Teo enggau Midas Touch Iya

Pelaba aku mayuh orang ngelala David Teo, kelebih agi sida ke rinduka filem cherita Melayu.  David Teo nya orang ke nengkebang kompeni Metrowealth International group (IMG). Iya diatu udah nyadi orang ke pengabis regas dalam industri filem Malaysia.

Pejalai pemujur produser filem tu patut bendar nyadika peransang laban iya  bendar amat gawa ngenataika diri nyapai juluk ati iya nya. Teo ke bendar maya agi biak suba endang bisi ati deka belajar ngambi diploma dalam arkitek ngambika ulih mangku pengawa nyadi draughtsman tang ketegal nadai chukup duit dia pelajar iya puntan ba tengah jalai. Apai iya bekereja nyadi kontraktor lalu bisi tujuh iku anak ke ditupi.

Ketegal nya, iya lalu enggau orang masuk  bejual barang sechara terus tauka direct selling dikena nampung belanja. Produk ke keterubah dijual iya nya tinted film. Dalam pengawa dagang iya mujur nunjukka diri orang ke pintar. Nya alai dalam taun 2000, Teo muka sebuah production house, MIG laban iya ninga orang ke ngaga wayang mayuh untung.

Maya nya mega iya benung enggau orang bejualka ubat tradisional Melayu lalu mayuh agen di baruh pegai iya.

Nasit enda tentu manah laban ketiga-tiga filem iya ti keterubah iya nya syukur 21, No Problem enggau Mendam Berahi enda tentu untung ba box office. Iya rugi lebih RM3 juta.Taja pia, iya madahka diri enggai mantul ngapa sereta enggai badu nyadi produser filem. Berengkah ari sehari nya iya belajar ari penyilap sereta ngubah chara iya ngaga filem.

Kenyau ari nya nasit iya berubah manah. Diatu iya nyau enggau temegah ati madahka diri ari ti nyadi produser filem  iya ulih ninggalka pesaka iya nya filem ti kala dikeluarka iya.

Taja baka nya, filem iya suah dipejah, dikritik ketegal dikumbai bekualiti baruh lalu semina ngaga dikena ngulihka untung aja. Ba penemu iya ukai mudah enti kitai deka ngemuaska ati semua orang. Iya ngeluarka filem ukai ke siku-dua orang aja tang ke semua orang. Lebuh orang meda wayang ke dikeluarka iya, iya nemu sida deka teperindang.

Iya madahka ari filem ti udah dikeluarka iya mayuh orang ke bisi penau diambi gawa baik nya nyadi pelakon tauka iya ke gawa ba belakang kamera. ‘Aku udah ngaga mayuh dalam industri filem tu, tang enda semua orang meda utai ke digaga kitai. Sida tu kiruh agi ngiga penyilap ke digaga kitai.’

Iya mega madahka diri ukai produser ke semina duduk aja dalam opis ti bisi airkon, meri duit ngagai direktor sereta ngelakka sida bejalaika pengawa ngaga filem. Iya enda baka nya laban iya empu deka enggau sida ngereja pengawa nya.

Lebuh ke begulai gawa enggau pekereka iya meratika pengawa produksyen filem iya ari sukut editing bunyi datai ke pengawa ngaga poster filem. ‘Aku ngereja semua pengawa tu ketegal aku rindu ke pengawa ti bekaul enggau filem,’ pia ku iya.    

‘Taja pia aku mega nemu pemesai reti duit. Aku ukai orang ke diau dalam dunya fantasi. Dalam dunya realiti, nuan begunaka duit ngambika ulih idup dalam industri tu. Enti filem nuan enda mujur bulih untung, nuan nadai puku dikena ngaga filem ke nangkanka nya.’

Naka kediatu, Teo udah ngeluarka 76 buah filem. Tu berita ke chukup ngalitka ati.

Dalam pengidup iya, bisi sepuluh orang ke nyadi perasang iya nyadi mensia ke dipeda kitai kemaya hari tu. Tu nyengkaum apai indai iya – niang indai iya Ye Bang enggau apai iya Teo Tuan Ching.

‘Indai aku ituk amat kutap-kutap,’ ku iya mulaika pengingat. ‘Ambika banding, enti aku enda madam lampu, sehari-hari nya mih nya mutap.

‘Tang pengituk iya bisi mai pemanah. Iya ngajar kita anang rua. Nya ke ngasuh aku nyadi orang pedagang ti manah ketegal iya.

‘Apai aku, taja pan enda mayuh jaku tang iya orang ke bagas gawa. Iya seruran madah ngagai aku pasal pengerentang enggau pemendar ati iya dua kualiti ti enda tau enda dikembuanka kitai. Aku mengkang ingatka jaku lalau iya nya nyenyuk ke sehari tu.’

Siku da agi orang ke rindu dipeda iya, iya nya Tun Dr Mahathir Mohamad. ‘Menteri Besai ke dulu suba tu orang ke bisi tinjau pemansang. Iya udah ngaga menua kitai tu mujur ba mata dunya.’

Iya ke bukai nya nyengkaum Presiden US Barrack Obama ke nyadi orang bansa African-American keterubah nyadi presiden; enggau Menteri Besai Singapore ti keterubah, iya nya Lee Kuan Yew. Pengeliat ati iya ke nyadi Teo tu rindu meda Lee Kuan Yew.

Iya mega berasai temegah ati ke Bill Gates ke gerah jari  meri setengah ari duit pengaya iya ngagai orang umang, lalu pia mega ngagai Nelson Mandela ke udah bebendar ngelepaska menua iya ari perintah apartheid sereta dijel dalam rumah pasung beberapa taun ketegal ngetanka penemu iya empu.

Iya mega meri tabi ngagai Tony Fernandes ketegal perambu dagang iya ke nyelai ari enggi orang ti ngujungka mayuh orang ulih terebai ngena bilun ngena tambang murah.

‘Pelaba aku mayuh orang keterubah iya suba ngumbai idea Fernandes nya penemu orang gila. Tang iya ngembuan pemerani ngujungka iya ulih nyapai juluk ati iya nya.’

Teo mega rindu ke direktor China Zhang Yi-mou ke mujur ngangkatka kualiti industri filem ba menua iya ngambika setipak enggau Hollywood.

Iya mega meri kredit ngagai bini iya, Jane Lim ke ngembuan pengeliat ati. ‘Iya mih tawing ke pengabis rapat dalam pejalai aku nuju pemujur. Enti nadai iya tentu aku enda mujur tauka ba penuduk aku baka ke diatu.’ – The Sun