Tiap-tiap
iku ari kitai tentu kala nerima jaku pejah sepemanjai pengidup kitai. Jaku pejah
nya datai dalam mayuh bengkah chara, sekalika nya sinis, beterus-terang tauka
pejah kasar ti enda nyamai didinga.
Iya ti balat
ngerugaka agi iya nya jaku pejah ti datai ari sida ke rapat enggau kitai baka apai
indai, pengajar sekula, orang ke ngaji kitai gawa tauka tawing ti sama bekereja
di ofis.
Enggai enda
pan, jaku pejah nya udah nyadi sebagi ari asam-garam dalam pengidup kitai besehari-sehari.
Jaku pejah seruri seruran agi ngembuan tuju deka ngemetulka pekara ba sesebengkah
tempat tauka ulah siku-siku ke pemanah semua.
Sigi amat,
enda mayuh ari kitai ke sanggup nerima jaku pejah orang bukai nama agi enti pejah
seruri tauka kritikan amat nuju ulah kitai ke enda manah ti enda dibantai ba
mua mayuh ngelama tu.
Bah, kati pedis amatka kitai nerima sesebengkah jaku pejah taja pan nemu pejah nya endang bisi pengamat? Nama ego kitai berat agi sereta patut ditanka nyentuka ngenggaika pengamat ba mua mata kitai empu?
Pengenggai
kitai nerima jaku pejah enggau ati tebuka mandangka sekeda pekara iya nya siku-siku
orang nya ke bendar balat ngemeratka diri empu lalu udu ngenuluka penemu diri aja.
Kelimpah ari nya, iya mega nunjukka mensia rindu agi ninga jaku puji, diberi
tabi kenang lalu ukai jaku pejah.
Mayuh orang
ngumbai jaku pejah nya pekara ti destruktif, negatif lalu ulih ngelabuhka imej
sida. Ba raban mensia ti baka tu, semina jaku puji aja ti dianggap manah lalu
ulih mantu sida. Reti nya, sida tu chundung agi berunding nengah siti arung aja.
Pekara ti dibangkit
tu ukai utai ti ditempa sengapa kada aja. Tang iya ti bendar iya benung nyadi ba menua kitai
baik nya mungkur sekeda tuai pemesai menua, parti-parti politik tauka orang ke
nguji ngulihka publisiti murah. Sida tu enggai nerima jaku ke madah penemu sida
nya enda tentu engkeman. Sida enggai dipadah salah.
Ninting hari,
bisi aja penyarut sereta isu-isu angat dibangkitka sida ti bisi agenda sereta
pengadang iya bulih nerima perati orang
ke di atas tauka komuniti iya empu. Isu-isu ti bantaika nya seruran mantaika pekara-pekara
baka bansa, pengarap enggau jaku ti ulih ngeruga emosyen tauka asai ati orang
mayuh.
Iya mega tau
nambah penusah lebuh penemu kelimpah ari enggi sida tu tadi, enggau jampat
penemu tauka runding sida diseliahka tauka dibuai ke tisi. Nadai kebuah-buah, penemu
sida tu ujung-ujung dilabel “anti-establishment.”
Terus terang
madah enti kitai bepikir nengah siti arung runding nya utai ke enda tentu
nemban sereta tau dikumbai bepikir sempit. Enti ngena jaku ke terus agi, reti
nya raban mensia ti baka tu ke bendar nya takutka kenayang diri empu lalu nadai
ngembuan pengarap sereta semina deka nyadi aya senurut aja sempama munyi jaku
tuai; nitihka pengerarat ai.
Ba penemu
raban sida tu, penemu sida aja mih ti betul lalu enggi orang bukai patut diiarka
terus. Ulah ti baka tu enda badas amat laban iya nyereminka penuai chara
bepikir kitai empu. Utai ti patut dikerejaka kitai iya nya mending dulu penemu
orang bukai sebedau kitai nulak tauka ngiar penemu nya enti bisi pematut.
Mendingka
penemu orang bukai taja pan bepun ari sukut ideologi tauka tirai juru ti bebida,
nya ukai reti iya orang nya besetuju enggau penemu ti udah dikenataika. Dalam pengidup
mensia ke bendar, sapa-sapa tau besetuju lalu sapa-sapa tau mega nyakal. Malaysia
tu sebuah menua demokrasi, nya alai semua rayat nadai disekat ngenataika buah
runding sida.
Mending
sereta nerima jaku pejah seruri orang bukai nadai mimit ngasuh kitai lemi.
Persepsyen ti ngaitka penyanggup orang nerima jaku pejah nya siti pengelemi nya
terang bendar madahka nya siti penemu ti chukup sempit. Tang enti kitai besedia
mendingka penemu orang enggau jaku pejah orang bukai nya mih penteba siku-siku
mensia ti bedada lapang. Nadai rugi kitai bepikir baka nya laban tiap-tiap iku
ari kitai patut diberi peluang ngenataika nama-nama pekara ti dipikirka kitai
amat sereta enda dikungkung enggau runding minda lama.
Kemaya hari
tu kitai idup ba abad ke-21. Ba abad ti sereba moden sereta tebuka tu minta
kitai mensia ba atas bumi tu bepikir setipak enggau pemansang sereta segang idar jeman.
Nya alai, iar
ke tisi ego kitai nya lalu besedia nerima jaku pejah. Munyi rambai jaku tu:
Iya ke manah nyadika teladan, iya ke jai dibuaika tisi – tu mih semangat enggau ulah ti patut bendar ditarak dalam diri rayat.
Ingat, jaku
pejah nya ke pemanah lalu ukai ngembuan tuju deka ngelabuhka orang.
Tiada ulasan:
Catat Ulasan