Tulis kitai empu nyeremin watak kitai ke nulis

KEMAYA HARI TU, kitai suah meda aba media sosial baka Facebook enggau Twitter ti diguna nyadika senyata dikena mejah tauka ngelabuhka individu bukai.  Media sosial tu ukai semina digaga individu selama tauka orang biasa aja tang mega nyadi ba raban selebriti tauka individu ke bisi kuasa dalam komuniti baka sida raban politik. Raban pengarap mega sama bela nerima nasit ti sama tekena empias serang jaku jai orang. Tang enti diperatika penulis jaku jai ba laman sosial tu ke bendar nya ke ngemaluka diri sida empu, baka sempama jaku tuai nanam tebu batu meri malu mua aku, nanam tebu ai meri malu mua diri.

Dalam bidang psikologi, personaliti mensia nya empu diperati ari sukut pekara ti pugu iya nya semina baka tuping tauka karung mua aja. Tiap-tiap iku kitai ulih ngembuan ulah ke bida-bida nitihka konteks, maya enggau ba endur sesebengkah pekara ti nyadi. Ambika banding, siku-siku orang nya ulih ngeluluka watak baka mensia ke dipebasaka lebuh ngulai orang bukai dalam komuniti. Tang maya bukai iya nyangka lalu ngelulu nyadi mensia bukai dalam realiti pengidup iya besehari-sehari. Reti nya, mensia ulih ngatur ulah enggau watak sida. 

Tu mih ti diperatika dalam pansik tearoom sex ti dipejalaika Laud Humphreys dalam taun 1970. Pansik tu mandangka chara raban homoseksual ulih betukar nyadi individu bukai dalam diri sebilik enggau ba raban komuniti. Tang sida tu ulih mali nyadi raban ke enda bemoral lebuh sida begulai enggau pangan diri ke sama status.

Taja pan baka nya, penatai mayuh bengkah medium laman sosial kemaya hari tu ngujungka mensia bisi maya iya enda ingat sida nya ke bendar mantaika pemalu diri empu. Pekara tu ulih diperatika lebuh sida nulis sesebengkah utai ke enda engkeman ba endur ke patut nengah laman Facebook tauka Twitter. Pekara baka nya mega seruran dikereja sida ke dikelala mensia mayuh baka sida selebriti.

Taka

Ambika chunto, siku selebriti ke munggah niki status laman sosial ti bisi elemen ngeluji, iya nya lebuh iya nguji deka ngaitka pengelenyau bilun MH370. Ba penemu iya nya nyangka semina dikena betundi aja. Tang iya mega tau nyimaka ati orang bukai ke macha nya.

Empai lama, bisi mega siku raban politik meri komen negatif senentang pemarai siku raban politik ukai Islam ba laman Facebook. Komen nya engka ditulis pemantu iya. Iya pan engka nadai beniat jai lebuh ke mantaika jaku nya. Tang kepengujung iya, mensia mayuh ti macha nama-nama ti ditulis enda nemu sekalika penulis nya ngembuan reti ti besilup tauka enda. Nya alai tiap- tiap individu patut bejimat sebedau nulis sesebengkah pekara aba laman sosial.

Ba pengidup mensia nya empu bisi dua terminologi ke berat ti nyerita senentang diri kitai empu iya nya public self enggau private self. Public self nya baka maya kitai patut akur lalu nitihka norma sesebengkah komuniti. Ambika banding, maya ngabang ngagai pengerami melah pinang, kitai patut begari ngena ngepan ke engkeman enggau pengerami nya. Kitai mega patut bejimat lebuh berandau enggau orang bukai ngambika sama nyaga ati enggau asai ati pangan diri. 

Tang enti di rumah, kitai engka pulai ngagai private self ti mandangka ulah kitai ke amat-amat.  Tu ukai reti mensia nya 'pelakon', tang nya mih realiti pengidup kita nyadi mensia.

Taja pia bisi maya lebuh nulis sesebengkah pekara sekalika nya aba Facebook tauka Twitter, kitai engka enda ingatka diri benung ba dalam bungkur public self. Amat mih ke bendar nya, penulis benung kediri-diri nulis ari dalam bilik ti sunyi. Nambahka nya bungkur public self nyadi besai agi ari disangkaka kitai lebuh nulis sesebengkah pekara. Utai ti ditulis kitai nya engka dibacha bepuluh ribu orang bukai. Nambahka nya mega nyangka bisi sekeda ke macha nya sida ke enda ngelala private self kitai ke bendar.

Positif

Sida nyangka ukai macha utai ti dituliska kitai tang benung macha watak kitai ke bendar. Taja pan sida engka meri komen positif sentang utai ke ditulis kitai, tang maya ti sama sida mega benung meratika penyai kitai. Nya alai anang sekali-kali meri malu diri empu nengah pekara ke ditulis kitai laban iya tau meri empas negatif ngagai kitai empu.

Taja pan kitai engka beniat manah tauka nyangka enda ngembuan tuju ti deka ngelanyaika orang bukai, tang ujung-ujung tiap-tiap utai ke ditulis kitai nya deka dibacha belalauka pemereti ati mensia. Iya bepanggai ba sapa ke macha nya, lalu baka ni iya meretika utai ti ditulis kitai nya.

Pesan orang tuai Melayu kala nyebut, cakap siang pandang-pandang, cakap malam dengar-dengar nyangka enda selalu iya engkeman dalam konteks pengidup mensia mayuh kemaya hari tu. Tang taja pan baka nya, iya tetap engkeman lebuh kitai berengkah ngeregister tama laman Facebook tauka Twitter lalu beniat deka nulis sesebengkah pekara.

Kitai engka enda ngelanyaika orang bukai, tang iya ti bendar nya utai ti ditulis kitai nya benung muka watak kitai empu ngagai orang bukai. Kitai ulih bejaku sebarang pekara ke deka kitai baka ba kedai kopi. Tang ke bendar kitai enda ulih nulis utai sengapa-kada ba laman sosial laban iya semina deka nyeritaka ulah kitai nya ba mata orang ke macha. Nya alai ingatka pesan orang tuai anang nanam tebu batu enggaika ngemalu mua diri empu lalu anang nanam tebu ai enggaika ngemalu mua diri.