Peneleba gawa beguna agi di Malaysia ari pelajar tinggi

Lengka sesempa leka pinang senentang kenang pasal isu UPSR ke balat dipejakuka raban mensia mayuh kemaya hari tu lalu nguing ngagai pekara ke bisi mega kaul enggau raban nembiak redak kemaya hari tu ke udah tembu pelajar sereta benung begigaka pengawa ti engkeman enggau tikas pelajar sida.

Tuju artikel tu ditulis sekali tu ukai nyekat nembiak ari belajar ngagai tikas ke tinggi agi tang madah ngagai raban nembiak pemesai guna peneleba gawa dikena sida ngiga pengawa ti engkeman enggau pelajar sida. Ngembuan pelajar tinggi nya beguna laban iya mantu nembiak muka runding sida ari chara tradisional ngagai ke moden, ari ke lama ngagai ke baru lalu ari ke baruh ngagai ke tinggi.

76 persin pengereja pengawa aba Malaysia ngembuan penemu ke madahka peneleba gawa nya

beguna agi ari tikas pelajar tinggi lebuh sida deka minta pengawa, pia ku siti ripot ‘Laporan Suku Kedua 2013 Randstad Workmonitor’.

Pansik nya dipejalaika Randstad, iya nya kompeni ke ngambi pengereja pengawa ti pengabis besai di dunya. Kompeni Randstad tu bisi ngaga pansik ngagai 405 iku pengereja pengawa ba menua tu. Nitihka pansik sida, mayuh ari responden pechaya raban nembiak kelebih agi sida ke berumur 25 taun ke baruh tusah deka bulih pengawa ti engkeman.

Direktor Randstad Malaysia, Jasmin Kaur madahka pansik nya ti dipejalaika urung 18 April ngaga 3 mei 2013. Asil pansik nya mandangka bisi nyadi ubah chara bepikir ba raban pengereja pengawa iya nya ari bepikir chara tradisional ke ngemeratka pelajar ngagai runding ke ngemeratka peneleba gawa.

Bepelasarka pansik tu, responden mega madahka nembiak kemaya hari tu patut ngembuan personaliti ke manah dikena sida ngiga pengawa. Penggaji pengawa kemaya hari tu nadai agi ngiga sida ke ngembuan pelajar tinggi. Sida ngiga pengereja pengawa ke bisi peneleba gawa ngambika ulih mantu ngemansangka kompeni sida.

Penemu ke bisi dikauk ari bup sereta diiri raban pengajar kiraka nadai agi chukup lalu sida ti ngiga pengawa tauka kereja kelebih agi sida ke nembiak patut proaktif agi ba pengawa ngangkatka tikas peneleba enggau pengelandik sida. Tu nyengkaum hal masuk ba latih industri ti relevan ngambika bisi dikena sida nambahka peluang bulih kereja.

Bepelasarka pansik nya mega madahka 63 persin pengereja pengawa pechayaka penemu ti madahka raban nembiak tusah agi deka bulih pengawa ke engkeman lalu 74 persin ari responden pechaya raban orang ke ngiga kereja tu ulih mai penguntung ngagai sesebengkah kompeni enti sida diambi gawa.

Nya mih kebuah mayuh orang enda alit ati sereta ngembuan penemu ke madahka sida ke agi biak sereta nadai tentu bisi peneleba dalam pengawa deka tusah agi bulih pengawa. Besenutuk enggau nya,  nengah Program Transformasi Ekonomi (ETP) mayuh macham insentif benung dipejalaika perintah dikena nentuka raban nembiak diiri enggau pengelandik vokasional ti engkeman nyengkaum meransang sida ke udah bulih degree ngiga peluang aba latih industri lalu ngulihka peneleba ke mayuh agi nengah program besilih penemu entara sida ke udah bisi degree.

Nitihka ripot Randstad tu mega madahka 73 persin pengereja pengawa Malaysia pechaya pengereja pengawa ke agi biak umur seruran bulih pengawa ke baruh ari tikas pelajar sida.

Nya alai ngagai raban pemacha ke bedau bulih pengawa kemaya hari tu taja pan ngembuan pelajar tinggi anang bangat irauka buah kenang tu tang ambi iya nyadika teladan dikena kita mansang ngiga peluang matih diri dulu sereta ngiga peneleba gawa sebedau bulih pengawa ke engkeman enggau pelajar kita.