ENTI
DIPERATIKA enggau silik, endang mayuh bida entara nembiak menua kitai enti
dibanding enggau nembiak ari menua luar kelebih agi menua ti udah mansang baka
United States enggau menua di Erope. Ba menua kita kitai, nembiak agi berat
bepanggai ba pengawa belajar enggau penuh nitihka turai pelajar sereta iring
raban pengajar tang ba menua ke udah mansang sereta maju dia sistem pelajar
sida nguna belajar ke begigaka penemu kediri. Tu dikemeranka sida kenyau ari
nembiak nya masuk ke dalam pra-sekula.
Asil ari
jalai belajar baka nya, nembiak berani agi ngetanka runding tauka penemu diri.
Sida landik belabanka penemu, betalat, bekelikuh enggau pangan diri. Sida mega
berani meri pejah jaku seruri, mantaika penemu ti manah sereta engkeman lalu
ngaga kereja kediri tauka chara beraban, enda ibuh minta saup pengajar. Mayuh
agi kereja nembiak ba tikas nya endang chara ngatika diri lalu nadai begunaka
bantu ari pengajar. Sekeda nembiak maya datai ke sekula sekondari udah mujur
ngasilka barang ke ulih diguna. Ari sukut umur, sekeda nembiak nya semina
ditemu penyampau taun aja laban perangai enggau ulah sida tuai agi ari umur
sida.
Ba menua
kitai, sistem pelajar begunaka nembiak belajar lalu pengajar ngajar. Ba menua
pesisir senario ti baka tu balat agi dipeda laban nembiak kelalu pasif, takutka
pengajar sereta malu betanya taja pan enda nemu nama utai ke diajar pengajar.
Semua aktiviti belajar endang bepanggai ba atur pengajar magang. Pengawa
belajar dalam sistem sekula kitai agi berat bendar bepanggai ba pengajar. Chara
belajar ti baka tu lalu dipajakka ngagai sekula sekondari datai ngagai institut
pelajar tinggi. Bisi nya lalu sampai ngagai maya udah bekereja.
Pekara
baka tu enda patut diteruska kelebih agi maya kitai deka nyingkang ngagai dunya
pemansang ari sukut teknologi enggau kaul chara global. Sistem pelajar menua
kitai patut seriran enggau juluk ati perintah ti deka ngasilka pengereja
pengawa sereta mudal mensia ti landik sereta pandai, kreatif sereta inovatif
lalu ngembuan peneleba ke dalam ba sesebengkah pengawa ti deka dikerejaka sida.
Ari pengelandik nguna teknologi enggau ICT, kitai ulih ngemujurka juluk ati
perintah ti deka meda menua tu mansang lalu semua nya belabuh ari nembiak.
Enti
chara belajar diatu dipajakka dia nembiak menua kitai deka majak pasif lalu
semina nerima penerang sereta enggau chara bekereja ti ulih ari bup tauka ari
pengajar aja baik nya ba sukut program akademik tauka ko-kuirkulum. Lebuh udah
badu besekula sida semina nembuan setipikit akademik ke bedau tentu ulih nyamin
sida bulih pengawa dalam dunya ke mansang maju baka kediatu.
Ba
pekara ke sama mega kitai udah jelungan ngeluarka mudah mensia ke chukup
kreatif sereta inovatif dalam mayuh bengkah bidang. Tu tentu pulaika pengerugi
menua kitai laban kitai enda tekeluarka mudal mensia ke diguna industri kemaya
hari tu.
Enti
nunda sekula enggau institut pelajar tinggi seruran agi ngiga jalai ngangkatka
tikas chara belajar kena ngulihka pemandai enggau pengelandik. Kebuah pia,
aspek tu mih ti ulih nentuka tikas pengelandik nembiak sereta pemujur menua tu
ngubah sistem belajar ari satu era lama ngagai era baru. Pekara tu bisi kaul
enggau pengawa ngubah kurikulum nitihka pemansang kemaya hari tu.
Naka
kediatu kitai sama bela nemu udah mayuh ubah udah digaga dalam sistem pelajar
menua tang asil iya agi kurang ngemuaska ati. Pengawa ke meransang pelajar
teknikal enggau vokasional nya siti ari langkah rapat ti positif lalu kitai
arapka nya sekeda ubah ti ulih mantu ngangkatka tikas kualiti nembiak ba menua
tu.
Siti agi
chara kena ngangkatka tikas kualiti nembiak nya meransang sereta ngemasukka
program sekula amanah dalam kurikulum dikena ngerembaika ubah pemansang sistem
pelajar menua. Sekula amanah nya siti ari tanggung pengawa ke alai sesebuah
sekula nya diambu sida ke bisi autoriti. Sistem pelajar dalam sekula nya deka
diatur nitihka sistem pemadu baru ke alai pengajar enggau nembiak nguna
teknologi enggau chara baru belajar ngulihka penemu.
Pemutus
penemu ke deka ngemaduka sekeda peresa mega siti singkang ti positif laban iya
ditemu nadai agi engekeman enggau singkang pemansang dunya nembiak. Runding
enggau pikir rayat mega patut berubah nitihka peminta kemaya hari tu ke alai
sistem sekula ulih ngasilka pengereja pengawa ke landik, bepenemu, kreatif
sereta inovatif lalu bekualiti kena nangkup peminta industri kemaya hari.
Pemutus
peresa enggau setipikit akademik aja bedau ulih nentuka pemujur nembiak ba
arena pengereja pengawa. Program sekula ke baru dipejalaika diatu baka program
siku nembiak siti main, akitiviti pengarap enggau mayuh agi program ti bukai
nya sekeda program ti ulih ngangkatka kualiti nembiak. Nya alai kitai arapka
semua ubah dalm sistem pelajar menua tu deka nyaup mantu ngasilka mudal mensia
ke bekualiti agi dalam semua aspek.
Tiada ulasan:
Catat Ulasan