Lapar pungkang ulih dikurangka enti kitai ngetu sekejap lalu berunding

Mayuh ari kitai makai tiga kali sehari lalu enda kiruh berunding ke jemah ila maya pemakai di dunya nyau majak berubah.

Siti ripot baru benama ‘Ngenataika Pengelikun Pemakai Lebuh Napi Ubah Gaya Hari’ patut bendar diperatika enggau silik. Ripot nya digelumu seraban saintis ke bisi kuasa. Iya nerangka dua jalai ke patut diambi dikena napi penanggul tu.

Keterubah iya, kitai patut terus ngemeranka pengawa betanam betupi tauka dikumbai sustainable agriculture lalu kedua, kitai patut badu ngembuan ulih nampui maya makai iya nya nyeliahka diri ari rua makai sereta nyeliahka diri ari lenyau pemakai.

Dua chara tu nya pugu pekara dikena neruska sistem pemakai global tauka sistem ti tan lama sereta tegap.

Baka nya mega enggau ubah chara makai ba sekeda menua kaya lalu mega pengawa ke ngagihka bantu ekonomi enggau teknikal ngagai menua  ke ngemeranka pengawa betanam betupi sereta iya ti begunaka tulung.

Dikena kitai meretika dimensyen penanggul tu, uji kitai betatika pekara tu: dunya kemaya hari tu bisi kira-kira tujuh biliun mensia. Nyerumba taun 2050 ila, nyangka penyampau tubuh mensia di dunya tu deka betambah ngagai sembilan billium orang.

Dalam penyampau tubuh mensia kemaya hari tu, 900 juta orang kurang zat pemakai. Taja pia kira-kira 1.5 biliun orang bukai ngembuan pemerat tubuh ke belebih, kelalu geduk (gemu) enti nitihka standard Gerempung Pengerai Sedunya (WHO).

Ninting taun, kitai ngerua kira-kira 1.3 biliun tan pemakai ti diasilka guna mensia mayuh. Sekeda ari orang ke lapar pungkang nya ketegal idup ditangkup penyeranta. Kira-kira 1.4 biliun mensia di dunya idup enggau penatai pemisi ti kurang ari AS$1.25 tauka RM3.75 sehari.

Penanggul bukai ke ngasuh lapar pungkang nya ketegal kurang tanah lati sereta ami. Dua biliun orang diau ba tanah rangkai lalu 1.5 biliun nya bepanggai ba tanah ti majak kusi sereta ransi.

Pengelenyau tanah nya ketegal gaya hari ke majak berubah ba sekeda endur di dunya. Tu nyengkaum hari ti majak balat panas, kemarau panjai enggau kampung ti angus diempa api. Semua pekara tu balat agi nyadika penanggul dalam taun 2010 ngujungka rugi mata duit AS$7.5 biliun tauka RM2.3 biliun.

Enggau tanah ke dikena betanam betupi  kira-kira 4.9 hektar di dunya, diagihka 3.7 biliun hektar dikemansangka alai betanam enggau alai nyadika endur chapi makai rumput. Chara dikena mutarka penanggul lapar pungkang di dunya datai ari pengawa ti ngeluarka pemakai ti mayuh ba menua ke bisi defisit pemakai.

Taja pia, dikena ngamatka pekara tu, kitai patut meretika penanggul tu enggau dalam.  Iya nyangka ulih mantu enti kitai meratika sida ke begelumu ba mija makai di rumah kitai. Uji peratika enggau silik. Kati bisi ari sida nya ngembuan pemerat tubuh ke belebih? Ni penyampau pemakai ke diruaka sida? Kati bisi nembiak dia diperansang milih karier dalam sains, sains sosial, injinir, politik tauka betanam betupi ti ulih mantu mutarka penanggul lapar pungkang di dunya?

Katika runding sida ke makai nya enda nangika penusah lapar pungkang di dunya, tauka enda nadai nemu utai senentang pekara tu?

Gaya hari ti majak berubah nya pengari ti kuat digela orang jai dalam cherita tu. Iya balat nyadi ketegal mensia asil ari ngeluarka gas-gas rumah gadung.

Ironis iya, gas-ga rumah gadung balat agi diasilka ngena chara  kitai ngasilka pemakai. Nya mih kebuah kitai patut ngubah chara tauka tebiat pemakai kitai.

Ba menua maju, nama utai ti deka diempaka kitai – kelebih agi baka produk dagin chapi enggau tusu diasilka nengah chara betanam betupi ti tau ngerusakka rampa menua.

Kitai ulih nyapai pengelikun pemakai lebuh napi ubah gaya hari tang kitai enda ulih nyapai pekara nya enti kitai enda nemu penanggul ti bendar sereta ngaga pemutus penemu dikena mutarka penanggul nya. – Fr. William J Byron SJ