Kelalu mayuh graduate

Singapore nya menua ke chukup lati dalam pengawa belajar enti dibanding enggau menua bukai ba Asia Tenggara. Mayuh bendar rayat iya ngembuan degree dalam mayuh bengkah bidang. Tang kemaya hari tu tuai pemegai menua sida mupuk bejaku pasal pemesai guna ngembuan mayuh pengelandik ari ke ngembuan degree aja. Nama kebuah pia? Kenang pengarang sekali tu nguji ngenangka pekara tu ketegal iya bisi bendar kaul enggau pemansang pelajar ba menua kitai Malaysia kelebih agi di Sarawak lalu ke mega lebih agi ngagai raban bansa Dayak ke nyengkaum bansa Iban.

Sekeda tuai politik minta rayat Singapore enda bangat ngembuan pengarap ngagai degree ke dikeulihka ari universiti dikena mutarka pengarap orang mayuh senentang sida nembiak tu.

Tu nunjukka sida ke betanggung pengawa baka perintah udah nyangka maya ke kurang manah dalam pemansang ekonomi sereta mai empas ngagai peluang bekereja.

Rayat Singapore, kelebih agi raban apai indai ke lama udah arap sereta ngumbai degree ari universiti tu kunchi ke pemanah pengidup deka berasai tekenyit lebuh ninga berita tu.

Beberapa dekad ti udah, perintah sida meransang nembiak redak belajar bebendar enggaika sida enda ulih napi pengidup lebuh ke besemekih enggau orang bukai ba dunya ke balat ngemeranka pengawa bepekit entara individu. Tang diatu utai tu deka ngubahka strategi dalam bidang pelajar.

Iya mega asil ari berita ke dipansutka pemansai kanan ba Opis Menteri ngagai pemesai diplomatik America.

Berita tu madahka ekonomi global ti dikemeranka Singapore tu enda tentu kondusif ngagai raban orang ke kelalu mayuh pandai.

Ngembuan kelalu mayuh graduate nyau dikiraka enda kondusif agi kelebih agi ngagai pemansang maket pengereja pengawa kemaya hari tu kelebih agi baka ba menua Singapore. Suba nyangka amat mih orang ke bisi degree nya laku sereta jampat bulih kereja.

Menteri Besai, Lee Hsien Loong diatu ngelalau orang Singapore berunding milih jalai ukai nengah universiti enti deka mujur.

Amat mih kita bisi degree, bah nama dih? Ukai nya ulih diempa. Enti iya enda ulih meri pengidup ke manah, kereja ke manah reti nya iya nadai guna. Iya madahka Singapore enda ulih nerima semua orang dalam nengeri nya graduate. Laban enti menua nya nyau 100% graduate nyangka penyampau orang ke nadai pengawa mega deka betambah.

Munyi ke Menteri Pelajar sida, Heng Swee Keat ke madahka ngembuan pemandai aja ukai gerenti bisi karier tauka kereja.

Baka nya mega munyi ku Pemangku Menteri Pengelantang Sosial enggau Pemansang Diri Sebilik, Chan Chun Sing madahka ukai degree tauka diploma ke amat diguna tang pengulih belajar mayuh bengkah pengelandik. Pengelandik dalam pengidup baka soft skills mesti dipelajarka belama laban enti enda indah ke ngembuan degree ari universiti ke pemadu tebilang nyangka enda diguna jemah ila.

Nya alai Menteri Besai nya kala ngelalauka nembiak politeknik nya ngulihka degree ukai opsyen siti nya aja. Iya meransang sida bekereja dulu beberapa taun tauka ngepunka pengawa dagang. Ari nya sida teulihka peneleba sereta nemu pengulih diri empu lalu ulih ngaga pemutus diri sentang langkah ke nangkanka nya.

Baka ke dipansutka Wikileaks taun nyin kemari, mandal pengarah planning Cheryl Chan madah ke pemesai diplomat Amerika, sida nerima masuk orang graduate ba kadar 20%. Kebuah pia laban maket pengereja pengawa enda begunaka mayuh graduate. Kelimpah ari nya iya mega madahka semina 23% nembiak Singapore ke masuk sekula primari deka nembuka diri ba tikas pelajar tinggi. Penyampau tu dipeda baruh amat enti dibandingka enggau Amerika (50%) enggau Taiwan.

Berita tu tau bendar mebaka runding raban apai indai iya nya komuniti ke pengabis gagit di Asia nganjung anak sida teulihka degree. Mayuh ari raban apai indai sanggup betunggang lupung ketegal ke deka mantu anak sida lalu dipelabaka enda mudah ngalahka diri taja pan perintah udah bejaku munyi nya. Pekara ke patut dikemeratka nya pengelandik.

Taja pia, perintah empai ngurangka penmayuh tempat ba universiti tang majak nambahka penyampau. Penyampau universiti udah ditambahka ngagai lima sereta penyampau nembiak masuk nya kira-kira 13,250, satu per tiga nya nembiak ari menua luar. Ngurangka penyampau nembiak nya ukai langkah rapat sida perintah tang enda meransang nembiak masuk universiti nya sigi amat.

Parti perintah agi bepanggai ba sistem scholarship lebuh ke ngerikrut pemesai jemah ila lalu sida agi ulih matak nembiak luar ke pandai belajar ba menua sida. Nambahka nya nyau deka 18,000 orang Singapore bisi belajar ba institusyen luar baka ba Australia, Amerika Syarikat enggau the United Kingdom. Nitihka ripot media setempat, maket kereja nya enda ulih nyerap masuk pemayuh graduate nya. Nitihka ripot pansik ari McKinsey & Co madahka setengah ari graduate ke mangku pengawa ti enda begunaka degree.

Pengawa ke ngasuh rayat Singapore enda nampung pelajar tinggi ukai pekara ke ulih mujur dipejalaika. Mayuh ari sida tu bebelanja beribu-ribu ringgit sebulan ba tuisyen, lalu bisi nya udah berengkah nganjung anak sida ari umur tujuh taun.

Bah nama tuju ke bendar dih? Dipelabaka laban deka ngurangka sida ke jelan pemandai nya enggau orang ngeruhka ai nampung pelajar. Tang iya ke pandai nya endang tetap diasuh nampung pelajar sida.

Ari sukut ekonomi, Singapore nadai napi penanggul dalam bidang teknikal. Nitihka GDP sida mandangka bisi pemansang ngagai 1.8%. Enti baka nya pengawa ke ulih dikerejaka sida tu nitihka Menteri Besai sida nya ngereja pengawa daja (hawkers). Singapore merambu deka ngaga 10 buah pusat daja ke besai. Tu mih peluang kena ngemansangka pengelandik bedagang ke enda ulih diseliahka pemeli Singapore – enti produk nya manah.

Bah nama penyadi ngagai raban nembiak Iban di menua kitai lebuh ke udah meratika kenang di atas. Bisi nya nadai peluang nampung belajar ketegal mayuh kebuah lalu bisi nya udah mujur bulih degree tang betaun-taun nadai teulihka pengawa. Tu mega ketegal mayuh kebuah.