6 dalih Malaysia enda ulih enggau masuk pekit berebutka Mangkuk Dunya

Diatu musin mensia mayuh bejakuka pekara pasal pekit main bol berebutka Mangkuk Dunya. Ninting malam orang ke endang rinduka main tu sanggup buntau ketegal deka meda main bol tu ke berengkah ari jam pukul 12 tengah malam nyentuk ke 6 pagi. Aku pan pia mega enggai enda enggau orang ngeruh ai meda team ti tebilang bemain tang ketegal ke enda tan bisi maya nya televisyen ke meda aku gali gegaring ba sofa. 

Tang ke sekali tu aku deka ngenangka pasal team menua Malaysia, team kitai mih nya. Ba penemu aku tu kiraka jaku bungah semadai nadai kereja, bisi enam kebuah Malaysia enda ulih enggau masuk pekit main bol ba tikas dunya. Anang ringat enti kita nya sigi rinduka team Malaysia laban tu ukai utai serius.

6. Kitai semina manah ba main ke diarika sekeda tauka setengah lunsin menua aja. 

Dua bengkah main ti mai menua Malaysia tu kuat ba tikas antarabansa nya semina main badminton enggau squash. Ba badminton semina Malaysia, Indonesia enggau China aja kuat sereta kala menang. Indah nya pan, kitai alah ngagai Jipun ba final Mangkuk  Thomas 2014! Ba main squash mega sama. Semina sekeda menua aja ke kuat sereta kala menang, mayuh agi ari badminton. Kiraka pama mimit. Tang agi mih…

Main enggau lumba ti amat-amat antarabansa sereta dimain enggau regas amat ulih tiap-tiap menua ke enggau nya baka main bol. Tang Malaysia taja pan bisi enggau ngeruh ai, dikira jauh amat ba baruh ranking. Baka nya mega main tennis, golf, hockey, etb.

5. Kitai kurang pengelandik main bol.

Nadai ngawa mih enti main bol nya dikiraka main ti pengabis popular ba menua kitai. Tang anang enda bediri ba tanah, peratika mih realiti. Orang Malaysia sigi enda nemu bemain bol. Main dalam team kitai enda nemu, nama agi enti dikira siku-siku, sigi nadai skil individu. Individu ke kala dieksportka kitai dalam timpuh lima taun nya sigi bisi, iya nya ngagai liga Indonesia. Nya pan ukai liga ke pengabis manah ba dunya. Amai enda? Munyi ku apai aku, indah bemain enggau team ari menua Vietnam pan kitai alah. Menua ke nyau deka semua orang ke manah abis mati ketegal perang, tinggal ke enda berapa aja agi idup. Nya pan Malaysia enda ulih menang!

4. Kelingai nya haram wai

Baka ni pemain bol kitai ulih nyadi pemain ke landik enti sida nadai bepantang? Munyi ke palui mega tanya baka tu. Kati ku enda dih? Semua pemain bol ke pandai aba dunya tu semua iya ke bisi bepantak aba tubuh sida. Enti kitai ngumbai aku bula, uji perati kita David Beckham, Christiano Ronaldo, Neymar Jr, Sergio Ramos, Fernando Torres, Nigel De Jong, Lukas Podolski, Lionel Messi, Luis Suarez, Daniel Agger, Martin Skrtel… nya ney, empai abis rintai nama nya. Bah pemain bol Malaysia bisi kini?.

3. Ngena bikini nya haram

Ukai pia. Ukai reti iya pemain bol Malaysi mesti ngena bikini! Enti deka nyadi pemain bol ke sikar sereta pandai, sida patut bisi ambai ke seksi bekenaka baka ke digambarka bala paparazzi ba tebing tasik Spain, Greece tauka France. Ba Malaysia nadai jaku nya. Iya ke kala ngerimbas pending nya pasal pemain bol Malaysia ke ditangkap sida pengarang berita pasal pesan WeChat ke deka minta nyium indu. Es, buring mai berita baka nya.

2. Kitai enda sanggup ninggalka bidang akademik

Enti nuan kala ninga jerita pasal pemain top dunya nyau deka labuh ai mata, enti nyabak nyau sikuk-sikuk ukai seikuk-seikuk (anang salah sepil). Ukai nama, jerita penusah sereta pengeliat ati sida ke deka bemain bol ari umur sida agi bedau biak, lalu sida sanggup ngaga nama-nama utai ketegal ke deka nyadi pemain professional. Sida sanggup masuk kem pematih main bol sereta sanggup diuji sebedau masuk progrem kelab latih junior.

Ketegal nya sida sanggup ninggalka sekula. Anang nyebut ngagai universiti. Antara idup enggau mati, antara mujur tauka enda. Tang sida endang sanggup betunggang lupung ngambika sida mujur.  Ba Malaysia lain. Kitai enda ngembuan semengat ke baka nya. Enti ba Malaysia, pemain bol ba liga Malaysia, kurang-kurang iya diambi nyadi kerani besereta enggau upah EPF dibayar kompeni ke ngempu team nya udah ke pinchin ari bemain bol.

1. Ridhuan Tee Abdullah

Minta ampun ari punjung pala ngagai ujung kaki. Enda ulih enda mega disebut ga uchak tu nyadika dalih team Malaysia enda ulih enggau masuk pekit main bol berebutka Mangkuk Dunya. Ukai nama nyau marit nama iya laban tudah ajuh tu balat bendar meri jaku ke rasis. Enti aba penemu iya semina siti bansa siti pengarap aja tau bemain enggau team Malaysia. Indah penyukung bansa China ke nyukung team badminton Malaysia pan dikumbai iya enda amai nyukung Malaysia tang ketegal bisi orang China dalam team Malaysia. Baka ni main enggau lumba kitai ulih maju enti bisi orang ke rasis baka ajuh tu! Hahaha nadai salah enti semua pengurang ke nyadi kemaya hari tu sigi ketegal orang baka ajuh tu. 

Penutup

Bah ni ku kita mih meri penyimpul sentang pekara di atas. Mupuk dulu aku.