Sibu:Radio Televisyen Malaysia
(RTM) Sibu deka ngatur Pekit Bintang Lagu Iban 2012 berengkah enggau pekit
renggat keterubah maya pukul 7.30 lemai kena 5 ngagai 6 May tu ba panggau RTM
Sibu.
Pemesai pengatur pekit tu, Margaret Cosma Langgong (MCL) madahka pekit
renggat ke penudi deka diatur kena 18 May pukul 8 lemai ba Dewan Suarah Sibu. Renggat
ke penudi nya ila semina digulu 10 iku pemekit ke ulih ngenataika diri ba
renggat nya.
Ku iya, pekit tu diatur RTM Sibu kenyau ari taun 1980 suba lalu udah
mujur nempa mayuh artis.
“Baka ngelama tu mega, Pekit Kepenudi Lagu Iban deka direkod lalu ulih
didinga ba Radio Malaysia SibuFM beserimbai enggau Hari Gawai sereta pengerami Ngintu Penumbuh RTM ke-66,” pia ku
iya madah ngagai pengarang berita.
Ku Margaret, pekit tu ngembuan tuju deka ngerapatka kaul bala peninga
lalu nerangka enggau lenak agi batang tuju RTM ba pengawa begulai enggau mensia
mayuh kelimpah ari deka nempaka pengelandik rebak baru ba pengawa belagu.
Pekit tu ku iya tebuka ngagai semua peranak Malaysia beumur 18 taun ke
atas aja.
“Bayar enggau pekit tu iya nya RM30 aja siku,” ku iya sambil madah bala
artis enggau sida ke udah kala menang ba pekit ke diatur RTM Sibu sebedau tu
enda dikemendar masuk pekit tu.
Ngenang pekit renggat kepenudi, ku Margaret madahka bala pemekit 10 iku
tau milih lagu peneka ati sida lalu nyendiaka vcd tauka minus one kediri empu.
Champian Pekit Bintang Lagu Iban 2012 deka pulai mai mata duit RM1,000,
trupi enggau setipikit.
Lumur dua deka bulih RM800, enggau lumur tiga bulih mata duit RM500
kelimpah bela disempulang trupi enggau setipikit.
Penyanyi ke pemadu nyulut sereta ngembuan sada nyawa ke pemadu manah
mega deka nerima mata duit RM100, trupi enggau setipikit. Tujuh iku pemekit
bulih perais sagu ati mai hamper enggau setipikit. – Dibali ari Utusan Borneo
Tiada ulasan:
Catat Ulasan