Selfie, hashtag, tweet udah diterima tama dalam Kamus Dewan

Leka jaku ti popular tumbuh asil ari singkang pemansang teknologi. Nya alai, leka jaku baka 'selfie', 'hashtag' enggau 'tweet' deka nyadi sebagi ari leka jaku ti dipasuk ke dalam Kamus Dewan.

  

Tuai Pengarah Dewan Bahasa dan Pustaka (DBP) Datuk Dr Awang Sariyan madahka, iya setipak enggau tuju kamus iya nya ngerikodka guna leka jaku ti majak dikena dalam komuniti.

Taja pia, iya nerangka leka jaku nya deka diberi tanda 'bp' reti nya iya bahasa percakapan tauka jaku sebut ti dilabel ngagai leka jaku ti bedau diterima nyadi jaku standard.

"Penguna kamus patut macha ba bagi penulu ti nerangka enggau lenak jalai ngena kamus, nyengkaum bagi ti dilabel 'bp', ngambika nadai salah anggap ngumbai semua leka jaku ba dalam kamus nya jaku standard," pia ku iya madah ngagai pengarang berita Bernama.

          
Iya mega madahka leka jaku ti dipasukka dalam kamus nya mega bepelasarka penemu leksikografi tauka perkamusan ti ngemasukka kosa kata tauka leka jaku ti mayuh dikena lalu disempulangka enggau penenrang konteks iya baikka nya rasmi tauka ukai.
  
Leka jaku nya mega enda tak dipasukka seretai. Tang iya ke udah suah dikena nya deka dipasukka disempulangka enggau penerang tikas lalu deka direview raban pekamus laban bisi langkah rapat jalai ngemasukka sesebengkah leka jaku ke dalam kamus.

Awang mega ngarapka mensia mayuh enda beperagam negatif pengawa DBP ti ngemasukka mayuh jaku bukai  laban tuju kamus iya nya ngerikodka leka jaku ti seruran diguna mensia mayuh.

Leka jaku baka 'selfie' nya nerangka pengawa ti beambika gambar diri empu awakka ulih dipunggah niki ke laman sosial. Tu pengawa ti majak nyadi trend, nyengkaum raban bala tuai-tuai menua, sepengudah telefon binching pintar disikap enggau aplikasyen kamera.

'Hashtag' nya mai reti simbol # ti dikena raban penguna Twitter dikena nandaka jaku kunci tauka topik ti mayuh dikejakuka dikena ngemudahka pengawa penguna laman sosial nya begigaka pekara tu.

Guna leka jaku 'moden' nya mega dipasuk ke dalam sekeda kamus ti tebilang di dunya nyengkaum Kamus Oxford, ke alai 'selfie' nyadi leka jaku ti pengabis popular dalam taun 2013.

Kamus Merriam-Webster mega nambah leka jaku 'selfie, hashtag enggau Tweet' ti mandangka editor kamus nya, Peter Sokolowski dalam sebengkah randau enggau media apin lama ti udah. Iya madahka pekara tu nyadi empas ari pemansang teknologi dalam pengidup siku-siku.

         
Nyadi kebuah aku bekunsika penerang tu enggau bala pemacha ngambika kita sama nemu tuju kamus nya ngerikodka leka jaku ti suah dikena mensia mayuh lebuh berandau enggau pangan diri besehari-sehari. Kedua mega dikena aku ngingatka kitai mayuh leka jaku ti disimpan ba dalam kamus nya endang bisi kategori kediri empu. Leka jaku baka 'selfie', 'hashtag' enggau 'tweet' agi dikumbai jaku sebut lalu ukai jaku standard, anang kitai saru runding lebuh meda sekeda leka jaku nya bisi dipasukka dalam kamus. Jaku standard nya jaku ti sebaka chara nyebut enggau nyepil sereta iya ti udah diterima nyadi jaku ti dikena ba sekula tauka maya pengawa rasmi.