Aku tu agi itukka utai ke nyadi apin
lama ke udah iya nya bekaul enggau keretas tisih
UPSR. Balat bendar kitai
mending ba berita sereta macha aba surat kabar senentang pekara tu. Mensia
mayuh bela besalahka pangan diri. Bisi nya ngumbai pengajar salah lalu bisi nya
madahka kelas tuisyen enggau apai indai. Baka selama aku nadai iran enggau utai
tu laban iya nyau udah masai didinga. Pekara tu tak seruran didinga bisi nyadi
ninting taun.
Lebuh bisi orang minta tentu bisi orang
meri. Tu bepelasarka teori peminta enggau pemeri tauka dalam jaku English – Law
of supply and demand. Nya mih teori ke bisi dipelajarka aku lebuh ba pom enam.
Kitai kemaya hari tu ke bendar kelalu ngemeratka peresa tauka exam-oriented
baka mega menua bukai di Asia.
Kitai besekula ukai
deka belajar. Kitai ke sekula laban deka ngulihka A ba peresa. Kitai mega enda
diajar subjek ke diambi kitai tang diajar chara tau pas ba subjek nya. Nya mih
utai ku aku enti bisi peminta tentu bisi pemeri.
Uji kitai mandingka
utai tu enggau aktiviti ti pengabis mudah – driba. Maya aku belajar neriba suba
aku ukai diajar deriba tang diajar chara pas test deriba. "Jang, enti nuan
datai ba jalai ti bingkuk tukar ngagai gear tiga", "enti sema nuan
nyau semak sukut jalai, peratika cheremin tisi", aku ngapal tiap-tiap checkpoint
ke tiga buah jalai ti tau alai tester nya nguji aku. Endang amat laban
tiap-tiap kutak rintai pengawa dalam tisih deriba aku nya sigi ditanda iya
enggau tanda betul. Enggau nya aku berasai gaga. Tang udah nya bisi mih aku
kala ngelantak motosikal. Mayuh agi orang ke ngelanggar adat jalai raya udah
tembu test deriba. Nama reti nya?
Nya mih siti ari
peresa ke kala diambi aku ke alai aku nadai kala meri perati ti serius ngagai
pekara nya. Dipelabaka aku orang bukai pan sama. Nya mih kebuah ba penemu aku,
bebelika keretas peresa ti udah buchur bisi reti enti nya mai rega ti patut.
Tang utai ke suah didinga kitai ari berita madahka tikas tauka standard pelajar
menua kitai kemaya hari tu majak nurun-senurun ngujungka raban kompeni tusah
deka ngiga pengereja pengawa ti bekualiti.
Uji kitai mulaika
pengingat ngagai utai ke udah nyadi beberapa taun ke udah, dia kitai kala ninga
bisi nembiak tulihka 18A ba tikas peresa SPM. Lapanbelas chak! Ukai deka bejaku
munyi orang ke bepikir konservatif tang ngambi 10 subjek ba tikas SPM udah
dikira tinggi amai.
Nya mih kebuah keretas
buchur laban orang ke meri tauka muchurka keretas nya ngereja pengawa nya laban
bisi orang minta. Lalu ditambah mega enggau sistem pelajar kitai sereta
mind-set mensia mayuh ti udu ngemeratka peresa. Uji kitai nurun ke sekula lalu
tama ngagai kelas primari enam dia kitai meda bala pengajar nama udah bulan
enam lalu nadai agi ngajarka penemu; nadai narak tauka ngiri nembiak enggau penemu
baru tang kisuk keduk ngasuh nembiak ngaga latih. Hari siti ngaga latih. Minggu
siti ngaga latih. Bulan siti ngaga latih nyentuk ngagai hari ke nyau semak maya
peresa UPSR. Jaku tangkan ari kepala pengajar ngasuh pengajar nembuka kurikulum
sebedau bulan tujuh – bulan enam mih nya. Ari nya kitai nemu sekula, pengatur
sekula enggau opis pelajar sanggup betunggang lupung ngulihka pemutus peresa ti
pemadu manah ngambika enda nyadika buah kenang orang.
Nya alai kitai anang
alit ati laban seagi-agi apai indai, diri sebilik enggau komuniti ngarapka A
ari bala nembiak seagi-agi nya mih orang deka ngiga chara ngulihka juluk ati
nya enggau chara ngakal. Nya mih kebuah ba penemu aku nadai chara bukai kitai
mutarka penanggul tu ari majak nyadi – iya nya ngubahka fokus kitai ari ke
ngemeratka peresa ngagai pengawa ke ngemeratka pelajar, iya nya belajar dikena
ngulihka penemu. Kati ukai maya tu maya ti chukup engkeman alai kitai berubah
kini?
Engkeman. Aku nyukung 100%
BalasPadamTerima kasihka sukung nuan tuan pengajar.
BalasPadam