Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Sabtu, 5 Mei 2012

Mutarka penanggul isu jaku rojak


ISTILAH jaku rojak ukai istilah belalauka penemu tauka knowledge. Istilah tu ditengkebang sida ke sayau ke utai ke nyadi ba nasit jaku Melayu, jaku Iban tauka jaku bukai ti tau diruga ketegal pemansang ubah dunya. Nyau deka ninting taun isu tu dikenang belama kelebih agi baka jaku Melayu laban mayuh tuduh penemu senentang isu tu lalu enda kala ngenataika nama-nama asil ti tau dikearapka mensia mayuh.

Apin lama ti udah, Opis Menteri Pemadah, Komunikasyen enggau Kebudayaan mantaika tuduh penemu numbuhka Komiti Penyelaras dan Penyeragaman Bahasa ngambika semua stesyen media di menua kitai ngena jaku ti sama ngagai bala peninga.

Pengawa nyemakaka pekara tu endang patut bendar dipejalaika laban program radio enggau televisyen endang diterima orang mayuh. Jaku beguna bendar dikena ngenataika mayuh pekara enggau penerang bukai ngagai mensia mayuh. Sekeda keretas kereja senentang jaku bisi dibantai dalam Seminar Bahasa dalam Penyiaran anjuran Institut Penyiaran dan Penerangan Tun Abdul Razak (IPPTAR) baru-baru tu sereta diguluka pengari stesyen penabur.

Nasit jaku bansa iya nya jaku Melayu sama mega baka jaku Iban tau dikiraka ngirauka ati laban ulah kitai ke enda tentu sensitif  senentang tanggung pengawa enggau pemansang jaku kedua-dua tu jemah ila.

Stesyen penabur ambika chunto radio bagi Iban baik nya radio perintah tauka kompeni mega enda ulih nyeliah diri ari napi penanggul tu laban bisi program ke mungkur orang mayuh ke enda tentu irauka pemetul jaku ke dikena sida. Jaku rojak balat amat dikena lebuh ngenataika pesan, pesan selamat pagi sereta lebuh ke ngena servis sistem pesan jaku pandak (SMS). Pekara tu tau bendar ngasuh kitai bingung senentang identiti jaku kitai empu.

Ketegal nya mayuh orang meri simpul penemu senentang madahka identiti jaku kitai nyau majak retai. Nyau kelama ila bisi jalai jaku rojak dianggap nguasa randau, tulis enggau ke balat ngenyinuka ati nya tulis karang nembiak di sekolah udah dikumbai bisi ngena jaku nya ba sekeda nembiak ngujungka meri empas ngagai mark karang sida nya.

Nitihka definisyen, jaku rojak nya jaku ti bechampur-baur entara jaku diri empu enggau jaku bansa bukai. Taja pia, mayuh orang meri definisyen jaku ti bechampur entara jaku Melayu  jaku English. Tang ba penemu aku jaku rojak mega nyengkaum jaku Iban ti bechampur-baur enggau jaku Melayu enggau jaku English. Kemaya hari tu isu jaku rojak Iban nya balat agi bechampur enggau jaku Melayu laban jaku Melayu ti balat agi dikena baik nya di sekula, ba surat berita tauka radio enggau televisyen.

Nama aja definisyen jaku rojak dalam konteks bejaku enggau nulis di menua kitai endang ulih dikena ngerembaika reti jaku rojak. Kitai mega ulih ngumbai jaku ti bechampur entara jaku standard enggau istilah tauka terminologi sereta jalai ngena leka jaku maya nulis sereta maya meri jaku ba mua mayuh lain ari jaku standard mega tauka dikumbai jaku rojak.

Ambika banding enti kitai ngena jaku pandak baka ‘ka’, ‘endar’, 'entu', 'adai'  enggau sekeda leka jaku bukai enda tau disebut tauka ditulis dalam pengerami enggau pengawa rasmi. Enti kitai ngena jaku bujara ti dikena sida besehari-sehari baka ‘awek’, ‘cun’, ‘kantoi’, ‘cilok’, ‘otai’ enggau ti bukai mega dikumbai sebagi ari jaku rojak enti disalah guna dalam pengawa rasmi. Nya alai berasai enda tentu lantang ati enti bisi surat berita ti ngena leka jaku ti baka tu nyadika topik  sesebengkah berita taja pan iya ti bendar istilah nya udah sebati ba raban bujara menua kitai. 

Batang jurai orang mayuh senentang penguat jaku rojak ti ulih nguingka chara orang mayuh ngena jaku nya bisi kaul enggau media massa lebuh maya sida ngena servis SMS ti dibantai ba skrin televisyen. Ditu mih kitai ulih meda mayuh macham istilah baru dikenataika orang mayuh ngujungka istilah tu dipasukka dalam pengawa rasmi. Enti ba konteks jaku Iban, media massa nya radio enggau internet. 

Datuk Seri Dr Rais Yatim kala mantaika serebana pengirau ati iya senentang ulah orang kitai ke rindu bejaku setengah belut setengah ular. Aktivitis jaku mega ngenataika enda puas ati sida senentang kualiti jaku bansa ke majak nurun tikas pemanah baka nya nya mega dalam konteks jaku Iban. Jaku Iban ke dikena luar ari kelas jaku Iban udah jauh bendar diruga jaku bansa bukai. Nama penyadi enggau pemansang jaku tu ila jemah ila sepuluh tauka dua puluh taun ti deka datai enti nadai jalai ngemutarka pekara tu ari diatu. Pun penanggul ngena jaku rojak  tu nyadi ketegal ulah kitai empu ke balat agi ngemeratka jaku bansa bukai ari jaku kitai empu. Ngemasuka istilah asing  dikira engkeman agi lalu ulih ngangkatka  imej orang ke bejaku nya kelebih agi ngagai komuniti ke diau di nengeri. Sida tu ke balat agi nganchurka jaku diri empu.

Ubah pemansang dunya seruran nempiaska istilah baru ti dikena dalam mayuh bengkah bidang. Bisi sekeda orang ke ngumbai enti bisi sida ke enda nemu nampil diri tauka enda ulih nguna sereta meretika istilah baru kelebih agi ari luar dikumbai udah ditinggal pemansang.

Kitai ke bendar ukai enda ulih ngena jaku diri empu tauka jaku bansa. Ambika banding dalam konteks jaku bansa, enti kitai ngaturka kimpin senentang jaku, Minggu Jaku tauka Bulan Jaku, semua deka nguji bejaku ngena jaku ti betul lalu naka ulih ngena jaku nya enggau penuh.

Tang lebuh udah tembu kimpin, jaku rojak pansut baru lalu nama utai ke udah dikemesaika tauka  dipraktikka maya kimpin nya tak lenyau pia aja baka sempama jaku tuai - lesap tengelam puting.

Pengawa bekimpin nya endang ngerugika kitai ari sukut maya enggau duit kitai bekimpin senentang utai ke bendar nya endang enggi kitai kelia-lia nyentuk ke diatu lalu utai ke dikemesaika nya ke bendar ulih digaga kitai ukai ari ansak sereta asuh orang bukai.

Tang ironi iya, enti kitai nemu uras nya kamah, kitai enda nyimpan uras nya tauka muai iya ba sebarang endur. Dalam jaku pan baka nya; enti kitai nemu bisi ‘uras’, kitai enda tau nyimpan iya tang ngiga jalai muai uras nya.

Sida ke ngelese tauka ngemaruhka jaku bahasa Melayu endang udah meda pengulih jaku  Melayu ukai semina di menua kitai aja laban jaku Melayu dikena kurang lebih 300 juta orang di dunya. Ba bansa Melayu, enti sida balat agi rindu ngena jaku rojak, nya reti iya sida ngelese jaku sida empu. Ba orang India enggau China ambika chunto, enti sida rindu agi ngena jaku English lebuh bejaku, nya mandangka sida nadai pengarap ngagai jaku Melayu taja pan di sekula sida mesti belajar sereta ngulihka kredit dalam jaku Melayu. Baka nya mega dalam konteks jaku Iban, enti orang Iban empu enggai ngena jaku Iban nya reti iya sida ngelese sereta ngemaruhka jaku Iban. Ba sida tu, jaku Iban nadai standard lalu nadai ngembuan nilai komersial. Nadai guna bejaku ngena jaku Iban.

Nya alai Orang Indonesia meda kitai Malaysia nya komuniti ke nadai ngembuan penemu ti tegap dalam jaku diri empu. Ketegal nya mih bisi sida belajar bejaku English sebedau datai ke menua kitai laban ku sida, orang kitai mayuh agi ke bejaku English ari ke ngena jaku diri empu.

Media besai amat kuasa iya ngambuh komuniti enda kira raban dikena mutarka penanggul jaku rojak. Taja pan penanggul tu enda ulih diputarka seratus-peratus, tang pengawa ke nguji nagang sesetengah program ke nyata amat ngena jaku rojak patut bendar dipejalaika.

Media ulih ngeletakka atur baka; semina SMS ti ngena jaku ti betul aja dipandang tauka dikeluarka ngagai orang mayuh baik nya ba televisyen tauka radio. Semua media mega mesti sama-sama bepekat munaska pengawa ti ngena jaku rojak ngambika nadai agi ngenataika penyaru ngagai mensia mayuh. Orang mayuh, enda kira mih sida nya ari raban elit, komuniti tengah tauka orang baruh, kuli batak enggau ke bukai; enti lebuh masuk dalam program televisyen tauka radio kelebih agi lebuh dikerandau dalam program radio tauka televisyen mesti nguji ngena jaku Melayu tauka jaku Iban ti betul.

Media mega patut minta penyanding penemu ari Dewan Bahasa dan Pustaka dikena nentuka jaku ti dikena nya betul sebedau dikenataika ngagai orang mayuh. Nengah chara tu, tentu bisi standard lalu pia mega imej jaku nya ulih diangkatka sereta penyaru ulih diseliahka. 


Dalam konteks jaku Iban, amat mih nadai siti institusyen ke meratika standard jaku Iban dikena ba radio tauka pengawa rasmi tang taja pia, iya ke udah dikena ba sekula kemaya hari tu tau nyadika malin lebuh kitai ngena jaku Iban ba radio tauka lebuh bisi pengerami rasmi.

Tiada ulasan:

Catat Ulasan