Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Isnin, 25 Mei 2015

Pengajar penempa penemu, nyampun ulah



Tema Hari Pengajar 2015 iya nya “Guru : Membina Ilmu Menyempurnakan Akhlak”.  Enti ba penemu aku enti dikalih ngagai jaku Iban kiraka munyi tu: “Pengajar penempa penemu, nyampun ulah”. Aku minta ampun enti tema ba jaku Iban nya enda tentu sebaka enggau enggi kita ke macha artikel tu. Kebuah pia laban iya datai ari penemu aku empu sereta ari jaku ke diperatika aku dalam jaku Iban.

Sebedau aku majakka jurai aku sekali tu nyangka apin kelalu laun alai aku ngambi peluang tu meri Tabi Hari Pengajar ngagai semua pengajar ke udah ngiring ngembing, ngajar sereta narak aku ari tikas primari nyentuk ngagai tikas universiti. Aku mega meri tabi ngagai sida ke sama-sama kala gawa enggau aku suba lebuh aku kala nyadi pengajar sereta sida pengajar ke agi gawa enggau aku diatu. Aku mega ngena peluang tu meri tabi ngagai semua pengajar di Malaysia kelebih agi raban sida pengajar jaku Iban ke ngeramika Hari Pengajar 2015.

Tema hari pengajar taun tu engkeman amat enggau gaya utai ke nyadi kemaya hari tu laban ulah tauka perangai nembiak endang patut seriran enggau penemu ke dikulihka sida ba sekula. Tu mih ke nyadi penguji ngagai raban pengajar ba abad ke-21 tu.

Tema Hari Pengajar  2015 taun tu iya nya “Pengajar penempa penemu, nyampun ulah”  balat agi ngemeratka aspek nukuhka ulah enggau seregah diri nembiak ke bepelasarka penemu. Pekara tu dipeda nemban bendar enggau pengingin ati sereta guna iya ngagai mensia mayuh kemaya hari tu. Endang amat lebuh kitai berunding, nama guna bisi individu ke pandai tang nadai ngembuan ulah ti bekualiti tinggi. Uji kitai sama beratika reti tema Hari Pengajar sereta kerembai iya. Ba penemu aku, reti tema enggau kerembai iya ulih diperatika ari tiga aspek.

Keterubah, pengajar endang ngembuan tanggung pengawa ngenataika penemu enggau peneleba ngambika ulih ngangkatka potensi nembiak nengah pengawa ti nyerapka elemen-elemen pengarap enggau kurikulum, nyedia mayuh macham kereban ransang dikena ngiraika potensi nembiak enggau chukup lalu nyediaka perambu pemansang individu ke chukup sereta besepadu awakka ulih ngasilka modal mensia betikas dunya. Raban pengajar patut chakah agi lebuh nyedia sereta ngambuh nembiak ngambika sida nyadi mensia ke ngembuan perangai ti bepersonaliti tinggi. Enggau nya pengawa pengajar dipeda nyata lebuh sida sama-sama mantu ngemansangka bansa menua ti bekualiti.

Nangkan nya mega, pengawa pengajar ukai semina naka ngenataika isi silibus dalam bilik kelas aja tang pengajar patut kreatif sereta inovatif lebuh ngemansangka penemu  (knowledge development) ngagai nembiak sida setipak enggau pemansang teknologi sereta pekara ti diguna jemah ila. Pekara tu ulih dikenataika nengah chara pengajar ngajar ke balat agi ngemeratka nembiak seraya ke ngena kereban enggau semitan agi ari selama.

Kepenudi bendar, nya pengawa pengajar iya nya ngasilka modal mensia ti holistik bepenemu sereta ngembuan ulah ti manah ngambika nyadi nembiak ti nyampun ari semua sukut ukur pendiau. Baka ke udah digarapka dalam PPPM 2013 – 2025, sistem pelajar Malaysia ngembuan juluk ati ti deka nempa nembiak bepelesarka enam aspirasi nembiak, iya nya bepenemu, ngembuan pengelandik bepikir, pengelandik nyadi tuai, pengelandik bejaku dua bansa jaku, beretika sereta bepengarap lalu ngembuan pengelala bansa tauka identiti nasional. Nya mih kebuah, pengajar ke nyadi ijin nyapai juluk ati tu. 

Tema tu engkeman bendar enggau pemansang pengawa ngajar enggau belajar kemaya hari tu. Iya mega patut nyadika malin raban pengajar ukai semina dikena ngeramika hari pengajar ti diintu ninting taun. Ingat mega jaku ke madah enti pengajar manching sengapa, nembiak tentu kemi belanda.  Sempama jaku tuai bisi madah enti gali anang enda bepanggal, enti duduk anang enda bepelasar.

Tiada ulasan:

Catat Ulasan