Belayaka lanting

Lanting nya sebaka reti enggau reta tengkira baka temuda, kebun etb. pemai apai indai lebuh seduai bebagi reta enggau bala anak seduai. Iya tau mega dikumbai ungkup pemisi tauka agih reta tengkira.  Artikel sekali tu deka ngenang senentang sekeda raban bansa Iban ke belaya enggau diri sebilik pasal reta tengkira nya baka kebun, senapang, rumah, tanah pesaka enggau utai bukai ke bisi dalam bilik ke ditinggalka Apai Indai.

Utai tu selalu nyadi maya apai enggau indai udah nadai, tauka maya apai indai udah tuai sereta enda ulih bekereja agi lalu diibun anak. Enti anak mayuh, barang sapa ke nyanggup deka ngibun apai indai nya mih ke ngempu reta tengkira. Tang bisi sekeda apai indai endang udah ditaga ke ngagai siku-siku anak laban ke nemu diri empu nyau enda dapat lalu enggaika anak sida belayaka reta tengkira nya.

Nitihka berita, kemaya hari tu apai indai bansa Iban nyau jarang amat magi reta  tengkira ngagai anak sida. Kebuah pia, ku sekeda penemu madahka apai indai enggai meda anak sida beserara diri menyadi.  Nya mih kebuah bisi sekeda apai indai enda ngasuh anak sida kediri. Bisi mega anak ke enda diasuh ngugi tauka nguai ke orang baikka iya nya anak indu tauka lelaki. Semua anak endang diasuh ngibun bilik.

Ketegal nya apai indai enda magi reta tengkira ngagai anak maya sida agi idup. Kemaya hari tu anak ke pandai sigi enda diau di rumah panjai. Semua sida tu deka ngidupka diri di nengeri. Sida meli rumah sereta bebelika reta tengkira kediri empu. Semina anak ke kurang pemandai ke enda ulih gawa di negeri aja ke ngibun bilik ngereja pengawa umai di rumah panjai. Belalauka peneleba penulis, apai indai sigi enggai dibai anak diau di nengeri, ambi  sida iya ulih lama diau di nengeri seminggu dua laban pengidup sida sigi ba rumah panjai.

Taja pan sekeda anak diau di nengeri, sida sigi meruan ingatka menua enggau rumah panjai. Sida agi bekirumka belanja ngagai apai indai di rumah panjai, nyaup bala menyadi ke diau di rumah panjai sereta sama-sama ngemansangka pendiau di rumah panjai. Ari nya tadi apai indai enda kebuah enda tepikir deka magi reta tengkira ke anak.

Anak ke gawa di nengeri mega endang disema baka orang ke bejalai. Kelia raban bansa Iban bejalai sampai ngagai Berunai, Miri, Sabah enggau menua bukai bekereja bekuli ba menua orang.

Tang pan baka nya kitai diri menyadi sigi enda ulih begulai sebilik selama-lama. Udah tentu mega tiap-tiap iku kitai ke ngidupka diri deka nirkai rumah tangga. Maya ti baka tu laya tau ulih nyadi antara diri sebilik kelebih agi enti begulai serumah. Naka ke udah diperatika, menyadi sigi ulih begulai enggau pangan diri tang ipar enggau bala anak enda.

Nya mih kebuah apai indai patut ngatur lanting sida ngambikka bala anak enda belaya enggau pangan diri. Baka nya mega anak ke tuai patut bepikirka utai ti baka tu, ngambikka enda charut dudi hari.