Pengawa nyadi
profesor sereta ngembuan PhD tiru tauka pelsu nya seruran amat didinga kitai
ngelama tu. Pengawa tu nyadi ketegal bisi kebuah ti nyata. Tu bepun ari niat ke
deka ngakal ngambika bulih juluk ati ke dekaka degree. Indah ba sekula kemaya
hari tu pan bala kepala pengajar, raban pengajar enggau bala nembiak udah mupuk
ngakal lebuh maya peresa sereta maya ngaga kereja kus tauka pansik. Bisi kepala
pengajar nya nyau mejal pengajar ngasuh sida nulung nembiak meri mark tinggi
ngambika sekula sida manah nama sereta mayuh orang pas kenu ku jaku. Enti sekula,
kepala pengajar enggau raban pengajar udah ngajar nembiak ngakal baka ni kitai ulih nempa mensia ke manah dudi hari ari
sukut ukur moral enggau etika?
Baka nya
mega enggau pengawa profesor pelsu sereta sida ke ngembuan PhD tiru. Bedau lama
ti udah (Berita Harian 4.2015) madahka Majlis Profesor Negara (MPN) bisi
bejadika bup Malin Guna Gela Professor kena ngangkatka kredibiliti profesion
enggau imej raban akademik di Malaysia. Bup tu dikena nerangka pengawa besalahguna
gela profesor ba pun nama tauka kad nama. Indah nya, udah mayuh orang
nyalahguna degree Sarjana Kedoktoran (PhD) sekalika nya dibeli nengah chara
online, diplagiat tauka ngupah orang nyediaka tesis ke tuju ngakal enggau
komersial.
Mayuh kes
baka tu udah nyadi baik nya di Malaysia tauka ba menua tasik nyengkaum menua
maju ke udah nyadi hab pelajar tinggi. Beberapa taun ti udah, Pengarah Kanan
enggau Tuai Pemesai Bagi Pengawa Pemadah ke suba ari Opis Pengelikun Dalam
Negeri Amerika Syarikat (AS), Laura Callahan udah ngemaduka diri ari pengawa
iya ketegal udah ditemu meli degree Keterubah, Masters enggau PhD nengah chara
online. Kes tu ngeruga pengelikun Rumah Putih laban diperatika sida dia baka ke
nadai meresa tirai juru iya sebedau ngambi iya gawa.
AS ngeluarka
50,000 degree PhD ngagai serata dunya, ke berega RM3.6 billion (AS$1 billion)
setaun. Di Pakistan mega mayuh universiti udah nyirika profesor ti ngembuan PhD
tiru. Tu meri empas ti negatif ngagai kredibiliti univerisiti nya. Pengawa ti
berambika ‘profesor jampat’ tu balat bendar ngerusakka imej enggau kualiti
pelajar kelebih agi ba bidang perubat. Di Russia, degree pelsu ulih dibeli
enggau rega RM3,000. Bisi mega sindiket ngeluarka degree pelsu ngena nama
Universiti Harvard, iya nya palan pelajar tinggi ti pengabis manah di dunya,
enggau rega RM120,000.
Sedia servis degree pelsu
Kelimpah
ari nya, bisi laman web nyedika servis ngeluarka degree pelsu, nyengkaum PhD
ari palan pelajar tinggi enggau bayar RM240 aja. Penyedia servis tu balat agi
narit ati lebuh orang ke minta laban sida sepeneka ati milih bidang ke dekaka
sida tauka universiti ke alai sida ngisi degree pelsu sida nya.
Degree pelsu
ba universiti di Malaysia berengkah ditemu bepun ari kes ngakal kena ngulihka
degree ari Universiti Sains Malaysia (USM). Kelimpah ari kes setipikit pelsu
USM, Polis Diraja Malaysia (PDRM) mega bisi muntanka sindiket bejualka setipikit
pelsu ke berega RM5 juta, kiraka ari lima buah universiti ari menua tasik. Sida
ke meli degree tu nyengkaum orang ari raban politik enggau individu ke digela
Tan Sri.
Rega degree
udah ditetapka nitihka bansa, ambika banding: RM6,500 ungkup degree keterubah,
RM88,500 ke masters sereta RM10,500 ke PhD dalam mayuh bengkah bidang. Universiti
ke bisi puni enggau pengawa tu nyengkaum Universiti Rockhampton, Universiti
Harvey International, Universiti Cannington Brook enggau Universiti Charles
Molnar.
Mayuh amat
orang ke dikira udah ‘sut’, kelalah sereta rindu ngakal ketegal deka ngena
jalai puntang, jampat sereta enda ibuh belajar ngambika bulih degree enggau
mudah. Dalam timpuh tujuh hari aja sida udah bulih degree tang nembiak ba
universiti ngabiska tiga ngagai enam taun dikena sida ngulihka diploma enggau
degree.
Ukai nya
nyamai ngulihka PhD laban iya begunaka awak ti panjai. Ukai semina muai hari
tang mega duit ringgit enggau ruang bilik. Pengawa sekeda ari sida tu endang
enda rentang ngagai sida ke ngembuan degree ke amat. Sida ke enggau masuk kes
ngemelsuka degree tu suah agi dipeda orang ke landik bejaku tang isi jaku sida
nya rugang lalu semina ulih disidi sekeda pakar lebuh dibanding enggau pemutus
ke diulihka sida. Suah agi sida ke enda mujur dalam pelajar endang deka agi
minta dipebasakan orang kelebih orang ke baru dikelala sida. Sida rindu dipeda
ngembuan penemu tinggi, bepengelandik sereta ulih nyadi pakar penyanding
penemu.
Ngakal orang bukai
Sida enggau
temegah ati ngumbai diri ‘Dr’ enggau profesor taja pan sida semina belajar naka
Pom Tiga tauka Pom Lima. Bisi sida ngena
gela ‘Dr’ enggau profesor maya sida diambi nyadi pakar meri jaku peransang,
MLM, penjual produk kosmetik enggau raban orang dagang. Sida tu mayuh bulih
pangkat tinggi baka pengarah enggau perunding dalam sesebengkah gerempung sereta
mega mudah bulih kontrek projek.
Pekara bansa
tu ditambah mega enggau ulah mensia mayuh ke mudah arapka chara sida tu bejaku.
Sida nadai kiruh deka nemu tirai juru pelajar sida tu kelimpah ari ke meda rekod
jenayah peminta pengereja pengawa. Suah agi sida tukang ngaji pengawa enda ngemeratka
status pelajar orang ke minta pengawa ngujungka pengawa bebelika degree,
masters enggau PhD pelsu majak nyadi senyadi.
Siti palan
nyimpan data graduan mesti ditumbuhka kena nyeliahka kes ngemelsuka degree. Semua
setipikit patut dichelak Opis Penyelak Nasional ngambika ngembuan tikas
pengelikun ti tinggi. Orang ke begela Tan Sri, Datuk, raban orang dagang enggau
pakar jaku perangsang sigi dichapka nadai beintegriti. Sida patut ngasaika diri
salah laban ngembuan degree pelsu sereta sanggup ngena gela doktor tauka
profesor.
Sida tu
patut malu ngagai mensia mayuh sereta diri sebilik enti status pelajar sida
udah ditemu orang. Endang patut ditinggang ukum baruh Seksyen 471 enggau 468
Kanun Keseksaan ketegal nguna setipikit pelsu. Enti ditemu salah sida tau
diukum enda lebih ari tujuh taun enggau ukum mata duit tauka kedua-dua nya
sekali. Pengawa nguna setipikit pelsu patut ditagang ari terus ngerekai
enggaika jemah ila bisi disalahguna orang luar lebuh Malaysia nguji deka nyadi
menua alai hab pelajar tinggi.
Tiada ulasan:
Catat Ulasan