Pelandai Serebana Minyak Niki

Kitai serebana minyak niki dua puluh sen

Ukai ketegal kitai nya balat miskin

Kitai serebana bisi kerita

Ukai ketegal kitai ringatka Malaysia

Tang ketegal jaku udah enda nitihka semaya

Sempekat jaku danji udah enda dikingatka

Baka sempama jaku tuai bisi nelah

Baka kepayang ngadaka dilah

Mulut nyebut patung enda nyaut.

Kitai serebana baka rayat selama

Kitai ga ukai orang kaya raja

Tang bisi duit seringgit dua

Bisi reta bisi mega tengkira

Bisi mayuh kereban kemara

Tang jauh di seradak menua

Bisi iban semina ngitung duit syiling

Bekereja udu tang pengidup agi kating-kating

Rumah betiang banjang beatap senggang nadai siling.

Pengidup seruran tusah ati enda nyamai

Sekut jalai idup mesai lumut aping tembawai

Lantang jalai midang mesai tibang dua berimbai.

Udah ga nadai slip gaji

Nama disebut SOCSO enggau KWSP

Dani tumu turun belam pagi

Berempas pulai sehari-hari

Pulai kereja maya matahari mati.

Tang bisi bala kitai bejaku memanah

Enda ngilah baka orang perintah

Ke madah ubah pemansang nengeri.

Naka ke 20 sen ku sida ukai nya mayuh

Nama kebuah enggai enda chapuh

Serebana madah ngagai orang mayuh

Sigi banyak tai badak

Sigi mayuh tai nyumbuh

Tang lapa bangat deka kiruh.

Lapa enda gawa udu agi

Besampi kaut suh petara ninting hari

Nyangka jereki tau mudah

Nyangka tuah tau belimpah.

Randau kitai mayuh regau

Randau orang bisi reta

Randau orang kaya raja

Kenu ku Laut randau orang wibawa.

Tang sida ke di ulu nama utai temu

Sida ke di menua nadai utai didinga

Sida di menggeri bisi mih jalai raya

Sida di ulu semina bisi jalai batu

Nepan motosikal ba jalai alun

Uyut dima tayun-tayun

Duit mimit abis dikukun

Meli minyak besun-sun.

Motosikal lama nya sigi bisi

Baka nya ga injin pam ai

Kerita lama nganti maya

Kereja regas ari orang sarjana muda

Kereja rurus ari sida Phd tauka master

Ukai nya nama-nama

Dikena ngidup seput peranak semua.

Amat mih sida mimit reta tengkira

Amat mih sida mimit kereban perengka

Baka mensia ke kaya raja

Salah sida ku nadai gawa

Maya umur agi puda

Belajar sengapa kada

Tang kitai ke bepenemu

Minta kitai anang mayuh tuku

Anang kitai salah perening saru iching

Anang kitai saru peda saru sangka

Laban enti kitai selalu ngeraut sabut puting enteran

Lama laun tulih mih dengah

Enti kitai selalu belangkau di pala kerangan

Lama laun pan diampuhka bah.