Jaku Iban badas memelan
nyampau dikenang
Ditiu Iban Lundu nyentuk ke
Limbang
Dikemesaika Iban Brunai ti
nurun mansang belelang
Dikemegahka Iban Sabah
nyadika lambang
Dikelala Iban Indonesia
nyentuk ke Empanang.
Jaku Iban mayuh bansa jaku
Jaku injau jaku iru
Jaku klasik jaku baru.
Jaku Iban anang diserarih
enggau jaku pinang sirih
Laban nya jaku dikena
besehari-sehari.
Jaku pinang sirih sebansa
jaku Iban
Dikena bala raban orang ulu
Disebut bansa Laut
Dikelala bansa China
Dipereti bansa Tambi.
Jaku injau jaku iru
Nadai salah diambi diempu
Dikena ngaya ngerajaka jaku
penemu.
Tang anang bangat kelalu udu
Enggaika ila nyau baka kara
Tau ngalahka kah galau
temesu
Meragai parai lalu merentum
nyadi punggu.
Nama penyadi enti padam sedu
Nesal dudi dini kala dulu.
Jaku serebareti patut
dikembuan anak Iban rebak dudi
Digaga nyadi diksionari
Enggaika iya ila danjan
ditabanka jeman
Midang ngelanggah bintang
Lesi ditabanka hari.
Jaku tuai jaku dalam
Mayuh pampang mayuh perugan.
Jaku kelaung enggau jaku
sempama
Jaku silup enggau jaku sema.
Enti kitai terunda-runda
Jaku Iban tau lela
Ilang midang
Nadaika malin pesindang
nyingkang.
Ukai Iban ngembuan nya
magang
Dibatak jalai pengidup ti
jauh amat udah berubah
Nunda rayah singkang
pemansang.
Leka main asal nyau enda
tentu dipelajar nembiak rebak dudi
Laban mayuh leman
pemerindang bukai nyadika ganti.
Timang enggau pengap majak
enda dikeingat
Laban bala lemambang mayuh
udah ruat
Tinggang urat sebangki api.
Ensera enggau pelandai nyau
jarang dikana
Laban anak Iban rindu agi
nunga komputer enggau tv.
Jaku dalam mayuh ngundan
penemu lama
Penemu ti ditinggalka sida
lemambang begeliga pala
Ke lama udah tejula dulu lela
Pampu bunsa ambun midang.
Penemu ke agi bisa pangka tajam
empa
Balat reda baka giling bena
segang pasang.
Jaku bebungai jaku bebuah
Manding didinga enti kena
pengengkah.
Tua ke nelah tampak kemerah
Orang ke ninga pan enda
mudah mantah
Penemu manah bunsu enda
seredah.
Nya alai
Dikelala bungai ari kayu
Dikelala buah ari langgu
Dikelala ulah ari penuyu
Dikelala perangai ari penau
Dikelala pengidup ari
pengelusu
Dikelala basa ari penyiru
Dikelala bansa ari jaku.
(Dibali ari Majalah Pegari
vol.52)
Tiada ulasan:
Catat Ulasan