Bidayuh nya siti ari etnik Sarawak. Genturung pendiau etnik
Bidayuh mayauh ba endur ba sitak pelilih menua Kuching, Serian, Bau enggau
Lundu. Kelimpah ari nya bisi mega sekeda diau ngachir ba tempat bukai. Tang majoriti
sida nya endang ari endur ke udah dirintaika tadi. Nama kebuah aku tak empegal
becherita senentang etnik Bidayuh? Kebuah pia, laban kesekali tu aku deka
ngenangka sejarah penatai pengerami Bung Beratak. Cherita tu diambika aku ari
ke ninga bala kaban belayan sereta pangan bebansa Bidayuh sereta mega macha ari
utai ke udah ditulis orang ba media sosial. Kebuah kitai ke ukai ari etnik
Bidayuh patut nemu sejarah sida laban kitai mega diau berimbai pendiau enggau
sida tauka sekurang-kurang iya kitai diau ba sebuah nengeri ke diuan mayuh pupu
raban bansa nyengkaum bansa Bidayuh.
Baka ni Bung Bratak tu nyadi bepun ari pejalai
Panglima Kulow enggau James Brooke ke Skrang dalam taun 1841 (The Untold
History).
Nyangka agi mayuh ari kitai bedau tentu nemu kaul
bukit-bukit Bung Bratak ke ba sitak pelilih menua Bau enggau raban bansa
Bidayuh Jagoi tu. Iya ti bendar, Bung Bratak tu kala nyadi genturung pendiau sida
raban bansa Bidayuh Jagoi ke datai ari gunung Sungkong, Kalimantan, Indonesia.
Sepengelama beratus-ratus taun sida diau enggau likun, harmoni enggau pangan
diri sereta chakah enggau pengawa bumai betaun. Tang utai ke nyadi ngenyit maya
1 May 1838 udah ngubah semua utai tu.
Nitihka cherita, kena 1hb May 1838, genturung pendiau
ba Bung Bratak tu udah diserang seraban bala Iban ari Skrang ti dibetuaika
Bagat enggau 70 iku raban anak nembiak iya. Bagat enggau bala iya udah nunu
rumah-rumah panjai ba genturung menua nya. Tujuh buah baruk iya nya rumah
tradisional bansa Bidayuh enggau tujuh bansal alai nyimpan padi mega dirubuh
sereta ditunu. Bagat enggau bala iya ngambi kesemua stok padi orang Bung
Bratak. Bala anak buah iya mega munuh sapa-sapa ke ditemu deka ngelaban sida.
Nitihka cherita orang tuai nyau deka datai 2,000 iku orang Bung Bratak bisi
dibunuh sereta mayuh agi bala indu enggau nembiak mit ditaban nyadika ulun.
Udah puas sida nyerang Bung Bratak, Bagat enggau nembiak iya pan belayar pulai
ngena 14 buah perau ke sarat enggau padi sereta ulun dibai pulai ke Skrang.
Datai sida di Skrang, tuai sida Lanang enda besetuju enggau pengawa Bagat lalu
ngasuh Bagat ngelepaska semua bala indu enggau anak mit ke udah dibai sida nya
laban pengawa Bagat nya udah ngelaban atur ke diasuh tuai rumah sida, iya nya
Lanang. Lanang enggau penuh asai tanggung pengawa lalu ngasuh sida serumah
ngambi sereta ngambu bala sida ke udah ditangkap nya nyadi anak iru lalu idup
segulai enggau raban bansa Iban Skrang. Iya ke bendar pengawa Bagat enggau bala
raban iya nya semina ngena jalai muntang dikena mutarka penanggul suntuk berau
ba menua sida. Jalai ngerumpak sida nya ba Bung Bratak nyadika pekara ke enda ulih diterima
tuai sida Lanang.
Maya Bung Bratak diserang, Panglima Kulow nya siku
panglima ke tebilang ba Bung Bratak. Tang maya utai tu nyadi iya nadai ba menua
laban ke enggau bala bukai ke umai paya sida ke enda tentu jauh ari genturung
pendiau nya. Asap ke dipeda datai ari menua sida ngasuh sida nemu menua sida
udah diserang munsuh. Sida lalu beguai-guai mulaika diri ke rumah tang laban ke
udah laun mimit, Bagat enggau nembiak iya udah ninggalka Bung Bratak. Indah
bini Panglima Kulow empu pan ditemu iya mati dibunuh ba pendai enda jauh ari
rumah sida. Panglima Kulow lalu ngerah sereta ngelumu semua nembiak iya mai
sida baum. Ba aum nya sida sama selubang penemu deka minta bantu ari luar
sama-sama enggau sida serumah ngiga bala indu enggau sida ke udah ditaban nya.
Berengkah ari nya mih pun pejalai Panglima Kulow ke
Pontianak ba barat Kalimantan, Sambas enggau Brunei ngiga orang mantu sida tang
nadai siku sanggup deka nyaup sida. Iya empu nyau mimit da agi deka berasai
putus pengarap tang enda mukai-mukai iya nerima berita manah ari Rajah James
Brooke ke madahka kediri besetuju deka mantu Panglima Kulow nyelamatka sida
serumah ari ke udah ditabanka Bagat enggau anak buah iya ke Skrang.
Nya alai, dalam taun 1841, bekejang mih Panglima Kulow
enggau seraban soldadu ari baruh kuasa Rajah James Brooke ke Skrang. Udah lama
ke bejalai sida pan datai ba genturung pendiau bala Iban Skrang ke dipegai
Lanang. Utai ke ngalitka ati sida Panglima Kulow iya nya penatai sida dia diambat
sida Lanang serumah enggau manah sereta enggau adat basa. Maya nya mih Tuai
Rumah Lanang minta ampun ngagai Panglima Kulow ketegal pengawa anak buah iya
Bagat. Iya mega besetuju deka ngemulaika
semua sida ke udah ditaban nya.
Tang taja pia, nitihka cherita, ukai semua sida ke
udah ditabanka bala Bagat nya deka dibai pulai ke Bung Bratak laban sida pan
udah diau di Skrang beberapa taun lalu bisi sekeda ari sida nya nyau udah jadi
enggau orang menua nya empu. Nadai ku enggau mih. Pulai mih sida Panglima Kulow
enggau raban iya ke Bung Bratak. Datai sida di menua, sida pan dialu enggau
chukup basa sereta rami.
Berengkah ari pekara tu mih kaul sida genturung
pendiau ba Bung Bratak enggau bala Iban di Sungai Skrang nya rapit. Ari
pengerapit kaul nya mayuh bala sida ke udah betampil enggau bala Iban.
Lebuh pengelikun enggau pemaik nyau majak manah
ketegal ari atur Rajah James Brooke dia mayuh sida ari Bung Bratak tu pindah
ngagai endur ke ulih alai sida bumai paya sereta begigaka pengawa bukai. Belalauka
pansik, kira-kira 40 buah genturung pendiau nyengkaum tujuh buah ba pelilih
menua Selua, Kalimantan Barat, Indonesia endang bekaban enggau sida ke asal
diau ba Bung Bratak. Raban kepenudi ari genturung pendiau nya ke pindah ke
menua bukai nya sida ari etnik bansa Tembawang. Sida tu pindah ari Bung Bratak
dalam taun 70an lalu diatu diau ngentapka diri ba Tembawang Sauh iya nya
berimbai pendiau enggau sida ba Stenggang, Bau.
Hari Bung Bratak nyadi siti ari waris pesaka raban
etnik Bidayuh Jagoi. Ketegal ke udah nyadi sejarah dia bisi didirika sebuah
batu pengingat dikena ngingatka pekara nya. Bung Bratak diakun nyadi palan
besejarah dalam taun 1988 ulih Dayak Bidayuh National Association (DBNA).
Kenyau ari nya, ninting taun maya 1 May, raban bansa Bidayuh Jagoi ari Kuching,
Bau enggau Lundu deka begelumu ba Bung Bratak dikena sida ngelaika hari sereta
penusah ke udah ninggang aki ini sida kelia.
Kemaya hari tu, pengawa Hari Bung Bratak tu ukai
semina pengawa dikena ngingatka aki ini raban bansa Jagoi aja tang udah nyadi
siti ari pengawa narit penatai waris enggau temuai ngagai lelangun ba nengeri
Sarawak kelebih agi ba sitak pelilih menua Bau. Ninting kali datai ba maya tu,
mayuh bendar akitivi main asal enggau ke bukai bisi diatur.
Tu mih sejarah ngelansa senentang Bung Bratak sereta
pejalai Panglima Kulow ke Skrang bepun ari utai jai ke nyadi maya 1 May 1838.
Diarapka palan besejarah Bung Bratak tu deka terus semampai dijaga seraya ke ngetanka
waris pesaka tradisional raban bansa Bidayuh Sarawak .
Penyanding
Penemu:
http://cikbutang.blogspot.com/2013/07/serba-sedikit-cerita-kaum-bidayuh-di.html
Tiada ulasan:
Catat Ulasan