perlis, enggau Terengganu.

Dulu kelia, tulis Jawi beguna amat dalam pengawa rasmi. Iya diguna nyadika  perantara dalam semua pengawa perintah, adat istiadat enggau pengawa dagang. Ambika banding, sempekat entara Raja Melayu enggau raban bekuasa Portugis, Belanda enggau English. Kelimpah ari nya, dokumen Merdeka 1957 bagi menua Malaysia mega ditulis dalam urup Jawi.

Pechaya tauka enda orang Islam Malaysia nyau majak ngenyauhka diri ari tulis Jawi. Mayuh nembiak rebak baru bansa Melayu kemaya hari tu ti nerima pelajar ba sekula Melayu enggau English ukai semina enda nemu nulis Jawi tang mega enda nemu macha teks tauka ayat Jawi. Ukai semina raban sida nya aja tang mega nyengkaum raban orang ke tuai mega bisi ke enda nemu macham kereban bacha ti ditulis dalam Jawi enggau manah.

Krisis tulis Jawi udah suah dipejuraika baik iya ba surat berita, panggau kuliah pengarap di masjid, ba sekula tauka universiti tang semina mimit aja orang ke pedulika pekara tu. Tulis Jawi majak dilak, ditempaya pia aja dalam timpuh bepuluh taun ti udah baka surau ke lama udah ditinggalka orang.

Nitihka pengelicha ba Fakulti Bahasa dan Komunikasi madahka pansik ti dipejalaika ba IPTA mandangka sida universiti endang enda tentu meri perati ngagai tulis Jawi. Pansik tu dipejalaika ba sekeda IPTA nyengkaum Universiti Kebangsaan Malaysia (UKM), Universiti Malaya (UM), Universiti Putra Malaysia (UPM), Universiti Sains Malaysia (USM) enggau Universiti Pendidikan Sultan Idris (UPSI). Pansik nya madahka tulis Jawi semina diajar nengah subjek Bahasa Melayu. Pansik nya mega madahka universiti nadai ngadaka subjek kediri dikena ngajar, bejurai sereta mansik tulis Jawi. 

Khir Johari nya siku menteri pelajar ke bisi ngatur siti reformasyen  dalam sistem pelajar menua. Lebuh iya nyadi menteri pelajar iya mih ke ngasuh orang ngetu ngena tulis Jawi ke dikena nyadika pun tulis enggau  tulis ti ngena jaku Melayu. Berengkah ari nya mega, semua pelajar ke ngena jaku Melayu  diasuh bekalih  ngagai tulis rumi. Rebak ke belajar udah iya ke nyadi menteri di Opis Menteri Pelajar mega enda tentu landik dalam tulis Jawi. Berebak enggau nya mega surat berita orang Melayu ti maya nya, Utusan Melayu nyau majak baka api ke kelap-kelap sereta enda tebilang. Nya alai taun 2005, Utusan Melayu lalu tekubur. Perintah maya nya dipejal ngidupka iya baru udah ti disponsorka sekeda raban.

Kebuah bukai iya nya ketegal sida ke ngambi pelajar pengarap Islam ba institut pelajar tinggin endang ngena tulis Arab lebuh sida belajar. Nya alai nadai tentu beguna mega tulis Jawi ba sida laban tulis Arab nya ke udah ngambi alih pengawa nya. Kelimpah ari nya mega semua bup penyanding penemu sida mega ditulis dalam jaku Arab.

Nya alai ngetanka tulis Jawi kemaya hari tu ukai pekara ti mudah dikereja laban semua nembiak ke belajar di sekula, institut pelajar tinggi diatu ngena tulis rumi dalam pelajar sida. Semua bup mega ditulis dalam rumi. Agi mega perintah nadai tauka bedau ngansak nembiak pelajar nulis ngena tulis Jawi tu. Belajarka tulis nya nyangka tau ngasuh bala nembiak bebuaika jam laban ba sida nadai tentu meri asil kelimpah ari asil sentimental ba sekeda orang laban iya ke simbol bansa. Realiti pengidup kemaya hari tu tau bendar nyekat sereta ngemunaska tulis Jawi jemah ila, indah tulis jaku Melayu standard kemaya hari tu udah balat bendar bebalut enggau jaku English enggau jaku ke dikena ba telefon binching, iya jaku sms. Nya alai manah agi ngenegapka agi tulis sereta jaku ke endang udah bisi ba jari ari ke nyau lenyau nadai temu amut, ku jaku deka nyaga dua-dua tang nadai kitai nyangka tau mega lenyau dua-dua.

2 ulasan:

  1. Diatu nemu aku kebuah iya. Terima kasih ke artikel tu.

    BalasPadam
  2. E-Book 40 Persoalan Penulisan Arab dan Jawi di Microsoft Word

    Didalam E-Book ini, saya akan dedahkan kaedah pemasangan tulisan arab tanpa menggunakan cd Windows Xp, disinilah kesukaran yang acap kali dihadapi oleh pengguna Windows Xp untuk memasang tulisan Arab di Windows mereka.

    http://rijalsoft.blogspot.com/2012/05/e-book-40-persoalan-penulisan-arab-dan.html

    BalasPadam