Nangi alah jamah orang bukai

Lebuh bisi kes buchur ba keretas Sains Ujian Pencapaian Sekolah Rendah (UPSR) utai ke dulu pansut ba runding nya: “Apu, nama nya? Tu tak semina peresa sekula primari aja. Lapa sanggup meli keretas peresa enggau saut?”  Maya aku nerima whatsapp tanya senentang pengamat pekara tu ari pangan pengajar ke ngajar aba Sibu aku semina nyaut enda nemu. Agi mega maya nya aku benung baum di Sabah. Ukai nama laban enggai ngamatka pekara enti nadai evidens ti nyata. Nyau udah meda berita ba televisyen baru aku nemu pengamat berita tu.

Runding aku udah nya ngelekai ngagai bala apai indai. Kati sida tu patut disalahka? Baka ni nembiak ke berumur 12 taun bisi duit kena mayar tauka meli keretas peresa nya enti ukai ari apai indai?

Nya mih kebuah ari suba aku bisi mansutka penemu madahka kitai patut ngemaduka budaya ngemeratka peresa laban ketegal nya nembiak kitai udah berubah nyadi robot. Sida semina belajar laban deka mujur ba peresa lalu ukai belajar ketegal deka ngulihka penemu. Kitai udah udu amat ngubah runding nembiak lalu ngasuh sida nya semina ngembuan penemu deka betapat ngulihka keretas. Tu udah balat bendar ngemelika kitai empu ke nyadi apai indai sida laban kitai udah ngajar sida nengah chara nya.

Kada enda tu kebuah nembiak kitai belajar ba institut pelajar tinggi nyau enda nemu berunding agi kini?

Lebuh kitai nganjung anak kitai ke sekula, kitai mesti nemu tuju kitai nya, iya nya laban deka ngiri sida ukai semina enggau penemu tang mega narak sida enggau nilai sosial sereta chara sida nampil diri enggau orang bukai.

Ngajar sida ngakal maya umur 12 taun ukai nilai enggau budaya ke patut diiri kitai ngagai sida. Bebeli tauka ngulihka keretas peresa enggau saut nengah chara nya  ngajar sida ngakal sereta nerima penyalah nya nyadi siti ari budaya.

Ba penemu aku siku, sida ke bisi autoriti patut meratika baru peresa perintah ba tikas sekula primari. Sida patut berunding sereta nentuka peresa nya bisi nilai aba sistem pelajar kelimpah ari ke nyadi semina selambar keretas ti nadai beguna. Kemaya hari tu bala apai indai enggau sekula semina betapat deka ngulihka pemayuh A dalam peresa.

Bala kepala pengajar enggau pemesai ari opis pelajar bela betapat deka ngulihka pemutus peresa ke manah ba tikas sekula enggau pelilih menua. Mayuh macham chara dikena ngulihka juluk ati tu. Nya mih kebuah dipelabaka sekeda pengajar, kepala pengajar sanggup nengah chara negatif ngulihka pemutus peresa ti manah.

Insentif ari sukut duit enggau pangkat mega ngasuh mata sekeda orang nyau beserapun ngujungka sida sanggup ngulihka juluk ati sida nengah nama chara sekali pan asal juluk ati ulih dijapai.

Tisih tauka peresa endang meruan nyadi sebagi ari sistem pelajar laban iya meri peluang ngagai apai indai, sekula enggau penempa polisi jalai nisih nembiak sereta meratika pengulih sida.

Tang pengawa ti kelalu ngemeratka UPSR udah ngubah pengawa nisih tu nyadi pengawa ke betapat enggau pangan diri. UPSR patut nyadi peluang alai nisih ukai meratika penuduk nembiak serata berapa A ulih anak kitai, berapa A ulih sekula kitai, berapa A ulih PPD kitai lalu lumur berapa nengeri kitai ba ranking nasional.

Tang ba sekeda apai indai (ukai nembiak), UPSR nya mih jalai alai tama ngagai sekula sekondari ke manah agi baka sekula beasrama penuh enggau Maktab Rendah Sains Mara.

Enti nembiak tama ngagai sekula tu ketegal ngakal tentu sida udah nya deka napi penanggul laban ba sekula sekondari mayuh agi subjek enggau pekara ke patut dipelajarka sida. Ulih tauka enda sida tu besemekih enggau nembiak bukai ke endang pandai ari sukut kognatif?  Pelaba aku enda. Ba sekula tu pekara diajar enggau jampat laban nembiak dia endang nembiak ke pandai sereta jampat nangkap utai ke diajar pengajar.

Enda ulih digambarka enggau jaku kebuah orang Malaysia bangat nangika alah enggau pengan diri. Nama mih penyadi orang Malaysia kemaya hari tu? Kada enda nya ke selalu nyadi jaku bungah jaku uti kitai – Malaysia Boleh?

Enti kitai enda bejimat enggau pekara tu dia kitai ila deka baka menua Jipun enggau China ti balat nekan nembiak sida ngasuh sida belajar bebendar ngujungka sekeda ari sida nya sanggup munuh diri ketegal pemutus peresa ti enda manah. Indah di Malaysia udah bisi sekeda kes ke baka tu kelebih agi ba tikas sekula sekondari.

Nya mih kebuah aku penulis tetap blog Tempalai Kenang endang enda tentu deka mantaika gambar tauka cherita nembiak ke bulih A ba peresa perintah laban nya tau ngeruga sida ke agi biak. Aku ngasaika diri empu ukai nya nyamai ngambi peresa. Ati berasai kesal belama. Ba penemu aku pekara pemujur tu enda tentu ibuh diberi perati berat ba media nasional laban iya balat agi mai empas ke enda manah.

Taja pia, berita pasal keretas peresa perintah ke buchur nya ukai pekara baru lalu seruran didinga kitai nya deka ninting taun. Tang utai ke balat ngasuh ati tekenyit nya diatu nyau datai ba tikas sekula primari. Ba penemu sida apai indai enggau pengajar pekara tu ukai pekara baru.

Iya ti ditemu aku, peresa ba tikas sekula primari nya ngajar nembiak senentang pemesai guna peresa perintah lalu ukai ngajar sida chara pasal nengah chara ti muntang.

Raup Penemu

Enti orang nanya penemu aku pasal peresa ba sekula primari; tu mih saut aku – Peresa UPSR nya semina patut digaga ba tikas sekula aja lalu enda ibuh digaga Lembaga Peperiksaan laban enti nitih ke amat nadai nembiak pas tauka fail. Enti pemutus peresa sida enda manah pan sida tetap niki ngagai pom satu. Ngagai nembiak ke deka masuk sekula beasrama penuh tauka MRSM, sida patut ngambi peresa bukai ke patut dikena nisih sida.

Ari nya aram mih kita ke pengajar pulai ngagai pengawa asal kita iya nya ngajar lalu ngena peresa ke bisi nya dikena meratika enti ajar kita nya mujur tauka enda.