Temegahka Identiti Bansa Malaysia

Panyun Jaku

Kemaya hari tu mayuh bendar retorik jaku jai pasal bansa enggau pengarap bisi ngerekai ngagai menua kitai di Malaysia. Pengawa baka tu tau disemaka baka kayu enti enda dijarau tau mai penusah ngagai semua peranak menua Malaysia jemah ila. Sigi amat mih bisi sempama jaku tuai ke madah indah batu tungku pan tau besengki nama agi kitai ke ukai sama bansa. Nya kebuah sida ke ngasaika diri bisi ngembuan tanggung pengawa ngagai penyerakup bansa Malaysia udah nguji betungkapka pekara tu dikena sida meratika pengamat peranak menua Malaysia ke madahka identiti diri sida nya sekalika sida madahka diri nya ari sukut menua tauka bansa.

Pengawa Pansik

Berindik ari pekara nya, surat berita The Star udah ngaga pansik  ke dikumbai sida The Star’s moderation survey dikena sida meratika pengamat rayat Malaysia rayat ke ngumbai diri ngembuan jelan penemu senentang bansa enggau pengarap. Tu mih pansik ti keterubah iya dipejalaika surat berita tu. 

Nitihka pansik nya tujuh ari 10 iku orang ke ngambi bagi dalam pansik nya madahka diri nya sida bebansa Malaysia. Taja pia, lebih ari setengah ari 5,070 orang ke ngambi bagi dalam pansik nya madahka sida suah agi dikelala orang bukai ari sukut bansa sida empu. Nambahka nya, surat berita tu madahka 69% ari sida madahka diri nya orang Malaysia lalu ditangkan enggau 21% nya ke madahka diri deka dikelala nitihka raban bansa diri.

Nitihka ripot The Star, menteri ba Opis Menteri Besai, Tan Sri Joseph Kurup madahka diri teperansang bendar ati enggau pemutus pansik nya. Iya bisi bendar pengarap meda sekeda rayat Malaysia ke balat agi deka dikumbai bansa Malaysia.  Nitihka iya, berita tu patut bendar ditaburka ngagai semua orang laban asil iya ila tentu ulih ngerapitka kaul sereta nyumanka laya entara bansa enggau etnik. 

Madahka diri nya orang bansa Malaysia ukai reti nya kitai udah melakangka(betray) bansa enggau pengarap diri. Ngaku diri bansa Malaysia nya identiti kolektif kitai semua, pia ku Joseph Kurup (The Star 3.5.15) ke mega nyadi menteri ba pengawa penyerakup bansa. 

Nitihka pansik nya, 5% orang madahka diri sida nya deka agi dikelala ari sukut pengarap sida lalu iya ke lebih nya nadai meri respons.  Bisi mega 57 % orang ke ngasaika diri dikelala orang bukai ari sukut bansa diri. Tiga raban orang ke balat nguing runding individu nitihka konsep pasal pengelala diri nya nyengkaum raban orang ke udah bisi ruang bilik (80%), tawing (78%)  enggau orang ke sama enggau gawa (43%). 

Utai ke balat ngirauka ati sereta enda tentu manah dipeda nya ari sukut realiti iya nya bisi 57% ari sida ke dipansik nya ngumbai diri dikelala orang bukai ari sukut bansa diri. Pekara tu enti ditejuka tau bendar ngujungka kaul tradisyen ti udah lama harmoni ke dikemeranka entara bansa di Malaysia majak puntan baka menasan jalai jelu, rumbau baka buah merunjau ulu.  

Kitai ulih nyangka siti ari akar kebuah sentimen ti baka tu balat nesatka runding raban nembiak redak kemaya hari tu nyumbuk ari raban tuai politik ke balat bendar besemekih enggau pangan diri bejaku bepalasarka platform bansa enggau pengarap. Sida nyau baka buyah ngereja api, baka manuk ngereja taji nguji ngadingka diri deka dipeda nya orang ke berani ngari sereta ngetanka bansa enggau pengarap diri. 

Idea ke madahka bansa diri nya tinggi agi tikas ari bansa bukai tau bendar ngenataika pengerawang ati ti tau nyida ati orang bukai (Joseph Kurup, The Star, 3.5.15). Nya mih kebuah pansik tu dipejalaika dikena ngenataika pemesai reti penyerakup bansa lalu iya pekara ti patut bendar ditan.

Taja pan majoriti 92% ngasaika topik senetang atur pengawa  ti jelan nya besai bendar reti tang semina 49% setuju tauka dikira setuju nya majoriti orang Malaysia bisi ngemeranka ukur pemanah tu.  Tiga suku ari responden ngasaika orang Malaysia udah majak kurang agi berunding jelan ari selama.

Pansik tu mega madahka nyau deka setengah tauka55% madahka kaul entara etnik di Malaysia enda manah lalu 73% madahka ari perati sida pekara tu majak jai sejai.

Ari sukut pemanah, 61% madahka sida bisi lebih ari lima iku pangan ke datai ari tirai pengidup ke lain ari sida baka ari sukut budaya, bansa enggau pengarap lalu ari nya  90% madahka bisi ati deka betemu enggau orang ti baka tu.

Pansik nya mega madahka bisi 72% orang suah tauka selalu ngasaika diri enda lantang ati lebuh bejuraika pekara ti bisi kaul enggau bansa enggau pengawa menyati orang.

Pekara ti bekaul enggau ekonomi enggau daya idup nya pekara ti balat kritikal (65%), ditangkan enggau isu bansa enggau pengarap (49%) sereta jenayah (47%).

Dikena munaska ektremisma tauka ngelakuka pekara ti jelan pengawa, 86%  madahka sida sedia nerima runding ti bebida sereta bebasaka penemu orang bukai. 72% ngembuan runding ti tebuka sereta rasional lebuh bejuraika pekara tu lalu 66% madahka diri sanggup nyadika teladan lebuh sida mantai jaku ba mua mayuh tauka ari sukut gaya enggau ulah sida lebuh ti begulai enggau orang bukai.

Penyimpul Kenang

Pansik ti udah dipejalaika surat berita tu taja pan semina mungkur 5,070 iku peranak menua Malaysia udah mantaika pemesai reti pengawa ngayanka identiti bansa Malaysia seriran enggau menua kitai ke diuan pupu raban bansa. Penyerakup enggau pengelala bansa patut bendar seruran ditan ngambika pengawa bejalika laya ketegal bansa enggau pengarap enda mudah ngerekai ngagai menua Malaysia. Pengawa ngetan sereta ngenegapka penyerakup entara bansa ukai utai ti diperambu tekala nya baka sempama hari betutus hari bebini, tutus gerai bini parai. Semua bansa patut segulai sejalai, sedada sama seati, setapa sama sejari ngetan sereta negapka penyerakup bansa Malaysia ke patut nyadi pemun pemansang menua. Anang sekali-kali bala tuai-tuai pupu raban bansa kitai nyau ikak besuaka jari kiba tang begenggamka jari kanan.