Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.
"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Ahad, 29 Julai 2012

Serakup patut ditumbuh kena nyemakaka jaku injau dalam jaku Iban


KUCHING: Sebengkah serakup patut ditumbuh dikena nentu sereta nyemakaka jaku injau dalam jaku Iban.

Buah runding nya dipansutka Chairman Komiti Rama enggau Belelak Saribas Andrew Bangkam Bejie.

Iya madah setipak enggau raban bansa diatu ti lebih moden lalu ketegal nadai tusun jaku engkeman ngujungka jaku Iban mayuh nginjau teknologi moden sereta jaku bepelasarka sains.
Ambika banding ku iya, baka TV Plasma, Teknologi Nano enggau mayuh kebukai.

“Serakup nya patut nentuka jaku injau nyadi jaku ti stindit, ari ti siku-siku tauka komuniti ngena jaku diri empu tauka terus nyalin jaku bukai.

“Serakup tauka unit tu ditumbuh dikena ngintu jaku Iban ke diatu lalu mandangka entiti baru,” ku Andrew dalam jaku pengelalu ba pengerami bejadika Randau Pemansang Jaku Iban Dalam Sekula.

Randau ti diatur SSRC kemari dipenyadika Sapit Kepala Menteri Datuk Patinggi Tan Sri (Dr) Alfred Jabu Numpang ba sebengkah hotel.

Berebak enggau tu, Pegawai Kurikulum Bahasa Iban, Pengajar Francis Mancha lebuh ditanya tuju Randau Pemansang Pelajar Jaku Iban Dalam Sekula, iya madah;

“Tuju randau nya dikena nerang sereta madah ngagai orang mayuh iya nya jaku Iban ukai semina bisi dipelajarka ba renggat sekula primari enggau sekondari tang mega ba renggat universiti ba diploma, ijazah, master enggau Phd.

Ambika banding, kami udah nganjung keretas kereja peminta jaku Iban dipelajar ba renggat Phd enggau Master. Pekara tauka keretas kereja udah dikenataika Dr Chemelin Usop dua bulan ti udah ngagai senat, ku iya.

“Diatu kitai nganti pemendar ari senat, enti udah dikemendar, jaku Iban deka bisi dipelajar ba renggat master enggau Phd,” ku iya.

Entara keretas kereja ti dipejurai dalam randau nyengkaum Status pelajar jaku Iban dalam sekula ( Pengajar Dr. Linton Britten enggau Pengajar Francis Mancha); Sistem Jaku Iban di sekula – sistem sepil & jali jaku (Pengajar Harold Unsi & Pengajar Mamat Unggat) sereta Turai enggau tisih pelajar jaku Iban di sekula (Pengajar Raymod Braoh & Pengajar Geoffrey Singgon).

Randau nya digulu urung 150 iku raban bansa Iban ti ngembuan latar bidang pengawa ti bebida.


Dibali ari: http://www.theborneopost.com/2012/07/29/
Posted by at
Labels:

Tiada ulasan:

Catat Ulasan

Langgan: Catat Ulasan (Atom)