Orang Australia majak geduk

Lebih ari 736,000 orang besai tuai diatu nyau geduk lalu penyampau orang ke irau ati senentang sesebengkah pekara nya mega nambah ngagai 1.3 juta iku.

Orang Australia kemaya hari tu bisi dipeda kurang agi nginsap enggau ngirup  enti dibanding enggau lima taun ti udah tang sida dipeda geduk agi lalu balat agi ngembuan pengirau ati. Pia ku pansik ti digaga sereta dikeluarka opis pengerai menua.

Index pengelantang enggau pengerai tauka The Wellness Index udah digumpul firma ke ngumpul undi, iya nya Roy Morgan Research enggau inisiatif kompeni pengerai ti benama Alere. Dua gerempung tu udah mansik 50,000 orang Australia kenyau ari taun 2007 kena meratika gaya pengidup enggau penyakit sida.

Tuai Roy Morgan iya nya Michele Levine madahka penyampau indeks nya bisi mandangka pengurang dalam timpuh lima taun ke udah ketegal pemujur jalai nagang orang ngirup alkohol enggau nginsap ruku. Dalam timpuh lima taun kurang 1.1 juta gelas ai alkohol bisi diirup ninting minggu lalu bisi kurang 134,000 orang ke nginsap ari penyampau tubuh ke nyau semak 23 juta.

Tang taja pan baka nya bisi mega berita ke enda tentu manah. Ambika banding, bisi 736,000 tauka lebih orang besai tuai diatu nyau majak geduk. Pia mega penyampau orang ke bisi pengirau ati mega nambah ngagai 1.3 juta iku. 

Australia nya menua ti keterubah dalam dunya ti neritka adat pasal produk semakau ngambika ulih ngurangka pengawa nginsap. Iya mega nguji deka ngurang orang ngirup alkohol nengah chara iklan ari kimpin enggau chukai.

Indeks tu belalauka undi kira-kira 4,000 iku orang ninting bulan lalu digumpul ari 98 indikator dalam tujuh raban tanya iya nya – exercise, gaya pendiau saikologikal, pemakai bepengerai, alkohol, ruku, ubat, peninggu enggau pemerat.

Data tu deka dikena raban perintah lokal enggau menua sereta mega sida ba industri pengerai enggau gerempung komuniti nyidi pekara baka pemakai, exercise, nginsap, ngirup enggau stress.

Levine madahka isu ti bisi kaul enggau diet ti enda manah, kurang exercise, nginsap, ngirup enggau gemu. Tu udah ngasuh sistem pengerai bebelanja lebih ari Aus$60 billion (US$62 billion) ninting taun lalu data ke manah agi diadang ulih mutarka pekara tu.

Nitihka ripot ari OECD, Australia ditusun ba ranking ke-lima menua maju ke ngembuan mayuh orang gemu udah menua United States, Mexico, New Zealand enggau Chile. Ari penyampau tubuh di Australia, bisi 21% ari orang Australia nya nginsap, enti dibanding 24% di Britain enggau 29% di United States. Tu nitihka anggar ti digaga Gerempung Pengerai Sedunya (WHO). Menua ke duduk ba lumur satu nya Pulau Kiribati, iya nya 57%.

Nitihka WHO mega, siku orang Australia ngirup kira-kira 9.9 litre alkohol ninting taun bebanding enggau orang Britons ke ngirup 11.5 litre lalu pia mega orang Amerika ke ngirup 8.5 litre. Ba pekara tu menua Estonia ke pengabis mayuh ngirup iya nya kira 16.2 litres ke siku orang setaun.

- AFP