Chebur-chebur
bejaku nya orang ke panchar bejaku tauka mantaika penemu ti kasar ke tau nyima
ati orang bukai.
Di Afghanistan, siku
indu ke benama Farkhunda, bisi ngembuan diploma dalam penemu Islam sereta
dikumbai ulih ngapalka al-Quran udah balat bendar dijamah mensia mayuh ketegal
ku sida iya tu tadi udah nunu bup kudus al-Quran. Iya ukai semina dijamah tang
mega ditunu idup-idup. Berita ti baka tu seruran bendar didinga kita lalu iya
majak didinga kitai. Tiga taun ti udah, insiden ti sama mega nyadi di Pakistan.
Siku lelaki udah diirit mensia mayuh ketegal nunu al-Quran lalu iya mega udah dipanjah
enggau minyak petrol sebedau ditunu.
Isu baka tu ukai semina
nyadi dalam konteks pengarap Islam aja tang mega dalam pengarap bukai, lebuh
komuniti nya ngukum pesalah ke dikumbai sida udah ngelanyaika pengarap sida. Dalam
kedua-dua pekara ba atas, sapa kini ke salah? Seduai tu dikumbai salah laban
ngelanyai pengarap tauka sida ke ngukum pesalah nadai nengah jalai undang-undang?
Tu mih dikiraka fenomena
psikologi. Emosyen tauka pengasai ati mensia ulih ngubah utai ti normal tauka
selama nyadi ukai selama. Bisi orang endang nadai niat deka ngelanyai pengarap
iya tang nyangka ketegal penyilap ngasuh sida nyau tepawah ngereja pengawa ti
tau ngasuh mensia mayuh ngeligan.
Mensia mayuh ke ngukum
pesalah mega ukai reti nya sida orang ti taluk sereta nitihka ajar pengarap. Tang
ketegal tekuing runding enggau penemu sereta pengawa orang bukain ngujungka
sida mega sama enggau pengawa ngemediska orang.
Dalam psikologi, tu mih
ke dikumbai taluk. Bisi orang dipejal ngereja sesebengkah pengawa ti digaga orang
bukai ukai ari pengeka sida iya. Tang sida dipejal ketegal nitih sada nyawa majoriti
laban nangika dianggap orang bukai dalam raban nya.
Fenomena ke taluk sereta
nitihka penemu orang tu tau nyadi aba dini-dini endur. Ambika banding maya baum,
bisi maya kitai enda ulih enda besetuju enggau penemu mayuh taja pan kitai
nyangka enda rindu ke penemu nya.
Dalam konteks pengarap,
fenomena baka tu tau nyadi utai ke ulih ngerusak enti enda ditagang. Dalam kes
ngelanyaika pengarap tadi, orang ke ngereja pengawa nya nyangka siku orang ti
salah ketegal ti udah chebur-chebur bejaku tauka mantaika ulah ti belaban
enggau ukur ulah pengarap. Nambahka nya mega ngakim nengah media massa suah ninggalka
proses pengerentang nitihka menasan jalai pengarap. Sida seruran agi enda
mansik enggau rurus tang balat agi bepelasarka asai ati ti muras maya nya.
Taja pan orang ke
ngelanyai pengarap nya orang ti salah, sida ke ngukum orang nya mega nyangka
enda ngasaika pengawa sida ke nyamah sereta munuh mensia mega sebengkah pengawa
ti enda ulih diampunka.
Nya alai, tiap iku orang
patut bejimat maya bejaku tauka ngereja sesebengkah pengawa ti bisi kaul enggau
pengarap. Taja pan kitai nyangka nadai ngembuan niat deka ngelanyai pengarap, tang
suah agi mensia mayuh ngukum orang bepelasarka emosyen enggau berita angin.
Mensia mayuh deka terus
pechayaka pekara ti didinga lalu besetuju enggau berita nya taja pan sida nadai
meda utai ke nyadi. Tu mih ke dikumbai illusion of unanimity (ilusyen besetuju).
Sesebengkah pekara ti dipejuraika
mensia mayuh dianggap nyadi utai ti udah disetujuka sama diri. Tu ngujungka
sesebengka objek tauka tagit ti dikumbai salah nya tadi deka akan dikumbai orang
ke balat dipegedika sida.
Taja pan kitai nyangka
nganggap hal ti baka tu enda patut nyadi, tang nya mih fenomena psikologi mensia.
Ba Malaysia, kemaya hari
tu kitai seruran ninga pasal kes-kes ngelanyaika pengarap. Iya nyangka digaga orang
ke lain pengarap tauka dikereja orang ke pengarap nya empu. Orang ti ngereja
pengawa tu nyangka ngembuan kebuah bukai sereta ukai tuju sigi deka ngereja
pengawa ngelanyai.
Tang ba mata mensia
mayuh nyangka lain mega. Pekara ti enda manah deka nyadi enti iya dipungkal
orang ari pengarap bukai laban iya dikira udah masuk nyarut pengarap orang
bukai. enti kitai enda tentu apal enggau sekeda hal tauka enda besetuju enggau
sekeda penemu pengarap, dipelabaka manah agi tak diau diri ari ke masuk leka
jaku.
Leka jaku kitai ke mimit
nya nyangka tau nyadi penanggul ti besai ngagai orang bukai. Nama agi dih enti kitai
nya semina orang rama sereta nadai dijaga sapa-sapa.
Nya mih kebuah pengawa
ti dipejalaika sida ke penerit adat nyangka pengawa ti patut dikerejaka sida. Sekurang-kurang
iya ulih nagang pekara ti jai nyadi. Reti nya sida penerit adat deka nguna aspek
undang-undang dikena ngukum tauka ngelepaska pesalah. Iya dipeda manah agi ari
ti ‘diakimka’ mensia mayuh ke bepelasarka pengasai ati atas nama pengarap.
Kitai semua semina mensia
selama, kitai mega seruran ngaga penyilap, orang bukai mega bisi maya iya tepansutka
jaku ti enda disengajaka sida. Jalai ti pengabis manah iya nya anang ngelakka
iya disaraka belama laban iya tau ngujungka hal ti enda manah nyadi. Aram mih
kitai sama-sama nyaga pengarap kitai.
Tiada ulasan:
Catat Ulasan