Raban bansa Dayak di menua tu kelebih agi
bansa Iban patut temegah ati bejaku ngena jaku diri empu dalam semua pengawa ke
dikereja sida ninting hari. Sapit Kepala Menteri Datuk Patinggi Tan Sri Alfred
Jabu madah, enggau chara nya jaku Iban ulih angkat mansang baka jaku Mandrin
enggau Tamil.
“Nengah chara tu kitai ulih ngenanka jaku
Iban ari ke lenyau ngapa enda diguna baka sekeda jaku bansa bukai ke nadai agi
diguna kelebih agi ba bala nembiak rebak baru diatu,” ku Jabu.
Iya ti mega nyadi Menteri Pengawa Betanam
Betupi Chara Moden enggau Pemansang Menua Pesisir madah munyi nya rambau nutup
Kus Jaku Iban ke diatur sepemanjai enam minggu sereta dikemujurka bala raban
pengajar ari 30 bengkah sekula primari enggau sekondari di nengeri tu kena
malam Hari Empat tu tadi.
Berindik ari nya, raban bansa bukai mega ulih
belajarka jaku Iban sereta ngelala pemanah adat bansa kitai.
“Jaku Iban deka lenyau enti kita enda berani
nguna tauka malu bejaku ngena jaku diri empu. Tambah mega, raban bansa Iban ke
diau di nengeri tu tau lenyau adat ke dikembuan kenyau ari aki ini kitai kelia.
Nya alai, aku meransang kitai ke bansa Dayak anang malu nguna jaku bansa diri
empu laban jaku Iban chukup mayuh guna ngagai kitai Dayak,” ku Jabu.
Jabu mega meransang raban bansa Iban ke
ngembuan pelajar tinggi sama beserakup ngangkat sereta ngemansangka jaku Iban
awakka ulih mansang baka jaku bansa bukai lalu diguna ba tikas ke lebih tinggi.
“Taja pia, kitai patut ngubah runding enggau
chara bepikir ba kitai Dayak kelebih agi bala nembiak kemaya hari tu.
“Kitai patut meri sukung ke chukup badas
ngagai raban nembiak sereta ngelalau ngena jaku ajar minta sida belajarka jaku
Iban nyentuk ngagai tikas ke pemadu tinggi,” ku iya.
Iya mega madahka bala raban pengajar patut
diberi kus dikena sida nambahka pengelandik sereta ngemansangka jaku Iban ke
diajar sida ba sekula. Jaku Iban ukai semina dipelajarka ba sekula primari
enggau sekondari aja, tang mega patut dipelajar sampai ngagai tikas ke lebih
tinggi baka palan pematih pengajar tauka universiti.
“Mayuh bengkah chara dikena ngemansangka jaku
Iban. Siti ari chara ke mujur ulih meri pemansang iya nya ngaga mayuh pansik
bekaul enggau jaku Iban.
“Bala Raban Gerempung Ukai Perintah (NGO)
mega patut nunjukka sukung sida dikena ngemansangka jaku Iban sampai ngagai
tikas ke pemadu tinggi,” ku Jabu lebuh dirandau raban pemberita.
Beserimbai enggau program nya, Jabu mega
bejadika simposium Adat Bansa Iban ngagai sekeda ari gerempung bansa Iban
nyengkaum sida ari raban Radio Television Malaysia (RTM).
Sama bela bisi datai ba pengerami nya Menteri
Muda Rengka Rama (Elektrik enggau Penyambung) enggau Menteri Muda Pemansang
Raban Nembiak (Menua Pesisir) Datu Dr Stephen Rundi Utom, Kaban Kunsil Nengeri
(ADUN) Telang Usan Dennis Ngau, Residen Menua Miri Anthonio Khati Galis, Datuk
Bandaraya Miri Lawrence Lai sereta Direktor Palan Pematih Pengajar Kampus
Sarawak Miri, Bedui Une. (Dibali ari Berita Iban, Utusan Borneo)
Tiada ulasan:
Catat Ulasan