10 kebuah beer manah ke nuan

Panyun Jaku

Nyadi sekali tu aku datai baru deka ngenang siti agi pekara ngagai raban pemacha blog Tempalang Kenang tu. Pekara ti deka nyadika buah kenang sekali tu bisi kaul enggau pengerami gawai ti deka diintu raban bansa Iban enda lama agi. Kebuah ke ngenang pekara tu ukai reti iya pekara tu negatif ngagai budaya raban bansa Iban. Nyadi buah kenang ti deka dikenatai tu bisi kaul enggau ai irup iya nya ai beer. Kenang tu mega ukai kenang meransang raban bansa Iban ngemeranka budaya tu, nama agi enti bisi sekeda nya enda bepengerai sereta sida ke endang ukai pengirup alkohol.

Isi Kenang

Kenu ku artikel ke ditampung aku tu bisi 10 kebuah ai beer ukai utai ke jai enti sema iya diirup enggau jelan pemayuh. Munyi ke dikenang di atas tadi tu ukai meransang mensia mayuh ngirup kelebih agi sida ke agi biak umur enggau iya ke enda bepengerai. 

1. Pengirup Beer gayu agi

Ngirup enggau jelan pemayuh nya manah ke nuan. Pia mega beer nya manah diirup enggau jelan pemayuh. Nadai enda orang nemu enti ngirup kelalu mayuh nya sigi pekara ti enda manah. Ambika banding, enti nuan mabuk mayuh bendar pekara ke enda manah tau nyadi. Kelimpah ari mayuh jaku sereta tau jampat ngerijat, nuan nyangka kena riman ba rekung, bulih kanser ba empedu tauka mayuh penyakit bukai. Tang mayuh mega pansik kemaya hari tu ti madah enti nuan enda ngirup ai alkohol pan enda manah mega. Nitihka sekeda pansik bebas, orang ke ngirup ai beer enggau jelan pemayuh idup gayu agi ari orang ke pengirup tauka sida ke endang mentin diri ari ngirup. Beer tu manah enti enda diirup mayuh laban isi alkohol iya baruh agi sereta volium iya besai agi ari ai wain tauka spirit. Munyi ku jaku orang tuai ke radikal iya nya Thomas Jefferson madahka, “Beer, if drank with moderation, softens the temper, cheers the spirit, and promotes health.” Reti nya enti diirup enggau jelan pemayuh ulih ngurangka pemuras ati, meransangka semengat sereta mega pengerai. Iya ke bejaku utai ti baka tu nadai begunaka pelajar sains dikena iya nyukungka penemu tu.

2. Beer nadai dichampur enggau utai bukai

Bisi orang ke madahka diri nemu semua utai deka madahka beer nya dichampur enggau mayuh kereban pemakai tambah ( additives) sereta kereban kena ngetanka pemakai ngambika tan disimpan lama (preservatives). Tang iya ke bendar beer nya pan baka ai jus oren tauka tusu.  Beer enda begunaka preservatives laban iya bisi ngundan alkohol enggau hops. Kedua-dua tu keraban natural kena ngetan pemakai ari jampat jai. Beer semina dikumbai “diproses” lebuh ruti ti dikena ngaga nya dipanduk, dikasam, dipantis sereta ditungkus. Proses tu sama enggau beer Heineken.

3. Beer baruh kalori, baruh karbohidrat sereta nadai minyak tauka kolesterol

Ai beer tu ngundan kalori ti baruh amat enti dibanding enggau ai bukai. 12 ounces Guinness sama mayuh kalori iya nya 12 ounces tusu ke mimit minyak: iya nya kira-kira 125. Tu reti iya kurang agi ari jus oren (150 kalori), ti kira-kira sama standard enggau “full-calorie” beer. Enti beer nya semina pun penatai nutrien, nuan patut ngirup sekali nitihka pemendar penyampau  kalori sehari (2,000 to 2,500). Taja pia nadai bisi orang ngasuh nuan ngirup nyampau nya. Ai natural ke bukai ke mimit kalori ti sebaka enggau beer nya baka teh, kupi chelum enggai ai amai. Tentu nuan ngumbai beer nya mayuh ngundan karbohidrat. Enda pia? Salah baru mega penemu nya. Pukul rata beer bisi ngundan kira-kira 12 grams karbohidrat (carbs) dalam 12-ounce ai. Nitihka pemendar ari The U.S. Recommended Daily Allowance madahka bisi 300 grams karbohidrat dalam standard 2,000-kalori diet. Reti nya nya, nuan patut ngirup 24 tin tauka sekes beer – lalu ditangkan enggau kes kedua – nitihka dilalauka perintah senentang penyampau karbohidrat ti patut diambi. Enti baka ba penemu sekeda orang, nya manah agi nuan makai epal tauka ngirup ai soda pop enti sema nuan bangat deka nambahka penyampau karbohidrat. Tiap-tiap igi epal tauka ai soda nya ngundan 35 ngagai 40 grams karbohidrat – reti nya tiga kali mayuh agi ari iya ke dalam beer. Nambahka nya mega, beer nadai ngundan minyak tauka kolesterol.

4. Beer ngurangka kolesterol

Beer ukai semina nadai ngundan kolesterol, tang iya mega tauka ngurang tauka ngemanah kolesterol dalam tubuh. Enti nunda iya ke amat madahka beer enti diirup suah sereta dalam penyampau ti jelan ulih nimbangka penyampau HDL/LDL ratio kolesterol. Dalam tubuh kitai bisi dua bansa kolesterol: iya nya HDL, kolesterol ti “manah” ti ngelancharka pejalai darah lalu siti agi nya LDL, kolesterol “jai” ti tau ngasuh buluh darah kitai nya sebat. Nyadi beer tu mih ke  neruju pejalai darah dalam sistem lalu ngangkatka tikas HDL. Nitihka sekeda pelajar, ngirup setin beer sehari ulih ngangkatka  tikas HDL nuan ngagai 4 persin.

5. Beer ngasuh nuan chelap

Ari sukut aspek sosial ngirup beer enggau jelan pemayuh nya manah ke pengereai nuan. Reti nya iya tau dikena ngerapitka kaul enggau bala kaban belayan tauka pangan sambil ngirup beer.

6. Beer ngundan mayuh vitamin B

Beer, kelebih agi ti enda dipantis tauka iya ke kurang dipantis nya balat manah agi taja pan fakta nya balat disakalka raban orang ke enda ngirup arak. Beer bisi ngundan tikas vitamin B ti tinggi kelebih agi asid folik ti tau mantu ngetanka diri ari diserang penyakit tungkul atau.  Beer mega ngundan fiber ti belai, manah ngasuh nuan gerai baka selama ke tau ngujungka sistem dalam tubuh ulih nyerap utai jai baka gemu. Beer mega bisi ngundan zat besi baka magnesium enggau potassium, nyangka nuan bisi perambu deka ngasuh perut nuan baka besi, nadai salah mega enti deka ngirup ai beer.

7. Beer likun agi ari ai amat

Enti nuan bisi ba endur ti dilalau orang enda tau ngirup ai sebarang dia ai beer ti bisi dia kiraka likun agi diirup. Iya mega manah agi ari ai amat dalam botol. Kebuah pia, dalam proses ngaga beer, ai nya dipanduk sereta mesti beresi sebedau disimpan dalam botol lalu ditejal enggau penutup laban enti iya bari tauka jai iya tentu tusah deka dijual. Enti iya jai pan iya enda tentu nganu laban bakteria ti bisi ba dalam ai beer nya ti dikumbai pathogens ulih idup dalam ai beer lalu iya enda nganu tubuh orang ke ngirup ai nya. Nya nama agi dianti dih? Irup dia mih – indah ai beer ke jai nya likun agi ari ai amat.

8. Beer nagang serang penyakit tungkul atau

Enti nuan dekaka vitamin ti semitan agi dia ai beer tu mih manah ke nuan. Enti ngelama tu dipelabaka sekeda ari kitai kala ninga  pengawa ke dikumbai the French Paradox. Tu pengawa orang Peranchis bepakaika pemakai ke tinggi diet ti ngundan gemu lalu ngirup diet ke tinggi meransang lalu nginsap ruku kambing bebulu tang taja baka nya sida nya ke mayuh ngidap penyakit tungkul atau, iya nya kira-kira satu per tiga ari penyampau orang di dunya.  Ai ti dikumbai sida ti ngundan antioxidants balat agi datai ari ai wain mirah. Bah, ba penemu nuan ni ai bukai ti baka wain mirah ke ngembuan mayuh antioxidants? Beer chelum! Nitihka pansik Gerempung Tungkul Atau America (American Heart Association) madahka “nadai eviden ti madahka wain nya manah agi ari ai alkohol ti bukai.” Siti pelajar dalam Journal Pengerai British (British Medical Journal in 1999 ) madahka sapa ke ngirup tiga kali sehari deka ngurangka diri ari risiko penyakit tungkul atau, iya nya kira-kira 24.7 persin.

9. Ai beer ulih dikena ngelaban penyakit riman

Utai ke nyelai senentang ai beer sereta kaul iya enggau pengerai nya bisi utai ti dikumbai  xanthohumol, iya nya flavonoid ti semina bisi ba hops. Xanthohumol tu potent antioxidant nagang enzim ti ngasuh riman, “manah agi ari komponen besai ba soya,” nitihka penemu Dr. Cristobal Miranda ari Department of Environmental and Molecular Toxicology di Oregon State University. Xanthohumol tu manah ke nuan nya alai orang Jermans lebuh ngaga beer bisi nambah mayuh agi dalam ai nya.

10. Beer enda ngasuh perut nuan bunchit

Pansik ti dipejalaika raban pemansik ari University College of London enggau the Institut Klinicke a Experimentalni Mediciny di Prague dalam taun 2003 madahka nadai kaul entara penyampau ai beer ke diirup enggau saiz pemabuk sida. “Endang bisi penemu ti madahka pengirup beer (beer drinkers) pukul rata iya balat ‘obese’ ari sida ke enda ngirup tauka sida ke semina ngirup wain tauka spirits,” pia ku raban pemansik nya. Tang nitihka pansik sida kaul entara ai beer enggau obesiti, enti bisi nyangka enda besai. Mayuh pansik madahka orang ke seruran ngirup ai beer (enggau ke jelan) nadai bunchit perut. Sida pan kurang agi pemerat enti dibanding enggau sida ke endang enda ngirup. Engka amat, enti aku meda tawing aku Timothy Salang. Beer mega ulih ngangkatka metabolisma kitai lalu mantu tubuh kitai ari nyerap gemu sereta ngujungka kitai bepengerai agi. Tang anang enda ingat jaku lalau orang ke tuai enti ngirup anang sampai mabuk, irup mih enggau jelan pemayuh ngambika nyadi siti ari program pengerai diet kitai.

Simpul Kenang

Bah nama agi dianti kaban? Irup mih ai beer. Nuan tau gayu sereta lantang agi ari selama. Nuan nadai deka gemu, nyangka tau kurus agi ari selama. Metabolisma nuan mega tau betambah manah agi pia mega enggau pengerai nuan. Iya mega tau ngurang buluh darah nuan sebat sereta diserang penyakit tungkul atau tauka riman. Nama agi ke dekaka nuan? Selamat ngirup beer sereta selamat ngintu Hari Gawai Dayak.