Kitai
dipelabaka kala ninga tuduh penemu ari Chairman Institut Pengelikun enggau
Pengerai
Pengereja Pengawa Menua (NIOSH) iya nya Tan Sri Lee Lam Thye ke madah
aspek pengelikun ba kandang sekula patut bendar diperati enggau serius agi.
Iya ke
mantai penemu tu bepelasarka kes bebadi bala nembiak sekula ke baru udah nyadi
bedau lama ti udah ngujungka pemati. Kandang sekula kelebih agi kandang
sekula primari endang ngembuan risiko ke pengabis tinggi alai bala nembiak tau kena
kes bebadi kelebih agi enti nembiak nya datai tauka pulai nadai dibai apai
indai tauka penyaga sida.
Baka nya
mega ba kandang menua ke mayuh kerita baka ba kandang nengeri tauka genturung
pendiau ti udah bisi datai jalai. Nembiak mit nyangka bedau tentu nemu sentang
pengelikun jalai raya. Sida tau tak belanda sengapa tauka bejalai ba kandang
endur seraya ke nadai nangika kerita ke bisi mindah kin kitu.
Nya mih
kebuah udah nyadi tanggung pengawa apai indai enggau sekula ngatur strategi
enggau atur dikena nentuka penusah bebadi ngenyit enda nyadi ba tubuh nembiak
ke berundang ari rumah ke sekula. Sekula mega baka palan alai gawa patut likun
sereta kondusif alai bala pengajar enggau nembiak. Besenutuk enggau tu, raban
pengatur sekula patut semampai nemu bisi program ‘OSH In School’ tauka Pengerai
enggau Pengelikun Pengereja Pengawa di Sekula ke dipenyadika Niosh kenyau ari
taun 2009 suba.
Program
‘OSH In School’ endang ditaga ngagai raban pengajar enggau nembiak sekula. Tuju
program tu dikena narak sereta ngangkatka penemu sida senentang aspek
pengelikun enggau pengerai diri ba dalam enggau ba luar sekula. Sekula patut
ngatur program tu ketegal dua insiden ti udah nyadi bedau lama ti udah bekaul enggau pengelikun di sekula. Kena 1
October tu tadi siku nembiak sekula Pom Tiga di Perlis parai udah ti labuh ari
siling balai sekula iya. Siti agi kes nyadi ba sebuah sekula primari di
Keningau, Sabah kena 2 October 2014 lebuh siku nembiak koma udah ke labuh ari siling luar sebuah bilik kelas ba ringkat
dua sekula nya.
Pengelikun
ba sekula nyengkaum semua endur baka bilik kelas, kantin, padang enggau mega
geladak agu. Nembiak enggau pengajar patut nemu pugu pengelikun semua endur tu.
Nya mih kebuah Gerempung Apai Indai enggau Pengajar (PIBG) di sekula patut ngatur
sereta bejalaika program ti meri penemu ngagai apai indai tauka penyaga
ngambika sida sama-sama nyaup sekula nyaga pengelikun nembiak di sekula. PIBG
ke mega dipasuk raban Pasukan Relawan Malaysia (RELA) mega tau mantu nentuka
pengelikun nembiak kelebih agi sida ke berundang ari rumah ke sekula.
Pengelikun
ukai semina meri fokus ngagai maya sida ba jalai raya ba kandang sekula tang
mega nyengkaum pengelikun bukai baka ba kandang alai bemain tauka endur ke tau
ngasuh bebadi ngagai nembiak baka ba tebing sungai tauka pegung.
Enggau
atur pengawa ti baka tu dia kitai ngadang pengelikun nembiak sekula dijamin
lalu nadai ngasuh raban apai indai enggau pengajar nangi tauka kiruh ketegal
penusah ti deka nyadi. Raban apai indai enggau pengajar patut bendar besedia
nyaga pengelikun nembiak ukai ketegal ngajihka rangkang ngachuk mata.
Tiada ulasan:
Catat Ulasan