KUCHING: Atur terit deka dipejalai jemah ila ke alai semua hotel, palan
makai enggau pemerindang ditagang endur nginsap.
Menteri Opis Pelilih Menua enggau Pemansang Raban Bansa, Dato Sri Wong
Soon Koh madahka atur tu tetap deka dipejalai tang belubah.
Kitai belabuh ngaga atur tu ba hotel enggau restoran dulu, laban mensia
mayuh patut diajar dalam timpuh ke panjai. Kitai enda ulih terus neritka atur
baka nya dulu, tang kami ngarapka ulih mutarka pekara tu enggau jampat,” ku
iya.
Iya madah baka tu lebuh dikerandau ba aum media sepengudah iya nyadi
saksi nyain MoU ‘Projek Mulu Heritage Bebas Asap Rokok’ entara Gerempung
Ngangkatka Pengerai Malaysia (MySihat) enggau kelab berubat Sarawak di Opis
Pengerai pampang Petra jaya, ditu kemari.
Tang ke diatu ku Wong, sekeda tempat ba restoran bisi dibagi endur orang
ke nginsap sereta orang ke enda, tang laban mayuh peminta ari palan bansa tu
deka ngaga restoran ke tau endur nginsap, meransang Perintah Menua deka terus
nyukung atur tu.
Kami nguji enggau naka ulih ngaga palan ke bepengerai. Ba menua US pen
perintah menua nya enda ulih ngemunaska ulah badu nginsap laban industry
segerit di menua nya tegap.
Ba aku, nya nitihka disiplin siku-siku. Kitai ulih badu nginsap enti
kitai bisi ati,” ku iya.
Di Malaysia, Mulu Heritage udah ditetapka nyadi palan ketiga ti
digazette nagang pengawa nginsap, sepengudah Melaka enggau Johor Baru ke deka
diatur 31 Mei tu ila.
Sebedau nya, Direktor Opis Pengerai Sarawak, Dr Zulkifli Jantan madah,
penyampau orang ke nginsap segerit di menua tu kelebih agi sida ke berumur 18
taun ke atas, manggai 21 persin (penyampau tu tinggi bendar).
Reti nya ari tiap-tiap 5 iku mensia, siku endang orang penginsap,” ku Dr
Zulkifli.
Iya nambah, nitihka ripot Gerempung Pengerai Sedunya (WHO), enda kurang ari
5.4 juta mensia parai ninting taun di serata dunya ketegal insap tauka asap
segerit, iya nya siku parai dalam tiap 6.5 saat.
Di Malaysia, penyampau orang ke parai ketegal insap dipelaba dalam
10,000 ninting taun.
Agensi Gerempung Pemanah Rampa Menua Amerika Syarikat melabaka asap segerit ke udah bari nya nyadika pun
pemarai 3,000 iku mensia ketegal ngidap sakit riman lempuang ba orang ke ukai
penginsap, lalu sejuta nembiak mit ke kena penyakit nesak ke balat laban kena
asap segerit ke udah bari. – Dibali ari Utusan Borneo
Tiada ulasan:
Catat Ulasan