Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Sabtu, 27 Disember 2014

Kini kuing PT3 udah tu ila

Pemutus peresa PT3 baru udah pansut kena 22hb December 2014. Ari pemutus peresa nya mayuh amai raban pengajar enggau apai indai enda puas ati ke pemutus nya. Sida nadai chara bukai lalu nyalahka sistem enggau sida ke gawa ba opis pelajar kelebih agi Lembaga Peperiksaan.

Entara kebuah Penilaian Menengah Rendah (PMR) dikemaduka sereta diganti enggau sistem Penilaian Berasaskan Sekolah (PBS) tauka Tisih Belalauka Sekula enggau Pentaksiran Tingkatan 3 (PT3) laban peminta ari mensia mayuh empu awakka langkah rapat pelajar diperatika baru. PMR diperatika kelalu bepelasaraka peresa ngujungka iya muntanka pengawa bepikir enggau kreatif sereta ulah proaktif ba nembiak sekula.

Taja pia, lebuh diperatika chara PBS enggau PT3 dipejalaika di sekula dia kitai ulih nyimpul iya enggau jaku pandak madahka agi mayuh pekara ke patut diperatika sereta tanya ti patut disaut enggau rurus ati.

Tibak paragraf ketiga jaku Tan Sri Muhyiddin Yassin maya bulan March 2014 madahka, “PBS nya sistem tisih ti deka diguna kena nyamin pengulih siku-siku nembiak awakka enda agi ditisih belalauka peresa aja.”

Taja pia, enti diperati enggau silik dia kitai ulih meda visyen asal PBS patut bendar dipuji tang ujung hari nya baka ke udah rari ari menasan jalai ke bendar. Ari sukut realiti, PT3 ti nyadi komponen besai dalam PBS, agi dipejalaika baka peresa perintah lalu iya mega balat ngemeratka langkah rapat bala sekula ngagai pelajar.

Penerang Muhyiddin ke madahka PT3 nya deka nggantika PMR udah chukup madahka iya agi siti peresa perintah, semina iya dipakejka dalam tungkus ti bebida.

Pemutus PT3 agi diguna kena minta ngagai sekula MRSM, sekula agama, kolej vokasional enggau sekula buding penuh kelimpah ke ngengkah nembiak nitihka raban subjek sida di pom 4. Tu mega ngasuh bala nembiak agi tetap meri prioriti ngagai PT3.

Lebuh prioriti baka tu udah nyadi prinsip dia bala pengajar deka mega mansik format enggau tukuh tanya dikena sida nyediaka nembiak sida teknik nyaut tanya. Pekara tu deka ngasuh kitai agi dalam pusin betandu baka PMR suba iya nya pengajar ngajar nembiak ketegal peresa, pengajar ngajar format peresa, pengajar ngajar peresa lalu ukai ngajar penemu enggau pengelandik.

Pekara kedua ti deka kenang ditu nya bekaul enggau fokus tisih senentang sesebengkah subjek. Ambika banding subjek baka Kemahiran Hidup, nya siti subjek teras dalam PT3. Maya PMR suba, nembiak ditisih bepelasarka 40% peresa betulis sereta kereja kus nya mai 60% mark. Nengah chara tu, nemebiak mega ditisih bepelasarka pengawa enggau asil kereja kus sida.

Tang dalam PT3, mark diambi 100% ari peresa betulis lalu kereja kus nadai meri empas ngagai penyampau kesemua mark sida. Enti diperatika enggau silik langkah rapat tu baka ti belaban enggau prinsip tisih belalauka sekula nya empu.

Ba PBS, pengajar agi diasuh nyimpan data enggau nyediaka fail PBS nengah chara offline ti genap enggau pengulih nembiak ba tetiap bab, mark sida enggau evidens mega. Pengawa ti baka tu semina nambahka agi pengawa ngagai raban pengajar. Nama guna bisi fail kena ngerekod pengulih nembiak ba tiap-tiap bab ti diajar?

Nyangka siti ari kebuah iya nya kena ngemudahka raban orang atas nisih pengawa pengajar ari data nya. Tang enggau penyampau pengawa enggau kereja ke endang bisi, pengawa ti betambah nya semina nating raban pengajar sereta nguing awak enggau pengulih sida ari pengawa sida ke bendar iya nya ngajar.

Ba penemu aku, peresa perintah bepusat nya siti chara ti semitan kena nisih pengulih nembiak nengah chara rama. Nya alai iya patut bendar ditanka. Lebuh raban nembiak napi PMR tauka PT3, sida deka serius agi nampil pengawa belajar enggau ngajar ba dalam kelas.

Ari siti sukut, pengelebih PT3 enti dibanding enggau PMR nya diperatika ari bansa tanya ti bisi ke nguji Pengelandik Bepikir Tikas Tinggi (KBAT) sereta standard gred ke tinggi agi. Taja pia enti diperati enggau mata kasar atur pejalai opis menteri ti deka berubah ngagai tisih belalauka sekula enda tentu mujur laban kuasa besai peresa nya ba dalam PT3 nya empu.

Dikena ngamatka juluk ati asal PBS baka ke dipinta Muhyiddin dalam tibak teks jaku iya di atas, opis menteri ba penemu aku patut meratika tuduh penemu baka ke dirintai di baruh tu nyadi singkang keterubah dalam ngubah langkah rapat pelajar kitai ngagai tisih ke semitan agi bepelasarka sekula:

1. Ngemaduka pengawa ngaga dokumen PBS ke balat nating raban pengajar. Kena ngisi  data, ujian ninting bulan ulih nyadika pengukur pengulih nembiak kelimpah ari bup sereta keretas latih nembiak nyadika evidens. Nadai guna ti signifikan pengawa ke deka nambah berat kereja pengajar enggau dokumentasyen PBS nya.

2. Substance over form. Pengawa bejalaika projek baka kereja kus Sejarah enggau Geografi ulih dikemudahka agi enti hal baka format pendokumentasyen ditendurka agi. Nembiak patut diberi ruang nguji mayuh leman chara ari sukut ngenataika isi pekara. Enggau tu iya deka meransang kreativiti sereta ulah proaktif dalam pelajar.

3. Skema saut patut digaga enggau komprehensif agi. Siti pemanah tanya bansa KBAT nya nembiak mesti bepikir kediri empu. Tang taja pia, entara penanggul ti ditapi sida nya saut nembiak mesti bisi kaul enggau fakta ba dalam bup teks. Tu nyangka ngasuh nembiak bingung lalu kurang rentang ngagai nembiak enti iya ulih nyaut nitihka logik tang saut nya nadai dirintai dalam skema.

Enggau kenang tu aku meri tabi puji ngagai semua nembiak ke mujur napi PT3. Bebida enggau PMR ba taun-taun ke udah-udah, gred PT3 sekali tu meri kelai tikas pengulih ke amat-amat. Gred tu mega ngayanka pengajar ke udah diberi tanggung pengawa nisih nembiak nya majoriti iya sida udah bejalaika pengawa nya enggau rentang sereta ngembuan intergriti ti tinggi. Iya mega mandangka pemida pengulih PMR enggau PT3. Ngagai nembiak ke enda mujur dalam PT3 nya ukai pengujung dunya. Agi bisi dua taun alai kita belajar bebendar awakka ulih pas peresa SPM.

Nyangka PT3 tu mih pemujur ke amat ti patut ditan sereta dipajakka kitai. Tanda tu ngayanka kitai enda agi deka belalai ari pengawa manipulasika graf enggau sugar-coated reports aja dikena meda pemadas pengawa pelajar kitai.

Peranak menua Malaysia udah besedia napi realiti pelajar. Tabi puji! 

Tiada ulasan:

Catat Ulasan