Belajar nengah chara online

Kemaya hari tu, kitai ulih nambahka chara kitai belajar ba laman siber. Kebuah pia, laban pemansang teknologi ke benung regas dipejalaika kelebih agi ba menua kitai tu. Baka ke udah dipeda kitai kemaya hari tu, pengidup nembiak rebak baru kemaya hari tu mayuh disempulang enggau peranti ti sofistikated lalu mayuh perengka ke ulih sedia diguna. 

Enti deka mandingka enggau jeman menya, maya nya nembiak sekula agi ngarapka chara belajar di librari, tang diatu udah berubah lebuh udah bisi chara belajar ‘online’. Taja pan iya enda tentu diterima lalu pengawa ngubahka chara belajar nya enggau drastik, chara belajar alaf baru tu udah bisi tempat ba ati sekeda bala nembiak ke agi belajar di sekula enggau mega di universiti.

Program belajar nengah chara online  bereta enggau perengkaguna baka kereban komunikasyen enggau pengelicha ba laman siber, set pengawa latih ti ulih ditandu suah endang semitan bendar dikena bala nembiak redak ke ‘kelalah’. Jaku baka tu nyangka didinga munyi ke ngelese sida tang nya mih ulah ke bendar bala nembiak menua tu kemaya hari tu.

Enda semua ke bagas bebachaka bup sereta ngambi awak dikena ngulangka pelajar. Belajar chara online ukai semina kena ngaga latih aja. Skop pelajar tu besai agi ketegal iya meri perati ngagai chara belajar ti enda begunaka kereban chelak baka bup, surat berita tauka majalah. Mayuh penerang ulih diambi ari Internet ngena mayuh bengkah chara belajar. Tempalai Kenang sekali tu deka bejuraika isu tu enggau lenak agi ke alai raban nembiak redak agi bulih penguntung belajar nengah chara tu sama baka ke belajar sechara tradisional.

Penerang ba tunjuk jari

Chara belajar nengah laman siber tu sechara positif iya meri mayuh agi penguntung enti dibanding enggau pengurang. Ambika banding, enti dipeda mayuh bala nembiak  ngena awak sida ba Internet bebanding enggau macha bup. Nya alai, chara tu balat agi tebuka ngagai sida ke  jarang bekebakka bup tauka enda rindu ngulangka pelajar.

Penulis pechaya taja pan nembiak mayuh muai awak sida ngelawa media sosial, maya ti ditetapka nya ulih diguna enggau manah enti sida ngambi peluang deka belajar sechara ‘online’. Kiraka baka ke belajar enggau besosial enggau setimbang.

Kelimpah ari nya, chara tu semitan agi laban nembiak ulih ngerembaika pengerindu sereta ngangkatka pengelandik sida. Pekara ti baka tu ulih dikena enggau naka pengulih kelebih agi ba sida nembiak ke belajar ba universiti ketegal sida ulih ngakses penerang ti bisi kaul enggau bidang pelajar ti diambi sida terus ari Internet. Enggau nya sida enda ibuh kiruh begigaka kereban chelak baka bup, majalah enggau ti bukai.

Penulis ukai ngumbai bup nya enda beguna, tang deka madahka penerang ba Internet nya balat agi mudah digiga sereta dikulihka lalu engkeman dipeda kebuah pia iya nyau masai ba nembiak kemaya hari tu. Ba sida ke agi belajar di tikas sekula sekondari, tu tau dikiraka siti pemansang laban sida enda ibuh irauka nadai awak dikena belajar.

Program latih belajar ulih digaga terus ba Internet lalu enda ibuh agi ngiga maya ti engkeman dikena belajar bemalinka bup. Ba penemu penulis, tiap-tiap iku nembiak begunaka maya ti engkeman lalu dientudika enggau pengasai ati ti enda dikachau dikena sida nyerapka penerang ti  dipelajar ari bup.


Belajar Sambil Beperindang

Chara belajar baka tu balat agi ngasuh teperindang laban iya nadai besekat. Nembiak ulih milih nama-nama subjek enggau program ti dikerinduka sida. Nya alai, kelimpah ari ke ngangkatka tikas pengelandik iya mega ngadaka awak belajar ti lantang ngagai nembiak.

Ngagai kitai ke rindu ngaga aktiviti luar, chara belajar baka tu engkeman agi laban nadai nyekat maya kitai. Ukai semina nya aja, kitai mega nadai sekat ngatur taga jam ti semitan sereta nitihka pengelantang kitai. Chara tu ulih meri peluang ti badas ngagai nembiak ke benung gawa, tang ba awak ke sama bisi ati deka belajar. Tu ulih ngelimatka maya sida lalu enda nangika bisi lepa pengawa datai ngagai kus ba dini-dini endur.

Penulis pechaya kitai rindu agi ke chara belajar online tu laban udah kala nguji iya kediri. Nemu tauka enda, chara tu lebih agi ngagai teknik belajar ti mudah agi diperetika kitai. Ambika banding, nuan ngembuan awak ti mayuh dikena nuan mereti sereta begigaka saut sesebengkah tanya laban nuan enda ibuh berundingka saut nya dalam awak ke serekat.

Kelimpah ari nya, penguntung ke besai agi belajar nguna chara belajar alaf baru tu iya nya kereban belajar nya ulih diakses 24 jam sehari. Tu reti iya kitai ngembuan maya ti mayuh dikena macha enggau ngulangka pelajar sereta nyaut tanya ti bekaul enggau kus ti diambi.

Baka ke udah ditemu bala mayuh, ukai semua nembiak meretika utai ti dipelajarka sida ba dalam kelas ditambah mega enggau pengenggai sida belajar sereta utai ke ngachau sereta pengelelak sida. Nya alai enggau belajar ‘online’, nembiak ulih ngirai diri sebedau berengkah ngagai latih lalu nerima chara tu ti balat agi semitan ba sida.

Chara tu mega tentu ulih ngangkatka tikas pengelandik komunikasyen enggau nembiak bukai. Ketegal bisi nembiak ke malu nanya maya belajar ba palan belajar, dia penanggul ti baka tu ulih diputarka nengah chara belajar sechara ‘online’.

Asai ati ke malu ulih dibuai jauh-jauh laban kitai enda agi betemu mua enggau pengelicha tauka pengajar. Tu ulih meransang pengerembai idea ti nadai besekat. Ukai semina nya aja, mayuh bidang ‘online’ ba menua tu mega ngembuan pengelicha ti tebilang nama jelai rita.


Bisi Pengurang

Taja pan iya mayuh mai penguntung, iya mega bisi pengurang. Tu bepun ari nembiak redak nya empu. Ambika banding, ketegal chara belajar dalam timpuh 24 jam, bisi nembiak nya kelalu kisuk ngujungka iya nadai komited deka ngatur taga jam belajar lalu nguji ngabiska licha ‘online’ nya.

Chara nya enda sebaka enggau chara belajar di universiti ke alai kitai enda tau enda datai mendingka licha. Kelimpah ari nya mega kitai dipinta bedisiplin agi enti kitai milih chara belajar tu. Kebuah pia, laban kitai ukai semina patut nemu magi awak tang mega patut seruran besedia meransang diri enggau juluk ati ke deka ngulihka pemutus ti badas ba bidang ke diambi.

Penulis ngembuan pengarap taja pan penerang nyamai digiga ngena tunjuk jari,  tetap bisi nembiak ke bedau nemu nguna komputer enggau lanchar. Enti deka ngambi kus online tu, kitai mesti landik ‘bemain’ enggau Internet, e-mel sereta mega landik begigaka penerang ti deka diguna. Enti tak naka nemu nguna Facebook aja, endang tusah mih iya! Kiraka empai chukup penemu.

Kepenudi bendar, ngagai kitai ke nadai penatai pemisi ti tetap, patut bendar berunding dua tiga kali sebedau kitai deka majak diri enggau pengawa tu. Kitai ukai semina begunaka komputer pangku, tang mega dipinta mayar bil Internet ninting bulan. Ngagai sida ke komited agi deka ngambi kus jaku ‘online’ begunaka mayuh agi duit.

Nya alai dikena aku nyimpulka kenang aku sekali tu, dia kitai patut ngaga pemutus penemu ti betul lalu nemu pengulih diri ngambika penanggul disiplin enggau hari ke nadai nya nadai nekul kitai ke deka belajar nengah chara online.