Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Sabtu, 16 Mei 2015

PELANDAI SELAMAT HARI PENGAJAR IBAN



Sebedau aku bejaku panjai
Dulu aku meri basa ngagai bala pemacha
Ke duduk macha betungaka komputer

Ngagai bala pengajar ke pandai dichunggai jari tiga
Laban bala sida ke sehari tu
Sida iya ngintu Hari Guru
Ngerami Hari Teacher

Nya alai aku mai kitai nikal ke pun
Nimpaika peturun adat bansa
Meri jaku peransang sereta jaku ansah
Ngambika sida pengajar terus mansang
Nempa sereta ngajar anak bansa.

Nya alai aku ngangau kita guru ke begelar pengajar dayak
Kita cikgu ke dipadu neresa menua siga
Mai kita ngangkatka adat cherita lama
Enggi sida aki kitai ke udah rimpi jeman kelia
Cherita sida ke udah parai nyadi telesai ambun lela
Ngambika bisi dikingatka sida ke biak dudi ila
Bisi ditesa enggau unga dabung jarang.

Aku ngumbai kita selantang cikgu baru
Kita ke udah dichiri Guru jeman diatu
Mai kita ngangkatka cherita kitai empu
Enggi sida aki kitai ke udah rimpi laya tekeju
Enggi sida ke udah parai ditinggang kesai rau nyagu
Ngambika bisi dikingatka sida nembiak rebak baru
Awakka penemu kitai empu enda tekebu laya midang.

Aku madah ngagai kita guru ke disagu megai amanah
Kita cikgu ke dichiri ngangkat maruah
Mai kitai sama-sama ngangkatka adat cherita rumah
Enggi sida aki kitai ke udah rimpi laya tasah
Enggi sida ke udah lama lela nemuai ke tanah
Ngambika bisi dikingatka sida nembiak ke benung lelejah
Dikena sida bungah bekelakar enggau orang.

Aku nesau kita pengajar ke begelar tampuk pemandai
Kita teacher dalam jaku Europa ke dibasa pemadu besai
Mai kita ngangkatka adat cherita tuai
Ayanka macham leman main kitai
Enggi sida aki ke udah rimpi laya sulai
Ngambika bisi ke penemu nembiak kitai
Nyadika pesaka sida selantang anak dara
Bisi dibantai ditengah ruai lebuh maya gawai

Aku nabur ngagai kita selantang pengajar sidi
Ti endang mutus ati berani kempang
Mai bebatak bala nembiak belajarka urat cherita nyadi
Enggi sida aki kitai ke udah rimpi laya bebadi
Enggi sida aya ke udah lama midang dipangka gumbang begilik segi
Ngambika bisi ke penemu nembiak rebak dudi
Awakka ngelala pengawa sida ke udah lama lesi
Muka kunchi tanah lang.

Nya alai
Anang malu
Anang rawan mih kitai pengajar Iban
Anang enda ingatka adat macham leman
Enggi sida aki kitai ke udah rimpi laya danjan
Kala diatu agi bisi awak
Kala diatu agi bisi jam.
Anang kitai enggai betanya ngagai sida mengua karung menyimpan
Nangika adat kitai lesap laya serepan
Nyelikap kapir langit besuran
Enggaika adat tuai dibai parai
Tama mandai menua sebayan

Anang kitai enda ingat
Sekayu awak Sarawak renjan
Aki ini kitai menya berimba utan
Berambunka nyawa pangka kabut maya pengujan
Ukai nya semina naka nya utai ke senika macham leman
Bisi maya sida kena empaska mayas remaung dan
Bisi kala mega sida ditegah indu baya meram
Tang ati enggi sida endang mutus tajam
Neranting urat liat ari lipat wi danan
Napi peluru meriam leka senapang.

Nya alai bala pengajar Iban ke mayuh
Patut bendar kitai nanka penemu ke menuku pungka dalam
Nya mih nyadika kuta tegap chukup pengetan
Pasukka penemu dalam bup mayuh macham
Nyadika kereban pelajar bejeman-jeman
Nya baru ati bala Iban entap enda kelabawan.

Nya mega kebuah aku mai kitai sama segempung
Sama bekunsi sereta bebagi penemu
Sedada sama seati
Sebetis sama sekaki
Sama-sama ngiring
Sama-sama ngembing
Ngadu pemansang jaku Iban
Kebuah pia awakka kitai
Baka tukul enda bulaka tempan,
baka lelabu enda bulaka peputan.

Baka nya mega pengajar mayuh:
Adat Iban asuh tegap nyerupa meruan
Jaku Iban asuh tembu sereta engkeman
Nya baru tanda enggi kitai nyengala
Bisi kelai meruan tegeran
Dunya global ngelala bansa Iban
Megai tambai tampuk pemansang
Nya baru semua bansa beansak-ansak
Ngiga awak ngambi kitai nyadika pangan
Keba  kitai  diangkat enggau martabat
Meruan pengarap tebalan Wawasan.
Selamat Hari Pengajar
Pengajar penempa penemu nyeratan ulah ti manah

1 ulasan:

  1. Manah meri pengaga ati ngagai nuan blogger. Terus ke pengawa tu. Aku nyukung 100%

    BalasPadam