Ni kita Iban ke begelar pengajar
Kita chegu ke dipadu neresa menua enggau pasar
Uji angkatka adat cherita lama
Enggi sida aki kitai ke udah rimpi jeman kelia
Cherita sida ke udah parai nyadi telesai ambun lela
Ngambika bisi dikeingatka sida ke biak dudi ila
Bisi ditesa enggau unga dabung jarang.
Ni kita selantang chegu baru
Kita ke udah dichiri Guru jeman diatu
Uji angkatka cherita kitai empu
Enggi sida aki kitai ke udah rimpi laya tekeju
Enggi sida ke udah parai ditinggang kesai rau nyagu
Ngambika bisi dikeingatka sida nembiak rebak baru
Awakka penemu kitai empu enda tekebu laya midang.
Ni kita guru ke disagu megai amanah
Kita chegu ke dichiri ngangkat maruah
Uji kitai sama-sama ngangkatka adat cherita rumah
Enggi sida aki kitai ke udah rimpi laya tasah
Enggi sida ke udah lama lela nemuai ke tanah
Ngambika bisi dikeingatka sida nembiak ke benung lelejah
Dikena sida bungah bekelakar enggau orang.
Ni kita pengajar ke begelar tampuk pemandai
Kita teacher dalam jaku Europa ke dibasa pemadu besai
Uji kitai ngangkatka adat cherita tuai
Ayanka macham leman main kitai
Enggi sida aki ke udah rimpi laya sulai
Ngambika bisi ke penemu nembiak kitai
Nyadika pesaka sida selantang anak dara
Bisi dibantai ditengah ruai lebuh maya gawai
Ni kita selantang pengajar sidi
Ti endang mutus ati berani kempang
Uji batak bala nembiak belajarka urat cherita nyadi
Enggi sida aki kitai ke udah rimpi laya bebadi
Enggi sida aya ke udah lama midang dipangka gumbang begilik segi
Ngambika bisi ke penemu nembiak rebak dudi
Awakka ngelala pengawa sida ke udah lama lesi
Muka kunchi tanah lang.
Nya alai anang malu anang rawan mih kita pengajar Iban
Anang enda ingatka adat macham leman
Enggi sida aki kitai ke udah rimpi laya danjan
Kala diatu agi bisi awak bisi jam.
Anang enggai betanya ngagai sida mengua karung menyimpan
Takutka ila adat kitai lesap laya serepan
Nyelikap singka miga besuran
Enggaika adat tuai dibai parai
Tama mandai menua sebayan.
Kitai mega anang enda ingat
Sekayu awak Sarawak renjan
Aki ini kitai menya berimba utan
Berambunka nyawa pangka kabut siang malam
Ukai nya semina naka nya utai ke senika macham leman
Bisi maya sida kena empaska mayas remaung dan
Kala mega sida ditegah indu baya meram
Tang ati enggi sida endang mutus tajam
Neranting urat liat ari lipat wi danan
Napi peluru meriam leka senapang.
Nya alai bala pengajar mayuh
Patut bendar kita nanka penemu ke menuku pungka dalam
Nya mih nyadika kuta tegap chukup pengetan
Pasukka penemu dalam bup mayuh macham
Nyadika kereban pelajar bejeman-jeman
Nya baru ati kitai entap enda kelabawan.
Baka nya mega pengajar mayuh
Adat enggi kitai asuh tegap nyerupa meruan
Jaku enggi kitai asuh tembu sereta engkeman
Nya baru tanda enggi kitai nyengala
Bisi kelai meruan tegeran
Dunya global ngelala bansa Iban
Megai tambai tampuk pemansang
Nya baru semua bansa beansak-ansak
Ngiga awak ngambi kitai nyadika pangan
Keba kitai diangkat enggau martabat
Meruan pengarap tebalan Wawasan.
Tiada ulasan:
Catat Ulasan