Patut tauka enda team ke semina bulih lumur dua diberi perais

Nya ney!!! Ba penemu nuan patut tauka enda team ke semina tulihka lumur dua pan diberi perais?  Nyau munyi tanya bala sida pengajar, sida Chegu Tim, enti ku iya nya mih tanya HOTS tauka KBAT. Tang aku sekali tu ukai deka bekenangka utai ke dikumbai HOTS tauka KBAT. Nya ila enti bisi peluang enggau ruang, nganti aku mansik dulu ngagai bala sida chigu, kelebih agi sida Chigu Tim, Chigu Mary. Hahaha!!!

Nyadi utai ke deka dikenang aku sekali tu nya pematut team ke bemain dalam pekit ke bebesai tang alah diberi mega perais. Ukai nama, endang udah kala nyadi lalu udah suah nyadi. Gerempung Badminton Malaysia (BAM)  apin lama ke udah bisi meri perais tauka sagu ati ngagai team ke ngari Malaysia dalam pekit berebutka Mangkuk Thomas di India. Maya nya sida mujur masuk final tang enda mukai-mukai tak alah laban Jipun.

Kala mega aku macha artikel kelebih agi ari sida ke penulis artikel lumba enggau main ti enda tentu setuju enggau penemu nya. Ambika banding artikel ke ditulis Tony Mariadass ba Malay Mail bisi nyakal penemu beberika perais sagu ati ngagai team ke lumur dua manah. Ukai nama munyi ku iya pekara ke beberika sagu ati nya tau nyadika uti, nyadika tundi bala pemain ke nerima perais nya.

Nyadi bulan Jun tu tadi BAM bisi meri duit sagu ati ngagai tiap-tiap pemain badminton RM25,000 iya nya munyi ke udah diperambu dalam sekim insentif sida. Duit nya nyangka enda mayuh ba penemu sida gerempung tu, tang ba mata sida pemain baik nya indu tauka lelaki, RM25,000 nya besai amai sereta deka ngulihka nya mega ukai utai ke anchi-anchi, ukai mudah ke bendar.

Diatu kitai ninga BAM meri perais ngagai team ke alah jamah Jipun – menua ti baru keterubah dalam sejarah Badminton masuk final Mangkuk Thomas. Kati enti sida team Malaysia jemah ila mega tulihka lumur dua lebuh ngelaban team ari Philippines tauka Timor Leste? Diberi mega hadiah?

Bah, nama standard ke ditaga BAM tu? Nama bench mark BAM munyi ku jaku orang kemaya hari tu?

Pemain badminton tu nyau deka semua sida nya pemain profesional, reti nya sida tu bisi gaji baka kitai ke digaji orang gawa enggau tauke mih enda milih nya kereja perintah, peribit, di opis tauka ke tasik.   Semua belanja pejalai enggau alai diau sigi udah dibayar BAM. Dini dek deka ngiga agi?  Udah nya ditambah enggau elaun. Nyau munyi ku jaku tuai, tandan pinang dini kala bulaka upih? Maya main tebuka sida ke menang nya nyimpan tauka ngambi semua duit perais sida, mimit pan nadai mih diberi ngagai BAM.

Ba penemu aku ukai nyakal pengawa ke beberika perais tauka sagu ati tang tiap perais ke diberi patut engkeman enggau pengulih sida. Ukai nya baru sekali tu menua Malaysia masuk final dalam pekit berebutka Mangkuk Thomas. Kepenudi bendar nya dalam taun 2012. Kitai mega udah menang ba pekit nya lima kali. Nama kebuah lebuh bulih lumur dua maya ngelaban Jipun sekali tang nyelai ari ke ngelama tu?  Bidik amat bala sida pemain tu nyau baka ke bidik nemu basik enda betulang, untung nemu adung enda bekengkang.

Engka amai mih sida BAM mayuh duit lalu bisi ati deka meri sagu ati ngagai pemain sida ketegal pengelelak sida, tang iya patut bisi formula ke engkeman lalu ukai tak sebarang meri. Ambika chunto, bala pemain ke mayuh agi menang nya patut diberi. Katika ba tu iya ke menang enggau ke alah  bela diberi penyampau ke sama? Amat mih sida bela bemain dalam siti team tang pengulih individu mega patut dikira.

Seagi-agi kitai majak meri perais tauka sagu ati, dia budaya tu ujung-ujung hari ila deka munuh pemansang lumba enggau main di Malaysia.

Nyangka bisi tuduh penemu ke madah, BAM patut berunding ngemunka wang turu pinchin ngagai pemain sida lalu berengkah ngemasukka duit ngagai tabung ti baka nya. Tu nyangka idea ke manah agi. Lalu enti BAM agi mega deka mandangka pemanah sida ngagai pemain nyangka sida tau meri duit kandi kira-kira RM5,000 siku.

Nyadi tu tadi sida ke nyadi pematih  tauka jurulatih enda disengkaum dalam rintai diberi perais mata duit. Munyi ku ripot pengarang berita, presiden BAM, Tengku Tan Sri Mahaleel dalam penerang iya madahka pengawa beberika sagu ati ngagai pematih ukai utai ke patut dipungkal gaga. Ku iya, sida ke nyadi pematih tu endang di baruh kontrak lalu bisi maya sida diberi bonus. Gerempung nya enggai mungkal meri sida perais naka ke diatu.

Bah, katika raban pemain nya ukai di baruh kontrak mega? Enti sema sida pematih nya diberi bonus, nama penyalah sida pemain enda diberi mega? Nama nya nyau bisi penyelai? Nama pematih tu nadai tanggung pengawa mai Malaysia ngagai final pia?

Utai ke nanggul nya isu ke beberika perais enggau sagu ati ngagai pemain kitai ke ngujung sida kelalu diandai. Sida nyau enda tentu bebendar bemain laban udah tentu bulih perais. Tang naka kediatu sagu ati udah mega diberi, tusah mega kitai deka narit nya pulai.

Ke manah agi bala sida pemain tu bebagika duit sagu ati nya enggau bala pematih sida. Sida ulih meri RM10,000 siku lalu dipegulai dalam siti tabung. Udah nya baru dibagi enggau bala sida jurulatih munyi ku sempama jaku dalam, lebuh bah ampuh emperan, lebuh langkang ayan kerangan. Bah, kati ulih kini pekara ti baka nya nyadi? Tempap dada tanya pengeka diri. Raban pemain patut ngasuh utai ti baka tu nyadi dikena mandangka sida nya nyukung sereta sama negika penemu ke ditarak pematih ngagai sida. Tanggung pengawa menang nya endang tanggung pengawa sama entara pemain enggau pematih indah enda baka sempama berat sama dikaling, lempung sama dibinching.