Sekeda ari rayat menua tu bebelanja lebih ari gaji setaun
sida dikena sida meli produk ti ukai barang ti diguna sida besehari-sehari baka
sempama jaku tuai madahka besai beliung besai abak.
Nitihka pansik Indeks
Keutamaan Pembelian Pengguna ti dipejalaika MasterCard Worldwide madahka
bisi 79 persin rayat Malaysia bebelanja lebih 10 persin ari gaji setaun sida
bebelika barang baka kasut, pekayan enggau aksesori lalu 15 persin ngena lebih
40 persin ari gaji setaun sida kena meli barang ti sama. Kira-kira 59 persin diagih
kena perindang enggau pemakai, 49 persin ke pengawa nemuai enggau fesyen lalu 42
persin diabiska ngagai aksesori.
Pansik tu mega mandangka 70 persin penguna ba rantau
Asia Pasifik deka berengkah nyekatka belanja sida ngagai barang ti baka tu
jemah ila.
Perindang enggau pemakai nya pekara ke pengabis tinggi
alai raban penguna bebelanja. Tu diperatika ba 11 ari 14 buah menua di Asia
Pasifik enda nyengkaum India, Korea enggau Filipina. Ba menua tu gaji setaun
sida balat agi dikena ba belanja pelajar anak-anak sida. Taiwan, Filipina enggau
Korea nya menua ke deka ngurangka belanja sida enti banding enggau New Zealand,
Australia enggau China. Menua tu udah bisi mandangka daya pengetan.
Pansik ti dipejalaika ninting taun tu mungkur kira-kira
6,019 penguna ba 14 buah pasar di Asia Pasifik sereta digaga sepemanjai bulan September
ke udah.
Ari sukut penempa, dia 69 persin penguna lelaki diperatika
kurang agi deka ngurangka belanja sida enti dibanding enggau sida ke indu ti
ngeletak 71 persin gaji dibelanjaka sida. Raban ke berumur 30 taun ke baruh mega
diperati kurang agi deka ngurangka belanja sida enti dibanding enggau sida ke berumur
56 taun ke atas.
Tiada ulasan:
Catat Ulasan