Bisi Betul Standard

Selamat taun baru 2015 ngagai semua raban pemacha blog tu. Dipelabaka empai kelalu laun alai aku meri tabi taun baru ngagai kitai sebuat. Endang munyi sampi orang ke tuai aku mega bela ngarap kitai dalam taun 2015 tu bulih pengelantang enggau penyenang, bulih pengerai enggau penyamai, bulih tuah ke belimpah, bulih duit enggau ringgit, bidik lansik, iya ke kuli niki gaji iya ke pangkat besai bulih penyamai, iya ke bujang bulih bini lalu iya ke indu bulih laki, iya ke baru beruang bilik bulih anak bulih telesak, iya ke udah bepangkat aki enggau ini bulih uchu sereta ambu.

Bisi sekeda kaban ke nanya nama lama enda pansut ke ruai blog tu mantaika sekeda penemu ngambika bisi dibacha bala kami, pia ku sida. Ukai nama, mayuh dalih enti kitai nya enda ngereja pengawa ke udah selama jaga digaga kitai. Ujung taun enda baka selama kitai deka nutup bup lama sereta besedia muka bup baru, dia mayuh mih pengawa ke enda tau enda ditembu kena ngapuska taun. Kelimpah ari nya komputer ke nyadi tawing rat aku ngelama tu suah amai mantaika penanggul, nyangka iya nyau tuai sereta minta ganti. Kasih mega ke tudah komputer laban mayuh amat budi iya ngagai aku. Dibai aku ke ulu ke ili, ke pasar ke nengeri sereta ke ulu ai. Tang penanggul nya maya deka nyambung ngagai Internet tang nemu padam kediri baka orang ke luput. Dipasang baru idup mega seput tudah tuai. Enti asai ati sigi agi sayau amai ke komputer tu ukai ketegal enda ulih meli laban nyau udah tebalan dikena.

Nya mih ke deka dikenang aku sekali tu pasal siti prinsip ke suah dibantai tuai ke alai aku gawa suba. Prinsip nya dikumbai iya ‘bisi, betul, standard’. Taja pan iya udah nadai agi nyadi tuai aku tang prinsip nya manah amai nyadika lalau pengidup lebuh bejalaika pengawa enda ngira nya pengawa diri empu tauka pengawa ke diungkupka ngagai kitai. Baka ni iya ulih nyadika prinsip kitai ngereja pengawa dih?

Enti kitai ke nyadi apai indai tentu pun taun baka kediatu nya alai kitai nyendiaka anak kitai enggau kereban sekula. Nama kereban sekula ke bisi? Nama kereban sekula ke patut disediaka kitai ke nyadi apai indai, nya mih pekara keterubah ti patut diperundingka kitai. Baka nya mega enti kitai nya ngereja pengawa tentu kitai deka nemu nama pekara ke patut dikemisika kitai sebedau kitai ulih pejalaika pengawa. Enti kitai enda besedia dia kitai selalu betapi enggau penanggul sereta penusah ngujungka kitai ke anu tauka prujek kitai napi pengerugi.

Kedua, enti kitai udah bisi utai ke dikena, tauka kereban, enti apai indai udah nyendiaka baju sekula, bup enggau kereban tulis dia kitai patut nanya enti perengka ke disediaka kitai nya betul. Enti ank kitai udah niki ngagai pom satu tentu pekayan seraris sekula iya bebida lalu pia mega enggau bup tulis. Dalam ngereja pengawa mega kitai baka nya mega nentuka pekara ke deka kitai bejalaika pengawa nya betul.

Ketiga nya diperatika ari sukut standard. Kati pekara ke udah bisi kitai nya betul sereta standard nitihka peminta? Enti standard reti nya kitai udah mujur nyediaka, ngada sereta mansutka iya nitih ke deka orang mayuh. Enti baka apai indai semua perengka ke udah disediaka anak sida nya sebaka enggau enggi orang bukai. baka nya mega enti ba pekara kereja – kereja ke diasilka kitai nya nitihka standard ke deka orang ke nyadi tuai kitai.

Baka nya prinsip Bisi, Betul, Standard ke dibai aku kunsi enggau kitai sebuat sekali tu. Prinsip tu amat mih enda tentu dikemesaika tuai aku kediatu tang iya udah nyadi siti standard operating procedure (SOP) lebuh bejalaika pengawa besehari-sehari. Aku arapka prinsip baka tu ulih nyadika malin kitai lebuh ngereja pengawa.