NGELAMA tu, penanggul
ti bekaul enggau telefon pintar tauka tablet suah agi dikaitka enggau pengerai
mata tauka urat.
Pansik ti baru
sekali tu madahka orang ke suah ngena gajet pintar maya malam ulih ngasuh berat
tubuh sida nambah.
Bepelasarka
pansik di Amerika Syarikat madahka gajet pintar seruran iya ngeluarka panchar api
biru ti tau ngasuh orang berasai lapar. Panchar api biru ari telefon pintar sepengelama
beberapa jam deka ngasuh kitai ke ngena gajet nya berasai lapar taja pan udah
makai.
Panchar api tu ngenataika
empas sepengudah 15 minit ngena gajet pintar nya. Pansik sebedau tu madahka
panchar api biru ari telefon pintar ulih ngurangka maya tinduk lalu tau ngasuh
orang nya berisiko enggai tinduk tauka insomnia.
Pansik ti baru
dipejalaika raban pemansik ari Universiti Northwestern di Chicago, Amerika
Syarikat madahka panchar api biru ari telefon pintar sepengelama tiga jam tau
ngasuh orang ke ngena gajet tu berasai lapar sereta tau ngachau metabolisme individu
nya.
Nitihka padah tuai
pemansik, Ivy Cheung, asil pansik nya diambi sepengudah bejalaika pansik ngagai
10 iku orang tuai ti ngembuan pola tinduk normal sereta pola makai ke sama. Dalam
pansik tu responden dipinta nguji sepengelama empat hari enggau panchar api biru
ari telefon pintar. Pansik nya dipejalaika dikena nentuka mekanisme ti silik
senentang panchar api, asai lapar enggau metabolisme tubuh.
Tiada ulasan:
Catat Ulasan