Bantu perintah ngagai SIDS enggau Komiti Pantun Iban, Kapit

KAPIT: Chairperson Serakup Indu Dayak Sarawak (SIDS) Pampang Kapit, Rheinald Minor Panyau enggau Chairperson Komiti Pantun Iban Kapit,Yong Aji meri besai terima kasih ngagai Sapit Kepala Menteri Datuk Patinggi Tan Sri Alfred Jabu Numpang ketegal sukung iya ba pengawa ngelakuka Pantun Iban Kapit nengah agih belanja ke udah dimendarka iya ungkup dua bengkah serakup tu ngatur sereta bejalaika aktiviti narit mayuh agi orang rinduka pengawa bepantun sereta tebuka ati belajarka pengelandik main asal nya.

Dua bengkah serakup nya, SIDS enggau Komiti Pantun Iban Kapit, ku Minor madah, bekunsika batang pengawa ngatur ‘kelas pantun’ berengkah ari May 2015 tu ngambika mayuh agi orang belajar ngulihka pengelandik ba pengawa main asal kelebih agi Pantun Iban laban tu sebengkah ari main asal bansa Iban tauka Dayak sereta selalu dibantai maya ngelaluka temuai tauka pengabang ba sesebengkah pengerami.

“Ngarika SIDS pampang Kapit enggau Komiti Pantun Iban Kapit, kami deka meri besai terima kasih ngagai DCM Jabu ketegal pemanah iya nyukung Kelas Pantun Iban ke empai kala dikemujur ketegal nadai belanja.

“Diatu ngena agih belanja RM15, 000 ke udah dikemendarka ungkup kedua-dua serakup, SIDS enggau Komiti Pantun Iban Kapit, kami deka begulaika agih belanja tu ngemunka Kelas Pantun Iban kena narit mayuh agi orang ngembuan pengerindu nyereta pengawa pelajarka seni enggau pengelandik pantun Iban.

“Kami besai bendar pengarap jemah ila, agih belanja tu deka diberi ninting taun enggau nya kelas tu ulih diatur ngagai raban orang ke belajar,” ku Minor bejaku sepengudah dua bengkah serakup nya nerima geran ari Jabu, ke disuaka Sekretari Politik Kepala Menteri, Jefferson Jamit Unyat di sebengkah hotel ditu, ensana.

Iya madah ‘Kelas Pantun Iban’ tu deka berengkah dipejalai kena bulan Mei 2015 tu bepalan ba Hotel Meligai tiap Hari Enam. Kami deka meri subsidi token ngagai tiap iku orang ke masuk kelas nya tiap kali sida datai ngagai kelas sereta nyediaka perengka pengangkut enggau pemakai sida. Kelas tu dipejalaika dua jam tiap sesi latih sereta tembu lapan jam dalam kandang sebulan.

Tiga iku tukang latih ke anda dalam pengawa pantun udah dipadu megai tanggung pengawa nya nyengkaum Madam Yong Aji, Burai Sebau enggau Mr Inting. 

Jefferson Jamit Unyat lebuh bejadika pengawa nya madah, geran ke diberi ngagai dua bengkah serakup nya bela RM15, 000 sebuah serakup datai ari DCM Jabu. Iya madahka Jabu udah nyua ke iya chek rambau Aum Kunsil Nengeri (DUN) minggu nyin kemari. Iya nandu, agih belanja nya dikena ngatur aktiviti seraya minta dua bengka serakup tu meruan aktif bejalaika pengawa sida.

“Pantun Iban Kapit sebengkah ari main asal Iban ke ngembuan pemanah sereta nyelai ari pantun menua bukai. Tang ukai semua orang nemu sereta ngelala pantun tu. Nya kebuah pengawa ngelakuka main asal tu nengah kelas belajar bepantun ngambika narit mayuh agi orang masuk kelas nya. Pantun tu sebengkah ari main asal raban bansa Iban sereta seruran dibantai lebuh maya ngelaluka temuai tauka pengabang niki rumah panjai maya pengerami. Atur pengawa tu mega suah disempulang enggau pengawa miring. Tu mih chara bansa Iban meri basa ngagai temuai,” ku Jamit.

                                                                                             Dibali ari Utusan Borneo