Orang ke bepanggai ba
bejalai dikena sida mutarka penanggul writer’s block tauka penanggul bukai
nyangka tau dikumbai betul laban bisi pansik baru ke madahka bejalai nya
sekalika ba dalam tauka di luar ulih meransang bepikir chara kreatif.
Pemansik ba Stanford University’s Graduate School of
Education, United States bisi mansik sereta ngaga eksperimen ngagai 176 iku
orang lalu asil ari eksperimen nya mandangka sida ke bejalai ari ke duduk tauka
diasur ngena kerusi roda meri respons ti kreatif ba peresa ke nguji bepikir
chara kreatif.
Pansik ke digaga sebedau tu bisi madahka besenam nengah chara aerobic bisi mai empas ti positif ngagai
pengulih kognitif tang pansik nya bisi meri tuduh penemu ti madahka bejalai nya
ulih meri efek ti sementara ngaga chara bepikir.
Raban pemansik bisi
nerangka kebuah sida meri fokus ngagai bejalai ari ke pengawa besenam ti regas
amat. “Ngasuh orang belanda 30-minit dikena ngemanahka kreativiti ukai pengawa
ti popular ngagai mayuh orang,” ku siku ari raban pengarang Dr Daniel L.
Schwartz. “Kami deka meda enti bejalai nya ulih ngemai runding ti lanchar sereta
kreatif.”
Bisi siti ari peresa ti
bejalaika, pemansik nyebutka siti objek lalu ngasuh siti raban ari 48 iku
nembiak bepikirka chara bukai lalu sida tau ngena objek nya. Ambika banding “kanchin”
nyangka tau ngasuh nembiak nyebut “pintu dango”.
Ba siti agi peresa, 48 iku
nembiak ditanya leka jaku ti bisi kaul enggau tiga raban leka jaku; ambika
banding “cottage-Swiss-cake”, lalu saut ti betul nya “cheese”.
Ari kemayuh nembiak ke
diuji lebuh sida bejalai, 100% meri idea ti kreatif ba sebengkah eksperimen,
lalu eksperimen bukai madahka 95%, 88% enggau 81% ari sida ke bejalai nya meri respons ti
kreatif bebanding enggau sida ke semina duduk aja. Enda milih sida nya bejalai
ba dalam tauka diluar sida ke bejalai nya endang meri respons ti kreatif. Taja
pan baka nya, utai ke bisi ngalitka ati nya lebuh diasuh mutarka sebengkah
penanggul ngena siti saut aja dia sida ke bejalai tu bulih skor ti baruh agi
bebanding enggau sida ke duduk.
Taja pan raban pengarang
madahka mayuh agi pansik patut dipejalaika tang siti pekara ti terang sereta
nyata iya nya “Nyerakka aktiviti fizikal dalam pengidup kitai ukai semina meri
penguntung ngagai atau kita aja tang ngagai untak kitai mega. Pansik tu udah
madahka chara ti mudah sereta produktif
ke ulih dipegulaika ba sekeda aktiviti,” pia ku raban pengarang pemansik
Dr Marily Oppezzo, ari Santa Clara University, California.
Journal of Experimental Psychology: Learning, Memory and Cognition. – AFP Relaxnews
Tiada ulasan:
Catat Ulasan