Meniga hari tu tadi rayat Malaysia ke begunaka laman Facebook
balat bendar bekenangka pasal anggur perintah ke bisi ati deka nutup laman nya.
Berita perintah deka nutup tu dipansutka Menteri Komunikasyen
enggau Multimedia Datuk Seri Ahmad Shabery Cheek.
Kebuah ke deka nutupka laman tu nitihka penerang iya
laban mayuh bendar orang ke nguna laman tu enggau jalai sereta tuju ke jai. Bisi
nya nguna laman tu dikena bejaika orang lalu bisi nya dikena mantaika berita selebebu
ngapa. Kelimpah ari nya bisi mega ngena peluang ba Facebook nyadi batu api
ngasuh orang belaya kelebih agi ba pengawa ke bisi kaul beripih bansa.
Iya madahka opis menteri iya deka bejalaika pansik dikena
ngulihka respons ari mensia mayuh senentang pekara tu. Iya madahka enti mensia
bepenemu madahka Facebook patut ditutup, opis iya besedia meratika pekara tu
tang ku iya nya siti ari langkah rapat ti radikal.
Tang ba penemu Ahmad Shabery madahka pengawa ke deka
nutupka laman sosial tu ukai pekara ke mudah laban penyampau pengguna menua tu
kira-kira 15 juta enti dibanding enggau semina 2,000 ripot senentang sida ke
madah Facebook patut ditutup laban bisi orang nyalahguna laman tu. Enti nitihka
jaku iya nya reti nya enda patut bendar laman Facebook tu ditutupka perintah.
Facebook berengkah tebilang ba Malaysia dalam taun 2009. Sebedau
tu Friendster nyadi laman sosial popular di Malaysia. Laman sosial Facebook
diatu nyadi laman ke-empat tebilang ba Malaysia, ninggalka Friendster ba tangga
ke-tujuh, MySpace ba tangga ke-sebelas lalu Tagged ba tangga ke-dua belas. Nambahka
nya Malaysia mega ngembuan sekeda laman sosial ke dikemansangka orang menua tu
empu baka ikon.my enggau connection tang iya kurang bendar nerima sukung ari
raban pengguna di Malaysia laban sida balat agi begunaka Facebook, Friendster
enggau laman-laman bukai ke sebaka enggau nya.
Belalauka populariti, nama dih kebuah laman Facebook enda
patut ditutup?
Keterubah iya ketegal mayuh orang bedagang nguna Facebook
dikena sida ngerembaika pengawa dagang sida. Enti kitai meratika ba laman Facebook
mayuh dagang baik nya lokal tauka multinational nguna laman tu nyadika kereban
komunikasyen korporat sida tauka dikena sida bejalaika pengawa ngelakuka barang
dagang sida. Bisi sekeda dagang nya endang bepanggai penuh ba laman Facebook
laban sekeda dagang nya endang bekaul enggau dagang media sosial. Pangan aku
empu bisi nguna laman tu dikena iya nyual bup cherita enggau majalah.
Kelimpah ari nya mega laman Facebook diguna nyadika
kereban dikena ngerapitka kaul entara kaban belayan. Mayuh orang bepeluang
betemu enggau kaban belayan nengah laman Facebook. Bisi nya nyau betaun-taun
udah nadai betemu enggau pangan diri. Baka nya mega baka bala ke sama-sama
besekula lalu diatu udah gawa ba sebelah endur baik nya di Malaysia tauka di
menua bukai. Nengah laman tu sida ulih betemu baru ba dunya siber sereta mega
ulih ngatur maya betemu mua lebuh ke bisi peluang.
Ketiga,
laman Facebook ukai kebuah pekara ke jai selalu nyadi kelebih agi pengawa
bebantaika post ke enda manah. Orang ke nguna Facebook tu ke bendar ke ngereja
pengawa ti salah nya. Nadai tentu guna perintah blok pengguna Facebook laban
sida bisi chara bukai dikena sida nyambung kaul enggau pangan diri, baka
network sosial bukai, blog, laman web enggau ke bukai. Ambika banding kemaya
hari tu udah bisi apps baka Secret.ly ke ulih ngasuh pengguna ngepos penerang
enda ibuh nguna nama ke amat. Tu bisi nyadi ba menua China ke alai peranak
menua nya nguna platform bukai dikena sida besambung enggau pangan diri sechara
online taja pan Facebook disekatka perintah menua China.
Facebook
baka mega kereban teknologi bukai endang ngembuan pemanah enggau pengurang.
Taja pan baka nya mayuh pengguna sigi nemu chara nguna laman tu enggau manah. Munyi
ku sekeda orang ‘Facebook is just like a double edge sword’. Iya ulih diguna
kena pekara ke manah tauka dikena munuh orang.
Facebook
udah nyadi sebagi ari pengidup kitai kemaya hari tu. Kelimpah ari kebuah
ekonomi enggau sosial ke udah disebut tadi, Facebook mega ulih dikena ngerembai
propaganda politik sesebengkah gerempung politik. Nutup laman sosial tu deka ngujungka perintah
dipeda jai sereta arkaik. Enti kitai meda menua ke bisi nyekat peranak iya ari
begunaka Facebook nya endang menua ke tebilang enggau chara perintah ke terit baka
China, Korea Utara enggau Syria.
Facebook ke bendar ulih mega nyadika platform ngerapitka kaul dalam komuniti.
Ambika banding, pekara tu bisi nyadi lebuh bisi penanggul entara sida Muslim
enggau Kristian di Kajang, Selangor. Maya nya seraban orang datai bebaika
banner ke ditulis enggau jaku jai lalu nyerang gerija. Tu mih maya siku training consultant nguna Facebook
ngenataika jaku tesau ba gerija ba genturung menua iya, the Holy Family Church di
Kajang, dikena mandangka solidariti sereta kaul entara pupu raban bansa dia. Respons ba Facebook nyengkaum Likes sereta
aktiviti 'Peace n Love' entara orang Muslims enggau Kristian di Kajang nya siti
ari teladan pemanah media sosial tu.
Block
tauka nutupka FB kemaya hari tu ukai pengawa ke nemban dikereja dalam abad ke 21
tu. Enti rayat Malaysia ditagang nguna Facebook reti nya menua kitai udah nutup
diri ari menua bukai di dunya. Nembiak redak kitai mega nerima empas ari hal tu
laban sida deka dipeda tinggal ari pangan bukai ba tikas global ari sukut
networking, bekunsika penemu enggau pekara bukai.
Kitai
enda patut nangi laban menua kitai bisi agensi baka Malaysian Communications
and Multimedia Commission (MCMC) ti ditumbuhka perintah dikena sida monitor
semua aktiviti sereta ulih ngeletak ukum ngagai gerempung tauka orang ke bisi
nyalahguna laman tu. Enda patut kitai
deka nitih menua baka Bangladesh, Egypt, Iran, Korea Utara, China enggau Syria
ketegal 2,000 ari beberapa juta orang ke enda rinduka Facebook. Baka ni kitai
ulih nyapai status menua maju enti kitai kiruh enggau isu ti mekat baka tu?
Kelimpah ari diketawaka menua bukai, kitai rayat Malaysia deka lenyau hak
ngenataika penemu diri sereta prinsip demokrasi deka pupus ari menua tu. Katika
nuan sanggup? Aku enda pan!
Tiada ulasan:
Catat Ulasan