Budaya ngintu enggau nyaga agi kurang

Siti ari isu ke mayuh nyadika buah kenang mensia mayuh iya nya jalai dikena ngemansangka budaya ngintu enggau nyaga ti kering ba Malaysia ngambika tau nyadika pengelikun enggau pengelantang rayat.

Kitai sama bela nemu Malaysia tu menua ti tebilang ketegal ngembuan infrastruktur betikas dunya tang iya enda setiak enggau pengawa ke ngintu sereta nyaga infrastruktur nya. Berita pasal tiang ke tumbang, siling ba rumah perintah ti baru enggau stadium runtuh agi mengkang baru ba pengingat kitai semua. Penanggul ti baka tu balat bendar meri malu sereta tusah deka dilakka pia aja.

Rumah rama enggau infrstruktur ti enda diintu enggau menyana tauka ngujungka pemedis ngagai mensia mayuh ke ngena perengkaguna ke bisi disediaka perintah. Agu rama ti enda dijaga sereta diperesika tau bendar ngenusahka mensia mayuh. Baka nya mega palan alai nembiak bemain ti enda diintu enggau manah tau ngujungka pemedis baka bakal ngagai nembiak ti bemain ba endur nya. Jalai enggau parit ti enda dipelasi tau bendar ngasuh ampuh bah.

Lubang ba jalai raya tau bendar ngenusahka sida ke ngena motosikal. Kayu ti enda ditutuh  sereta daun ke

enda dibuai tau ngelindungka papan tanda sepemanjai jalai raya, jalai besai, jalai alun baik nya ba jalai federal, nengeri enggau pasar. Iya ukai semina mai penanggul ngagai penguna jalai tang mega tau mai penusah ngagai pengelikun ba jalai.

Semua pekara tu mandangka tabiat enggau ulah rayat Malaysia ke bendar. Iya dipeda ari sukut kualiti kereja, chara bejalaika pengawa, pengelemi dalam ngaturka pengawa, kurang daya ngintu enggau nyaga sereta pengurang dalam mayuh etika.

Utai ke dikenang ukai semina pekara ti bekaul enggau etika tang mega isu ti bisi bekait enggau pengelikun sereta pengerai ba palan alai gawa. Penusah langkar rumah ke seruran runtuh patut diberi perati enggau serius. Udah datai ba timpuh maya tiap-tiap iku kitai patut nagang ulah pemalas nyadika pugu ulah mensia mayuh.

Berita ti selalu nyebut Malaysia tu menua ke ngembuan infrastruktur kelas satu tang ngemeranka mentaliti kelas ketiga endang bisi pengamat lebuh kitai bekenangka pengawa ngintu enggau nyaga reta tengkira rama. Pengawa ngintu enggau servis nadai kala nyadika batang pekara ti dikemeratka menua tu. Kitai endang selama jaga nyendiaka rumah enggau perengka guna ti chukup manah tang lebuh datai maya ngintu sereta meri servis dia kitai enda tentu ibuh.

Semua autoriti enggau tiap-tiap iku rayat Malaysia patut ngemeranka budaya ngintu enggau nyaga reta rama mensia mayuh lalu ngambu iya nyadi siti ari gaya idup kitai. Menteri Besai kitai enda putus-putus besebutka program transformasyen iya. Tang taja pan pia kitai lalu bedau meda asil ari transformasyen nya nyengala nyadi kelebih agi lebuh kitai bekenangka  budaya ngintu enggau nyaga ti patut dikemeranka sida ba sektor perintah enggau peribit.

Nya alai tu mih maya era baru patut berengkah iya nya meri perati berat ngagai pengawa ngemansangka budaya ngintu enggau nyaga pengelikun. Ngangkatka tikas imej menua ukai semina tanggung pengawa perintah aja tang mega pengawa tiap iku peranak menua. Semua kitai ke ngumbai diri peranak menua Malaysia patut bendar bepikir chara sivik ninting kali kitai bekenaka perengka guna rama.

Taja pan Malaysia mujur dalam pemansang ekonomi tang naka kediatu menua kitai lalu apin mujur ngemansangka komuniti ke ngembuan pikir sivik. Bebuaika uras sebelah endur endang suah diperatika kitai sebarang maya taja pan disempulang enggau jaku tangkan sereta kimpin.

Aram kitai peranak menua Malaysia ukai semina bebendar gawa ketegal deka ngulihka reta tengkira, pengaya enggau pemujur dalam pengidup tang mega anang enda ingatka tanggung pengawa sivik kitai ngagai menua. Kenu ku orang enti ukai kitai sapa, enti ukai diatu kemaya? Enti deka alah enda, enti enggai bisi tau mih nadai.