Belajarka jaku baru ulih ngelubahka penuai untak

Belajar lebih ari siti jaku endang udah lama nyadika isu politik kelebih agi ba Amerika Syarikat. Pengawa belajar lebih ari siti jaku tu kala ditagang dipejalaika ba California dalam taun 1998 tang diatu Senate menua nya minta bala pengundi nginsilka atur nya.

Lengkaka kitai sesempa leka pinang pasal hal politik tu lalu merati iya ke nyadi kemaya hari tu. Kemaya hari tu udah mayuh sukung saintifik ti madahka penguntung nemu ngena dua bansa jaku.

Nitihka pelajar baru ti dikeluarka the Annals of Neurology madahka kitai enda ibuh kiruh deka belajarka dua tauka tiga bansa jaku bukai maya agi biak. Kebuah pia laban belajarka jaku baru lebuh umur udah manggai tuai bisi mai penguntung kognitif ngagai untak kitai ke udah tuai. Penerang tu ukai nagang kitai belajarka lebih ari dua bansa jaku lebuh ba sekula tang lebih ngagai sida ke enda sempat belajarka jaku bansa bukai maya sida agi biak.

Mayuh pansik baru kemaya hari tu madahka ngembuan dua bansa jaku tauka bilingualisma nya senaman ke manah ngagai untak lalu tau ngelubahka penyakit dementia. Dementia nya sebansa penyakit ti bisi kaul enggau daya ngingatka utai. Penyakit tu ketegal ari pemati sel-sel untak nengah chara ke abnormal. 

Pemansik ari University of Edinburgh di Scotland bisi mansik 853 iku orang ti keterubah iya ngambi  test intelligence dalam taun 1947 lebuh sida berumur 11 taun dalam raban ti dikumbai the Lothian Birth Cohort 1936. Udah nya sida tu diujika baru urung taun entara 2008 ngagai 2010 lebuh umur sida udah manggai 70 taun.

Nitihka pansik, sida kohort tu enda sebaka enggau pangan diri ari sukut jaku iya nya jaku asal sida English, bansa sida mega orang English sereta besai ba genturung pendiau ti sama, iya nya di Edinburgh Nadai siku ari sida tu orang kampar. Pansik tu dikira manah laban iya ulih nyeliahka pemida entara bansa enggau status immigrasyen ti tau ngeruga kaul entara pengurang penemu bilingualisma enggau kognitif. 

Sepenyampau 262 iku orang tuai diripotka bisi belajar lebih ari siti bansa jaku kelimpah ari English.  Ari penyampau nya, 195 iku madahka diri udah belajar sebedau umur sida 18 taun; 65 iku madahka sida belajar udah umur nya. (Bisi pekara ke enda terang sentang dua iku ke bukai lalu bisi sekeda nya belajarka jaku kedua maya agi mit: 19 iku nya baruh umur 18 lalu madahka sida belajar maya umur 11 taun.)

Pemansik meri peresa kognitif, ti nyengkaum meri kebuah chara verbal (verbal reasoning), vocabulary enggau pengelandik macha, pengelandik bejaku sereta enggau pengelandik meroses penerang enggau jampat.

Nitihka pansik, sida ke bilingual tu mandangka pengelandik manah ari ke disangka bepelasarka ari pengelandik baseline kognitif sida kelebih agi ba sukut macha enggau pemintar rama (general intelligence). Sida ke nemu lebih ari tiga bansa jaku mega dipeda landik agi. 

Empas ari bilingualisma tu ulih dibanding enggau empas ari gene apolipoprotein E ke lain, penegap fizikal sereta pengawa ke enda nginsap ruku.

Belajarka jaku bisi mai pemida ngagai pengidup orang ke udah tuai kelebih agi ari sukut kognitif laban gene ti bisi kaul enggau penyakit Alzheimer enggau ulah orang nginsap enggau ke enda nginsap. Bala ke dipansik tu belajar bansa jaku ti kedua udah sida berumur 11 taun. Nya alai raban pemansik enda tentu ulih mansik enggau nemban maya sida teulihka pengelandik bejaku kedua-dua bansa jaku nya. Tu dikumbai sida senario  “classical”.

Tang taja baka nya, iya mai pemutus ti naritka ati laban kitai enda ibuh landik bejaku dikena ngulihka penguntung laban pekara tu ulih dikerejaka kitai maya udah tuai. Bejuta-juta orang ba serata dunya belajarka jaku kedua lebuh udah lunggar umur sekalika nya ba sekula, universiti, maya bekereja, maya mindah ke menua bukai tauka maya jadi enggau orang ari komuniti linguistik ke bukai. Taja pan baka nya nitihka pansik tu madahka sida tu nadai datai ba pengelanchar bejaku baka orang empu nya.

Ngagai sida tu, pemansik nya madahka pemutus pansik sida nya relevan; bilingualisma enti diperatika ari penerang ti luas taja pan dipelajar maya udah besai tuai bisi mai penguntung ngagai sukut kognitif. 

Nya alai nyangka tu mih maya ti engkeman alai kitai sebuat ke tuai ngebakka bup teks jaku Spanish tauka mumpuk mendingka CD audio Mandarin lalu berengkah belajarka jaku baru.

Penyanding Penemu:
Los Angeles Times/MCT Information Services