Gawai Dayak enggau Pesta Kaamatan pengerapita kaul entara bansa

Sehari tu, pagila enggau minggu dudi, raban bansa Kadazandusun  ba Sabah enggau raban bansa Dayak di Sarawak deka ngintu pengerami pesta Kaamatan enggau Gawai Dayak. Aba kedua-dua raban bansa tu, pengerami nya amat besai bendar reti dalam pengidup sida. Pesta Kaamatan enggau Gawai Dayak nya pengawa ke ngerami taun baru kena ngelai pengujung musin ngetau padi sereta ngepunka musin pengawa bumai baru.

Kemaya hari tu, kedua-dua pengerami tu ukai semina diintu kedua-dua bengkah bansa tu aja. Gawai Dayak enggau Pesta Kaamatan mega diintu segulai enggau etnik bukai. Tu mih peluang ti manah dikena ngerapitka kaul dalam pupu raban bansa di Sabah enggau Sarawak. Ngintu pengerami Gawai Dayak enggau Pesta Kaamatan ngulih peneleba ti unik sereta ulih ngerinduka ati.

Endang udah nyadi pekara selama ba menua tu, iya nya sesebengkah pengerami ukai semina diintu etnik nya aja tang pengerami sesebengkah bansa nya mega diintu pupu raban bansa bukai. Pengawa ngabang sereta ngemeranka atur rumah tebuka ngagai orang bukai endang patut bendar ditanka laban iya siti pekara ti nyelai sereta ulih mantu ngerapitka kaul sosial. Pengawa ti bansa tu mega meri peluang ngagai rayat ngabang ngagai pangan ari etnik tu lalu ngujungka iya ulih nempa kaul ti rapit entara pangan diri. Pengerami tu mega ulih ngayanka budaya enggau adat asal ti bisi kaul enggau pengerami tu.

Baka mega raban bansa China, Melayu enggau India, raban bansa asal Sabah enggau Sarawak ke ngintu pengerami tu mega ngemeratka ukur tradisonal ti agi engkeman enggau pengidup sida. Pemulai sida ke ngusung kaban belayan di menua meri peluang ngagai sida ngerapitka kaul kaban belayan enggau suku-juru. Adat basa dibantai nengah mayuh bengkah aktiviti ke ulih meransang geragayak harmoni dalam pupu raban bansa.

Pengawa iklan tauka pemandang dagang ngenataika pesan positif senentang ukur budaya ti manah. Iya mega ulih mai semengat positif sereta penyerakup dalam pupu raban bansa. Ambika banding, taun tu, PETRONAS sekali agi ngaga iklan servis sosial ti bisi kaul enggau kedua-dua bansa tu. Dalam iklan PETRONAS ti pengabis baru kitai ke meda iklan nya ulih meretika ukur enggau budaya kedua-dua bansa tu; baka pengawa Steffy Samuels enggau anak iya ke berumur lima taun pulai ke menua di Sabah. Baka nya mega Hardy Barnabas ke udah bejalai sepengelama 10 taun pulai ke rumah panjai iya tauka kitai ulih betemu enggau Tuai Rumah Gima anak Jimbau kena kitai meretika adat asal sida.

Ba raban bansa ari luar, Gawai Dayak enggau Pesta Kaamatan meri peluang ngagai sida nyepi pemakai tradisional etnik tu. Endang udah tebalan mega sida ke ngintu pengerami nya ngayanka  geragayak ti sensitif ngagai raban pengarap Islam lebuh nyediaka pemakai ti halal. Tu mandangka sensitiviti enggau tikas pemereti ati sereta ulah bebasa ngagai pangan diri endang meruan diayanka raban bansa asal tu.

Sida mega nemu lebuh nyediaka pemakai ti halal, sida ke bepengarap Islam sama bela ulih ngerami pengawa tu. Enti ditimpai ari sukut ruang rama, pemakai endang terang bendar ngayanka kelai kaul pangan diri ti dikunsi pupu raban bansa. Tu mega nyerangkung pengerami Gawai Dayak enggau Pesta Kaamatan.

Iklan servis sosial ti seruran digaga PETRONAS mega mai penyedar ngagai semua rayat Malaysia senentang pemesai reti pengerami nya ti dikelapung enggau ukur positif. Pengawa ti ngemeratka penyerakup enggau pemereti ati senentang ukur pemanah pendiau dalam pupu raban bansa endang meruan dikemeratka nengah iklan PETRONAS. Tu mih inisiatif  ti beguna amat dikena ngangkatka penau senetang pemesai reti nemu adat asal pupu raban bansa kelimpah ari ngemeranka pekara ti toleran  sereta penyerakup entara etnik ba menua tu. Seraka pemereti ati senentang budaya entara raban bansa di Semenanjung enggau raban bansa ba Sabah enggau Sarawak endang patut bendar dirapitka kitai.

Pemereti ati ti baka nya ulih nyeliahka sebarang peragam ti negatif sereta stereotaip sentang etnik ba kedua-dua menua nya. Berindik ari nya, ulah etnosentrik patut bendar dibuai ke tisi sereta diganti enggau ukur toleransi enggau pemereti ati. Tu ulih ditempa nengah iklan enggau mayuh macham aktiviti ti engkeman. Nengah iklan ti baka tu, mensia mayuh ari pupu raban bansa ba menua tu deka balat agi sensitif sereta ngembuan pemereti ati ti tinggi senentang penyerakup ti bendar.

Raban serak kemaya hari tu patut majak ngemeran sereta ngetanka ukur pemanah pendiau ti udah dititi ditali ari renggat serak ke dulu munya. Sida kemaya hari tu endang enda patut ngelengka adat asal enggau budaya ti nyengkaum kedua-dua pengerami tu.

Kotobian Tadau Tagazoo Do Kaamatan

Selamat Hari Gawai Dayak, gayu guru gerai nyamai.  

Ari uchu tedung.