Empas bejaku enda betapis

Enti kitai beratika orang tuai Melayu agi biak kelia, dia kitai tepedaka sida  bisi baum mit sereta enda  formal ninting hari ti dikumbai sida randau kedai kopi. Pekara ti baka tu nadai dalam budaya Iban, nyangka laban nadai kedai kupi tauka bala Iban kiruh ke umai enggau ke kebun. Nyadi pulai ngagai cherita tu tadi, seraban orang kampung ukai orang utan anang saru,  iya orang Melayu tu tadi mih, suah agi ke kala gawa ba opis perintah tang udah pinchin, tauka pekereja di ladang tauka umai paya (sawah) ke udah tembu pengawa, berandau kusung nadai bebatang randau di kedai kupi.

Pekara ti dikerandau nya bisi kaul enggau penanggul bala Pak Menteri. Penyanding penemu ti dikena sida berandau nya datai ari surat berita ti bisi di kedai kupi alai sida berandau. Berita-berita sensasyenal ti bisi ayan ba surat berita enda  kira nya berita skim bantu baja padi ngagai orang bumai, isu nembiak muntat, perang di Vietnam tauka cherita album baru penyanyi pop yeh-yeh, Jefridin nyadika topik jurai bala sida aya tuai tu.

Baka selama endang bisi siku pemacha berita ke ngenataika pekara ti dibacha iya nya. Cherita iya deka  ditimbal sekeda ari pangan iya ke duduk semija. Baka selama mega mayuh ari sida deka ngauka aja pekara ti dikenataika penyampai berita nya. Munyi nyawa ke chapuh baka burung ke makai buah kara deka mega narit ati sida ke ari mija-mija bukai lalu duduk sama mending enggau nampil randau sida dia.

Randau ti baka nya mega bisi nyadi di surau-surau udah sida sembiang Maghrib sampai ke jam Isyak, maya pengerami kawin, majlis tahlil tauka randau ba tebing sungai sambil bepampu tauka di laman sambil ngeredai gari bagi sida ke indu. Pandakka jaku, tu mih chara bekomunikasyen dalam isu-isu sosial orang kelia menya. Semua utai didinga aku sereta dibacha aku ari surat berita. Ukai semina nya ba pasar ke semak menua aku endang pengawa sida mih duduk dunga-dunga ba kedai kupi maya bala kami bejualka nyiur rangkai ngagai tauke china. Nyadi cherita tu ukai ngemaruhka sida nya tang bekunsi enggau bala Iban senentang budaya bala sida aya tuai tu. Bala Iban pan bisi mih berandau ba kedai kupi. Tang randau sida ukai ketegal deka berandau suah agi ke ngirup ai bisa kelebih agi enti udah pulai nyabung tauka maya ke baru betemu.

Semakin kitai maju, randau ba kedai kupi udah betambah tempat lalu pindah ke coffee house. Semina, randau di coffee house suah agi befokus ngagai dua pugu pekara baik nya politik tauka bisnes ketegal iya nya siti ari chara besosial ke patut ba raban ke bulih penuduk manah dalam komuniti maya nya, iya nya raban politikus tauka raban orang dagang.

Tang kemaya hari tu, laban ke udah bisi dunya siber, randau di kedai kupi udah dibai ke dalam ruang forum, blog, laman sosial baka facebook enggau twitter. Raban bansa Iban ke biak kemaya hari tu mega udah sama bela sesingkang nitih bansa bukai berandau ngena laman ke udah bisi nya. Enti diperatika pemayuh laman berandau ba dunya siber tu, mandangka kitai kemaya hari tu endang rindu berandau.

Semina utai ke midaka randau , dulu suba topik ti dipejuraika nya mayuh agi pekara-pekara ti serius bekaul enggau pengarap, bansa, menua, genturung pendiau, tauka  peninggi pendiau (maruah), tang kemaya hari tu, agenda randau nya udah nadai garis entara ~ nadai garis entara topik randau,  garis entara ke amat tauka ke bula, lalu nadai garis entara umur orang ke bejaku nya.

Katika tu pekara ti badas?  Enti ba pelasar runding, utai tu endang badas laban iya meri peluang enggau ruang ngagai sapa-sapa ngenataika penemu diri. Komuniti diatu udah dikumbai majak tebuka sereta tuai ari sukut runding. Taja pia, lebuh kitai nelusur lalu meratika randau ke dipandang ba internet, dia  kitai meratika mayuh ari kitai ke bendar ukai majak tebuka, tang majak tengat ari sukut runding. Ukai majak tuai tang nyau pulai baka anak mit baru.

Lebuh peluang udah tebuka ke  semua orang mendingka sada ngagai dunya, dia kitai sama-sama ngenataika penemu enggau pengasai ati diri enda ngira baik pekara ti disadaka kitai nya amat tauka bula, betul tauka salah, mai penguntung tauka penusah.

Enti dulu suba, randau kedai kupi ti ditambah kuah semina didinga orang ke mimit aja, orang ke ba genturung pendiau nya aja tang kemaya hari tu nyau bepuluh, beratus,  nyau mayuh ari beluh di Letung Kumpang, nyau banyak ari lemetak di Tinting Kedang, nyau beribu orang ulih meda sereta meri respons ngagai pekara ti disebutka kitai. Badas mih, enti topik ti dikenataika nya pulai ke penguntung.

Tang kati enti nya bekalih, enti topik pemuka randau nya semina ngelepaska asai ati lalu nyerauh ‘ooh’ tauka ‘ahh’, nama hal nya?  Utai ti baka nya tentu nadai mai penguntung lalu iya ke balat ngenyinuka ati iya mega ngirit orang bukai sama-sama bela enggau bejakuka pekara ti nadai beguna nya.

Iya ti balat ngenyinuka ati nya lebuh bisi mih entara kitai  nganggap dunya nadai garis entara dunya siber nya mega dunya ti nadai dosa. Enda ngalitka ati enti bisi orang ke manah ulah batang tubuh dipeda kitai tang tau tak ngena jaku jai, jaku nyumpah tauka chebur-chebur bejaku baka orang ke kurang ajar lebuh ba ruang siber.

Taja pan berandau di kedai kopi nya nadai besekat tang iya nadai ngerusakka nama-nama. Tang randau di dunya siber meransang anarki jaku, anarki runding ti ulih ngeruga anarki chara kitai ngerejaka utai sereta tau ngeruntuhka tamadun bansa. Iya nyadi badas enti tamadun ti diruntuhka kitai nya digantika enggau tamadun baru ti manah agi. Tang ke suah didingaka kitai, tamadun sesebengkah bansa ti runtuh nya suah agi enda ulih digaga baru.

Dini kala ninga sesebengkah tamadun bansa ti runtuh ulih angkat baru enti ukai semina replika arkitektur iya aja.

Nya alai ku penemu orang ke madah ke orang (ku uhaeng madah ke uhaeng), badas agi bejaku manah tauka enti nadai utai dikejaku badas agi diau diri. Nyangka bejaku manah tauka diau diri nya ngembuan empas ti besai sereta beguna ukai semina dikena ninding diri, tang mega terangkum dikena  nyaga tamadun bansa. Nya alai ku sempama jaku tuai manah agi jaku ketupung. Nadai salah kitai enda sayauka jaku tang anang dataika kitai nyau besengki jaku. Endang baka adat mih, enti napang bekunsi rintung, enti ngasu bebagi semeliung, enti bejaku bekunsi sukung. Nya aja dulu. Mupuk aku, enggaika kumbai orang kelalu balat bejaku!