Pechaya – Video Klip Lagu Iban

Klip Video 'Pechaya'

Nyadi aku jarang bendar enggau orang mending lagu Iban sereta belematika pemansang industri lagu Iban. Ukai ketegal enda rindu. Ukai ketegal leju sereta bansu. Ukai mega ketegal nadai angkunka jaku Iban tauka lagu Iban. Tang mayuh kebuah. Taja pia aku nadai kala ninggal peluang ngenataika kenang senentang pemansang industri lagu Iban ba blog tempalai kenang baik nya asil ari buah kenang diri empu tauka asil ari artikel ti dibali ari surat berita bukai.

Nyadika sekali tu aku nguji deka ngenangka video klip lagu Iban ke bisi digaga nyempulang lagu enggau vcd ngambika bisi nambahka pemanah sereti gerenek lagu ti dikenataika siku-siku penyanyi. Tang video klip ti suah dipeda kitai ngelama tu endang nyau deka sebaka engkabih enggau pangan diri baik nya penyanyi indu tauka lelaki, kiraika tema enggau plot cherita dalam video klip nya nyau dikira klise. Dulu enggau diatu sebaka aja reti nya nadai ubah pemansang ari sukut kreativiti baik nya pengarah video tauka ari idea penyanyi nya empu.

Taja pia ukai reti iya penyanyi Iban nadai kreatif dalam ngasilka video klip setipak enggau pemansang industri musik kelebih agi enti diperatika ari industri musik bansa Melayu. Dalam era 2000 lagu Iban bisi udah mandangka pemansang baik ari sukut ngasilka lagu ti chulin, atur musik, lirik lagu enggau sada nyawa ti jauh bisi ngundan tikas standard ti patut ditemegahka orang ke rindu ke lagu Iban.

Munyi ke udah disebut dulu tadi ba kenang ke sekali tu, pekara ti deka dikenang nya sentang video klip lagu Iban. Siti ari video klip ke benung bisi dipunggah ngagai You Tube diatu nya lagu ‘Pechaya’ ke dibai penyanyi Gabriel Fairuz Louis siku ari penyanyi Iban ke benung tebilang kemaya hari tu. Ngagai bala ke rindu ke penyanyi tu tang lalu empai meda klip video ba You Tube enda salah enti bisi hari ngelawa You Tube. Naka kediatu udah bisi 11,669 iku orang meda video klip tu.

Tu siti ari pemansang ke patut ditemegahka orang ke rindu ke lagu Iban kelebih agi pemansang dalam industri lagu Iban ke suah diberi pejah ke negatif ngelama tu. Lagu ke berentak ayun lundai sereta disempulang enggau senario drama pandak bisi mandangka iya nyelai sereta klise ari video klip ke lagu Iban ke suah dipeda kitai ngelama tu.

Sapa mih penyanyi tu? Gabriel F. Louis mega digela enggau nama Fairuz Louis tauka Popeye. Iya ada dalam bulan May, 15 hari bulan taun 195. Iya endang ari Sarawak, siku penyanyi sereta penulis lirik lagu ke benung angkat tebilang kemaya hari tu. Menua asal iya Sibu, Sarawak tang ada di Kuantan, Pahang laban apai iya ke gawa nyadi soldadu maya nya suba. Iya pindah ke Sibu lebuh umur iya lapan taun. Iya bisi ngembuan setipikit SPM lebuh ke besekula ba SMK Rosli Dhoby. Iya berengkah nyadi penyanyi sereta nulis leka lagu lebuh iya beumur 13 taun lalu mupuk masuk mayuh bengkah pekit belagu enggau karaoke. Pekit ti pengabis besai ke kala dipasukka iya nya Worldstars-Road To Hollywood 2009. Pekit nya diatur dikena milih penyanyi ari Malaysia ke WCOPA (World Championship of Performing Arts) di Hollywood. Taja pan bisi enggau iay semina mujur naka tikas semifinal aja. Pemuntan iya maya nya nadai ngetanka iya nguji nyapai juluk ati iya ke deka nyadi penyanyi enggau penulis leka lagu. Iya gawa bebendar amat dikena ngasilka lagu ti ngembuan kualiti ti tinggi ngujungka iya betemu enggau siku producer musik ari UK, Mr. Chris. Mr. Chris tu mih ke mantu numbuhka musik production iya ba Kuching ke dikumbai ngena nama Rok-Box Music Production(http://www.rok-box.com). Gabriel F. Louis bisi ngerikod lagu Angels ke dibai Robbie William ba Rok-Box Music Production. Iya nerima respons ke manah ari bala kaban belayan, pangan sereta iya ke enggau iya gawa sentang kualiti demo lagu nya. Lagu single ti keterubah dikeluarka Rok-Box Music Production nya dikumbai ‘The Promise’ lagu ke ditengkebangka iya empu ereta leka lagu nya ditulis tawing iya Ronney Bukong. Diatu iya benung ngasilka lagu single kedua iya ke benama ‘I Believe’. Lagu ke ditengkebangka Gabriel F. Louis tu balat bepelasarka ari runding penyanyi baka David Archuleta, Kris Allen enggau James Morrison.

Tuju ke ngenataika buah runding sentang penyelai video klip tu ukai ketegal deka meri iklan ngagai klip tu tang semina deka bekunsi penemu sentang bida video klip lagu Iban tu enti dibanding ke enggau lagu ti dibai penyanyi Iban bukai. Tu ukai reti sida ke bukai nadai manah tang nyangka kreativiti sida empai datai ba tikas ti ditunjukka penyanyi tu.

Nyadi ba buah kenang aku tu aku endang nadai nguji madahka video klip tu manah tauka enda laban manah ba penemu aku tu subjektif. Manah ku kitai nyangka enda manah ba orang bukai. Nya alai sama-sama mih kitai merati sereta menatika klip video tu sereta bela tau meri pejah seruri sentang video klip nya ari mayuh bengkah sukut.