Beri peluang awakka sistem tisih mujur dipejalaika

Pun kenang

Bedau lama tu tadi bisi seraban 210 bala pengajar dipanggil ngulu aum pasal pengawa nerangka sistem tisih ti deka dipejalaika ba ringkat sekondari baruh iya nya ba pom tiga taun 2014. Sida ti dipanggil ngulu aum tu ngarika 19 iti subjek ti bisi diajar ba pom tiga. Sida ke ngulu aum tu  lalu dichirika nyadi jurulatih utama kebangsaan (JUK). Pemulai sida ke pelilih menua diri sida dipinta matih raban pengajar ke bukai.

Batang kenang

Kohort keterubah ngena sistem tisih ti baru deka berengkah taun 2014 tu. Iya dikena ngantika peresa PMR. Sistem tisih belalauka sekula tauka dikumbai School Based Asssessment (SBA) dalam jaku English lalu dikumbai Pentaksiran Berasaskan Sekolah (PBS) dalam jaku Melayu nya patut bendar diterima enggau runding ti positif.

Suara Guru-Masyarakat Malaysia (SGMM), sebuah gerempung pengajar ti baru ditumbuhka enggau ngenyit madahka sekula perintah majak enda tentu nyukung Tisih Belalauka Sekula tu.

SGMM madahka raban pengajar ngasaika diri tusah bendar deka bejalaika SBA dikena nentuka pengulih nembiak. Sida balat agi rindu ke chara lama iya nya peresa dikena nentuka pengulih enggau pengelandik nembiak. Tu ngujungka mayuh sekula bejalaika dua chara nisih nembiak. 

Sekula nitihka gerempung tu, madahka semina ngudahka pengawa aja ngambika dipeda manah ba mata bala pemesai opis pelajar. Iya ti bendar sida agi ngemeranka chara lama iya nya peresa ti digaga sereta diatur sida empu.

Bejalaika sistem dua chara tisih tu ke ngujung raban pengajar balat bendar ngasaika diri napi mayuh pengawa. Sida ngulihka data ari peresa nya dikena sida nentuka pengulih enggau pengelandik nembiak awakka bala nembiak nya ulih diagih ba kelas ti betul.  Fakta ti madahka sekula ngemeranka dua sistem iya nya SBA enggau peresa patut bendar diperatika enggau serius ulih sida pemesai ba Opis Menteri Pelajar. Bisi tuduh penemu ti madahka bisi tiga opsyen ti tau dipilih sida Opis Menteri Pelajar.

Opsyen ti keterubah nya enggau chara nutup mata sepiak, awaka sida neruska SBA seraya ke  majakka pengawa peresa. 

Opsyen kedua nya ngangkatka menira burak lalu ngaku diri alah sereta narit pulai SBA tang neruska pengawa peresa.

Nyukung sistem sekula ngambika sida ulih berubah enggau semitan ngagai SBA, nya dikiraka opsyen ti ketiga.

Opsyen ti keterubah nyangka ulih ngelantangka ati orang mayuh ketegal mayuh pekara ti dikira ngenyamaika ati tang iya mega ngujungka nadai siku ila berasai lantang. Tambah mega opsyen ti baka nya nadai mai penguntung enti dikira dalam awak ti panjai. 

Opsyen ti kedua nya dikiraka ngelanggar prinsip ti deka ngemanahka sukut pelajar. Nya alai ari ketiga-tiga opsyen nya tadi nyangka opsyen ti ketiga nya mih tau dikiraka manah agi. 

Pekara ti patut nyadika buah kenang kitai nya tuju nisih nembiak?

Tim Oates ari Cambridge Assessment bisi udah tulihka 80 kebuah sistem sekula nisih nembiak.

Taja pia, ari ke mayuh-mayuh kebuah nya tadi semina dua kebuah ti berat iya nya ketegal formatif enggau summatif.

Tisih formatif nya dipejalaika dikena meri jaku lalau tauka feedback ngagai nembiak ngambika sida nemu bagi pekara ti ngasuh sida mujur sereta iya ti kurang lalu patut dipelajarka baru. Iya mega mantu pengajar merambu pelajar ngambika sida ulih ngelanggurka pekara ti deka diajar lalu ulih diterima mayuh macham nembiak. Tu dikumbai tisih dikena belajar tauka Assessment for Learning. Iya mega besai bendar reti dalam paradigma SBA.

Pemansik baka sida Robert Marzano, John Hattie, Paul Black enggau ke bukai meri tuduh penemu madahka Assessment for Learning tu pekara ti pemadu beguna dalam bidang pelajar. Narak nembiak ngambika sida meretika chara ngemanahka diri empu nengah chara meri sida jaku lalau ti terang sereta menyana udah ngasilka pemujur nembiak dalam pengawa belajar. Mayuh agi nembiak mujur nitihka ripot ketegal ari intervensyen ba sukut pelajar.

Nitihka pansik CfBT Education Malaysia ti bisi dikeluarka sida maya Ulang Taun Siri Pansik (Anniversary Research Series) ke 35 madahka jaku lalau tauka feedback ti manah sereta bekualiti balat agi beguna ari tulihka gred. Nembiak ti diberi komen lalu ukai skor tauka gred ba pengawa sida diperatika nemu agi. 

Penanggul beberika gred ba nembiak iya nya sida enda tentu nemu baka ni deka ngemansangka diri. Gred nadai nerangka pengulih sida. Lalu siti agi penanggul enggau peresa tu, iya nadai bisi kaul enggau mayuh bengkah pengelandik ti dikena sida napi dunya sepengudah abis besekula.  

Lalu ba tisih sumatif nya pengawa beberika setipikit ti disempulang enggau rintai gred  baka Ujian Pencapaian Sekolah Rendah (UPSR), Penilaian Menengah Rendah (PMR), Sijil Pelajaran Malaysia (SPM) enggau Sijil Tinggi Persekolahan Malaysia (STPM). Tu ulih dikena sida lebuh deka masuk universiti tauka lebuh minta pengawa.

Setipikit nyendiaka evidens ba pengulih sida macha enggau nulis, pengulih ngira matematik selama tauka iya ti mar sereta pengulih akademik ti bukai.

Tisih sumatif dipejalai nitihka atur maya ujung taun ketegal iya ngembuan stakes tinggi lalu meri empas ngagai pengulih nembiak ba sistem pelajar. Tisih tu dikumbai tisih senentang pelajar tauka Assessment of Learning. Nembiak ti ditisih udah sida tembu belajar lalu pekara ti udah diagih dipelajarka sida nitihka dalam turai pelajar nitihka sesebengkah subjek.

Nya alai ari dua pekara tu ulih diperatika tisih formatif nya utai ti dikedeka dikena nisih pengulih nembiak tang taja pia tusah dikulihka lalu tisih sumatif nya pengawa ti enda ulih dikenda tang patut dikena enggau bejimat sereta enda suah. 

Tiap iku nembiak  begunaka setipikit badu sekula tang sida semina patut nengah proses nya sekali aja – iya nya lebuh sida udah abis tauka tamat besekula. 

Isu ti ditapi Opis Menteri Pelajar urung taun 2009/10 nya peresa di sekula balat agi ngemeratka chara sumatif. Iya mega semina ngemeratka pengawa ngulihka gred ke UPSR, PMR enggau SPM. Nembiak semina diajar nyaut tanya ba keretas peresa ukai belajar ngulihka penemu.

Mayuh awak ti patut dikena ngajar nembiak ngulihka penemu baru dipenyatika bala pengajar enggau awak nyendiaka nembiak napi peresa. Lalu ba pengujung nya sida nembiak ke beumur 12 – 15 taun tu nerima slip keretas pemutus peresa jauh tumu ari ke patut maya sida ngalihka diri ngagai pelajar tinggi tauka bekereja. 

Nya alai, mayuh sistem pelajar ti mujur udah ngaga simpul penemu ti madah pengawa ti ngadaka peresa betukuh “high stakes” baka UPSR, PMR enggau SPM ulih meri empas ti enda manah ngagai pengulih nembiak. Iya ngujungka budaya ngajar nya semina ngemeratka kurikulum ti bisi ditanya ba peresa aja lalu pengajar semina ngajar ketegal peresa. Tiap-tiap episod peresa ti baka nya ngujungka mayuh utai tinggal enggau enda ditemu laban bala pengajar enggau nembiak semina kisuk ngirai diri napi peresa, belajar nyaut tanya ti ditaga bisi pansut ninting taun. Di Malaysia, peresa ti baka tu nitihka pansik ti udah dipejalaika udah ngujungka nembiak menua tu lenyau tiga taun maya belajar sida. Kiraka nadai utai kulih semina bulih gred aja, nadai nemu utai ti udah dipelajarka sida. 

Evidens nya mega madahka peresa enggau gred balat meri empas negatif ngagai nembiak sereta nadai meri sida peransang belajarka penemu baru. Sida belajar ketegal motivasyen ekstrinsik ke deka ngulihka gred lalu ukai ketegal motivasyen intrinsik ke deka ngulihka penemu. Iya disemaka baka pengawa ke meri gaji ngagai nembiak meresi bilik iya empu ari ke nembiak nya empu deka meresi bilik iya ketegal ke deka diau sereta ulih tinduk ba bilik ti beresi.

Belalauka mayuh evidens ti baka tu, dia nadai kebuah enda opis menteri aruh iya mejal sekula neruska SBA tu. 

Endang udah ditemu mega sekula sigi nyakal sistem tu laban ulah ke selama ti udah tebalan nya pedis deka diubah munyi ku jaku tuai English, “old habits die hard”. Raban pengajar Malaysia empu nya dih produk ari sistem belalauka peresa, pia mega enggau bala apai indai. Ngagai raban pengajar, ubah nuju SBA nya chukup ngerauka sida lalu ubah paradigma ti besai amai: ari Utara ke Selatan, ari Timur diatu ke Barat. 

  

Kunchi pemujur pengawa pejalaika SBA tu nengah chara ngubahka ulah tauka habit seraya maya ti sama mega sida raban pemesai ba opis menteri patut ngubah chara lama sida gawa.  

Simpul kenang

Enti nadai fokus ba pengawa ti digaga raban pengajar di kelas dia ubah kurikulum enggau tisih deka nadai tentu mai impak ti menyana. 
 

Ajar ti diulih ari pekara tu iya nya opis menteri enda ulih nganggap ubah sekali jalai tauka “one-shot reform” ulih mai pemujur. Pekara ti baka tu endang ngambi awak ti panjai dikena bala pengajar meretika sistem sereta ulih meda enggau terang pengawa ti diperambu nya endang pengawa ti manah. 

Chara mutarka pekara tu iya nya nengah ubah ke beseranyat lalu ukai utai ti patut dipejalaika enggau berumban sempama baka jaku tuai, rumban baban semalam di rantau jalai,  jamah lubah tumu datai. Dituduhka mega patut bisi gerempung komuniti belajar raban pengajar ngambika ulih betemu lalu berandau ke pekara ti meri fokus ngagai chara ngubahka ulah lama. 

Penyanding penemu

CfBT Education Malaysia

The Star, 2 February 2014