Macha ngubah chara
siku-siku orang bepikir pia ku Angelo(1982). Dalam arus pemansang teknologi macha
nya siti pekara ti patut bendar dikerejaka kitai enti kita bisi ati deka
ngangkatka tikas pemansang bansa. Ba nembiak sekula baikka iya di sekula
primari, sekondari, kolej tauka universiti, pengawa macha endang siti pekara ti
dikemeranka sida dikena begiga sereta nambahka penemu.
Mus Chairil (1997) madahka minda ti disukung enggau
penemu ti formal deka mantu orang lebuh sida meratika utai ti nyadi ngelingi
pengidup sida. Reti nya minda patut diisi enggau penemu sebedau kitai ngereja
sesebengkah pengawa. Macha nya siti aktiviti mental kena kitai ngisi penemu
ngagai minda kitai.
Nitihka Kamus Dewan (1984), reti macha nya pengawa ti
meratika enggau silik isi pekara ti ditulis tauka dichelak sereta enggau naka
ulih meretika pekara ti disebut dia. Christine Nuttal (1989) nerangka reti
macha nya bepanggai ba tuju orang ke macha. Reti nya tiap-tiap iku kitai sigi
bisi kebuah kediri empu macha sesebengkah pekara.
Kemaya hari tu kitai enda ulih ngerarika diri ari pengawa
macha. Kenyau ari pengawa besekula ti diaturka perintah dia macha nya nyadika
pugu pengawa besekula. Macha nyau nyadi siti budaya tiap-tiap bansa di dunya.
Nyadi pengawa macha udah berengkah nyadi budaya mensia kenyau ari kira-kira 156
taun ti udah lalu (Dewan Masyarakat;1998). Enti kitai beratika nyau deka semua
pengawa besehari-sehari kitai nya bisi bekaul enggau macha. Ambika banding,
kitai tentu bendar bisi macha bup malin telefon, statistik, lalau ba botol
ubat, diari, kar, surat kirum, taga jam (jadual
waktu), notis enggau pom.
Orang ti enda nemu macha nya dikumbai buta urup. Ba
Malaysia, penanggul enda nemu macha tu nyau jauh bendar kurang sereta ukai siti
penanggul ti besai. Nitihka pansik, nyau deka 90% iku orang di Malaysia nya
nemu macha. Taja pia penanggul ti berat bendar diperatika nya macha tu ukai
budaya orang Malaysia. Pansik ti dipejalaika Perpustakaan Negara madahka rayat Malaysia semina macha siti bup
setaun. Nya pan bup ti bacha baka bup majalah, kartun sereta ukai bup bansa
akademik. Budaya macha rayat Malaysia agi jauh bendar tinggal enti dibandingka
enggau rayat menua Jipun enggau menua di Eropah.
Kelimpah ari nya, budaya macha ulih dipansik ari pengawa
ti digaga tiap-tiap iku orang di nyadi kaban librari rama. Di menua kitai,
pengawa tu bisi bendar ngayanka pemansang tang iya enda tentu jampat, agi
mansang beseranyat. Dalam taun 1998 bisi 10.96 persin orang udah nyadi kaban librari
rama. Penyampau tu betambah ngagai 11.26 persin dalam taun 1999.
Kemaya hari tu pengawa bebachaka sesebengkah pekara
endang enda ulih diseliahka kitai kelebih enggau penatai pemansang teknologi
pemadah baka Internet. Macha ukai semina nyengkaum macha lumur bas, nama rumah
tang nyau jauh lebih ari nya.
Harris enggau
Sipay (1990) madahka macha nya ngundan ukur pemanah akademik, ekonomi, sosial,
politik enggau ukur pemanah ngagai diri empu. Ba nembiak sekula, macha ngundan
ukur pemanah akademik. Shukri (1998) madahka macha nya pengawa ti berat sereta
patut diperatika kelebih agi ngagai nembiak ti besekula sereta bisi ati deka
mujur dalam pengawa sekula. Tiga suku ari pemujur nembiak dalam bidang akademik
endang bepanggai ba pengawa macha pekara ti dipelajarka sida.
Ukur pemanah akademik dalam pengawa macha ukai semina
ditujuka ngagai nembiak sekula tang mega nyerangkung semua genap lapis rayat.
Kebuah pia, laban ari kitai ti bebachaka sesebengkah pekara, dia penemu kitai
deka betambah ari selama. Pengawa baka pengajar, lawyer, doktor enggau mayuh
pengawa bukai endang seruran ngemeranka aktiviti bebachaka pekara ti bekaul
enggau pengawa sida kelebih agi ngagai sida ti bisi ati deka nambahka penemu
sida. Pemansang enggau ubah teknologi nyadika kebuah tiap-tiap bansa pengawa
patut nambahka penemu sida. Nyadi siti ari chara nya macha.
Budaya bebachaka mai ukur pemanah politik ngagai sida dipadu
nyadi tuai-tuai menua sereta ngagai sida ti nyadi tuai ba sesebengkah opis
baikka ba opis perintah tauka opis kompeni. Macha ulih mantu orang-orang politik
ngelanggurka pemansang ti deka dipejalaika sida. Kelimpah ari nya, penemu dalam
sejarah megai menua ulih dikena sida nyadika teladan lebuh merintah sereta
megai menua. Pengulih penemu nengah pengawa macha ngasuh raban politik ngembuan
penemu ti dalam sereta tuai agi runding kelebih agi lebih mutar penanggul
rayat. Sida dipeda profesional sereta ngembuan runding ti rasional lalu enda
mudah muras enggau emosional lebuh dipungkal sereta ditanjal raban bala
penyakal.
Rayat ti ngemeranka budaya macha enda mudah tekuing
runding sengapa. Pengelandik macha sereta nyerenih ngena chara kritikal
sesebengkah pekara mantu orang nya ari
bepikir enggau dalam agi sebedau sida ngaga pemutus penemu. Sida mega enda
mudah tepawah runding sereta mudah nerima sebarang pekara ti dibacha sida.
Ngagai sida ba bidang ekonomi baka orang ti ngemeranka
pengawa dagang, macha mantu sida meratika pemansang pengawa dagang sereta meri
penemu dikena sida ngaga analisis bekaul enggau prestasi saham sereta enggau
pengawa ti beranakka puku.
Orang ti rindu sereta suah macha ulih enggau masuk mayuh
macham aktiviti ti bekaul enggau pengawa macha. Sida ulih enggau masuk pekit
kuiz, bejaku ba mua mayuh, nulis karang sereta mayuh aktiviti bukai ti
engekeman. Kelimpah ari nya, sida tentu teulihka peneleba sereta perais ari ti
enggau pengawa ti baka tu.
Orang ti mekuh pengawa nulis mega patut ngembuan
pengerindu macha dikena sida nambahka penemu enggau penau dalam bidang ti deka
dituliska sida. Penulis ti mayuh macha macham pekara diperatika lanchar agi
nulis ari sida ti enda tentu macha. Sasterawan Menua, A Samad Ismail (The
Star;2001) madahka macha enggau nulis disemaka baka isi enggau kukut, reti nya segulai
sejalai enda ulih timpang. Nitihka
peneleba iya empu, iya endang suah macha karya orang bukai dikena ngulihka pun
inspirasyen ngambika enda bansu nulis.
Pengulih sesebengkah menua tauka kompeni bepanggai ba
pemandai orang dalam bidang eknomi. Pemandai ukai semina datai ari peneleba
tang mega datai ari ulah ti rindu macha mayuh bengkah pekara ti bekaul enggau
pengawa ti dikerejaka sida. Nya alai kitai seruran ninga produktiviti kompeni
tidak enda tentu mujur ketegal pekereja sida ti kurang ngembuan pengerindu
macha sereta penemu enda dikena lebuh ngangkatka asil produktiviti. Penemu ti
dalam datai ari ulah ti rindu macha.
Dalam taun enam puluhan penyampau pengeluar surat berita
Melayu jauh bendar kurang laban mensia mayuh maya nya endang agi kurang macha. Ba
jeman enam puluhan penyampau pengeluar enggau tauke surat berita dalam jaku
Melayu agi mimit ketegal penyampau pemacha nya mimit laban komuniti peribumi ke
nemu macha (Pusat Bahasa USM:1999) nya mega mimit. Ketegal ke nadai raban bumiputera
ti relatif iya tegap be penuduk ekonomi maya nya ngasuh pedagang enggau
pengeluar surat berita enda bulih penguntung ti besai ari dagang nya. Tu chunto
jalai budaya macha meri empas ukur pemanah ekonomi ngagai raban pedagang surat
berita.
Budaya macha mega meri ukur pemanah sosial ngagai semua
raban komuniti enti diperati ari sukut rama. Macha ulih ngelepaska minda laban
iya ulih meri idea, penemu enggau peneleba orang bukai ngambika minda semampai tebuka.
Kebuah pia, sesebengkah komuniti nya enda mudah diruga runding orang ke jai ti
ulih ngerusak ukai semina raban komuniti nya tang mega menua. Raban komuniti ti
enda tentu macha nyamai amat diasuh ngaga sesebengkah pengawa lalu tu ulih mai
empas ti negatif enti diteju pia aja.
Dalam era kolonialisme, sukut pelajar endang enda dikemeratka
laban sida ke megai menua maya nya nangika pelajar nya ulih mai empas ngagai
tikas runding rayat ti pegai sida. Siti chunto ti nyata amat nya maya jeman perintah
British North Borneo di Sabah. Lebuh betukar perintah rayat Sabah maya nya
nadai mantah laban sida nadai nemu utai ke nyadi. Nya alai raban komuniti ti
ngemeranka budaya macha enda diau baruh pegai orang ari menua bukai.
Raban bansa ti ngemeranka budaya macha mega dipeda maju
sereta mansang agi. Pemansang sesebengkah bansa mega diperati nengah peneleba
pengawa macha ke dipejalaika komuniti nya laban pemai ulah tiap-tiap raban
komuniti nya dipandang nengah utai ke dibacha sida.
Nitihka Kenneth Levin (1982), mayuh ari individu nguji
deka nemu macha sereta ngemeranka budaya macha dikena ngangkatka rega diri ba
mua diri sebilik tauka pangan. Orang ke mayuh macha seruran dianggap ngembuan
status sosial ti tinggi. Tiap-tiap leka jaku sereta perkara ti dikerandauka
sida nyata amat ngayanka sida ngemeranka pengawa macha. Orang ke mayuh
bejalaika seminar enggau kus nya tau dikategorika dalam raban tu. Suah sida dipinta
mantaika sesebengkah topik ngagai seraban orang ke bisi datai. Pengelicha ke
baka tu ukai semina dipilih belalauka pemandai ke bisi ba sida tang mega
bepelasarka peneleba sida lalu peneleba nya mayuh diulih sida ari macha mayuh
macham kereban bacha.
Guthrie dan Seifert(1983) madahka nengah pengawa macha kitai
ulih berimbaka siti rampa ke ulih ngelanchamka minda sereta diri empu. Sida ke
mayuh macha tentu iya ngembuan timpai
runding ti bebida ngagai sesebengkah pekara enti dibandingka ngagai sida ke
enda macha. Raban bansa ke mayuh macha ulih belajar sesebengkah baru ke baru ti ulih nyadi malin
belajar enggau pengidup besehari-sehari.
Munyi ku jaku siku lemambang, ‘sigi amat rugi ba
siku-siku orang ninting hari enti nadai tiga pekara nyadi aba dalam iya. Penemu nadai betambah, pengawa nadai neriki sereta pemai ulah nadai berubah.’ Ketiga-tiga pekara
tu bisi kaul enggau budaya macha. Kebuah pia, enti kitai regas macha, tentu
penemu kitai nambah lalu pia mega pengawa enggau pemai ulah kitai deka sama nambah sereta berubah manah.
Penatai media elektronik baka komputer kemaya hari tu
ngemai alternatif baru dikena kitai ngemeranka budaya macha. Sida ngembuan chara
ti mudah agi kena ngulihka penemu enggau penerang baka nengah Internet. Nitihka
pansik ti dipejalaika Professor Datuk Dr.Syed Arabi Idid madahka penyampau pemacha
media alternatif ba Internet tauka televisyen satelit nya bisi entara 10 ngagai
15 persin enti dibanding enggau media konvensional (Berita Harian 14.8.2001)
Pemesai reti pengawa macha udah endang enda ulih
dipetalatka agi. Kimpin enggau pengawa ngemeranka budaya macha ba raban bansa patut dipajakka belama ketegal
pemanah ti diasil ari pengawa tu. Penguntung ari pengawa macha enda ulih diukur
ngena duit ringgit.
Nya alai, terang bendar budaya macha ulih ngangkat sereta
neriki status sosial siku-siku orang nya sereta ngangakat martabat sesebengkah raban bansa. Pengawa sereta budaya macha ngerenchah
genap lapis raban bansa enggau komuniti. Raban bansa ke enda macha disempamaka
baka engkatak ditangkup tachu.
PENYANDING PENEMU
1. Guthrie, John T., & Seifert, Mary. Profiles of reading activity in community,
Journal of Reading, March 1983.
2. Harris, Albert J., and Sipay, Edward
R. How to increase reading ability: a
guide
to
developmental and remedial methods, Longman, New York &
London 1990.
3. Kamus Dewan, Cetakan 1999.
4. Levin, Kenneth. Functional literacy: Fond illusion and false economic, Harvard
Educational Review, 1982.
5. Mohd. Yusri Azhar, Teknologi Maklumat dan Budaya Membaca, Dewan
Masyarakat, November 1998.
6. Mus Chairil Samani, Penulisan Rencana Berkesan, Dewan Bahasa
dan Pustaka,
1997.
7. Nuttal, Christine. TEACHING READING in a foreign language,
Heinemann,1998.
8. Pusat Bahasa dan
Terjemahan, BAHASA MELAYU KEMAHIRAN,
Universiti Sains Malaysia,
1999.
1999.
SURAT BERITA
1. Berita Harian 14. Ogos 2001
2. The Star 29. Julai 2001
Esei tu kala menang perais lumur satu dalam Pekit Esei Jaku Melayu tikas menua dalam taun 2001 ti diatur Librari Menua Sarawak
BalasPadam