Agi idup diserayung adat, udah parai dikandung tanah nya
jaku tuai ke mandangka pemesai reti kitai bebasaka adat enda milih dini-dini
endur kitai diau tauka menua ke dilawaka kitai. Baka nya mega enti kitai mindah
tauka bejalai ke menua orang, sida ke tuai endang nangkan kitai enggau lalau
ngasuh kitai anang enda bebasaka adat enggau budaya orang ke ngempu menua baka
sempama jaku tuai ke bisi nyebut bejalai betungkatka adat, tinduk bepanggalka
pengingat. Tu mih panyun jaku dikena aku ngenangka senentang pekara ke bisi
nyadi di menua Sabah bedau lama ke udah. Pekara ti bekaul enggau ulah sekeda
temuai ari menua tasik ke nelanjaika diri ba tuchung Kinabalu.
Besenutuk enggau
ulah sida nya bisi mega nyadi tanah berenyang ba pilih menua Ranau ti
disukat dalam 5.9 skala ritcher. Kepenudi bendar tanah berenyang kala nyadi di
Sabah dalam taun 1979. Ulah bala temuai ke nelanjaika diri ba tuchung Kinabalu
ngenegapka agi pengarap orang Asia ke agi mayuh pechaya ke utai jai tau nyadi
enti enda bebasaka adat enggau budaya sesebengkah bansa. Bala raban bansa Kadazan pechaya tanah ke
berenyang nya nyadi ketegal semengat aki ini sida ke nyaga tuchung Kinabalu
muras ketegal sekeda temuai nadai bebasaka penti pemali, adat enggau budaya
sida.
Enti kelia, lebuh menua agi latung sereta mayuh agi ngemeran
adat lama, pekara ti tau ngudi menua endang deka nerima ukum sekalika nya ari
orang ke empu menua tauka kudi nyadi ketegal roh rampa menua ke muras.
Enti nitihka tiap-tiap endur ke dilawa orang mayuh endang
ngembuan atur ti enda tau enda dititihka bala temuai. Mayuh kebuah atur ba
sesebengkah endur nya ditempa. Sekeda ari kebuah nya dikena nyaga pengelikun
raban temuai sereta mega kena nyaga rampa menua. Sapa-sapa ke ngelanggar atur
tu tau bendar diletak ukum ke udah disediaka.
Ari sukut saintifik sigi bisi mar mimit deka ngamatka
pengarap orang empu menua kelebih agi baka ke nyadi di Sabah tu. Tang munyi ke
udah disebut tadi, atur mega bisi ditempa dikena raban temuai ke deka niki
ngagai tuchung Kinabalu.
Endang nyadika atur sida temuai ke niki ngagai tuchung
nya deka diuluka malin temuai. Nya mih kebuah endang nyadika tanggung pengawa
raban malin temuai meri penerang ti betul sereta jaku tangkan ngagai bala
temuai ke dibai sida neresa kampung kelebih agi pasal penti pemali lebuh neresa kampung tauka lebuh niki bukit. Kelimpah
ari nya temuai mega patut nitihka atur sereta belalauka penerang nyengkaum
penti pemali sesebengkah bansa ti ngempu menua ti dilawa sida.
Chara bebasaka penti pemali sereta nitihka atur ti udah
diterangka malin dagang temuai dipelabaka ulih nyeliah sekeda ari pekara ti
enda manah disadang nyadi. Malin temuai patut nemu sereta meri penerang ti
silik ngagai temuai sebedau berengkah ngelawa sesebengkah endur pasal palan ti
deka dilawa sida nyengkaum nama ke tau sereta pemali enggau pantang nitihka
pengarap sesebengkah bansa ti ngempu menua. Meri peneranag silik pasal palan ke
deka dilawa temuai nyengkaum penti pemali endang amat beguna sereta patut
dikemeratka enda ngira menua nyengkaum ba Sarawak.
Indah maya kitai masuk masjid kitai dipinta bebasaka adat
pengarap Islam laban bisi utai ulih lalu bisi enda ulih digaga maya kitai kia. Lalu
baka nya mega enti masuk kampung kitai enda tau enda bebasaka penti pemali
sesebangkah bansa ti nguan menua nya.
Berindik ari pekara ke nelanjaika diri dia perintah menua
Sabah udah mupuk deka nangkap sida tu sereta deka ditan reman kena mantu bala
polis nasat pekara ti udah nyadi tu. Sida ke ditan tu ila nitihka berita ke
ditampung madahka sida deka ditasat baruh Seksyen 294 (a) Kanun Keseksaan ketegal telanjai ba palan rama. Nitihka undang-undang
tu sida ulih ditinggang ukum jil tiga bulan enti sida bisi ditemu salah.
Insiden ke nyadi di Sabah tu tau bendar nyadika lalau
pendiau ngagai semua kitai ngambika sama-sama bebasaka adat enggau budaya menua
orang ke dilawa kitai. Taja pan menua majak mansang ari sukut sains enggau
teknologi, adat enggau budaya nya sebengkah ari malin pengidup ke patut
dipebasaka semua orang. Munyi ku orang tuai kelia, anang enda nunda pengangkat
Rajang Bengkang ti datai ari Randang Pintu Kemarau, ke nepat serungap lubang
batu; anang enda nunda pengangkat Raja Baya ke datai ari Nanga Lepung Landau ke
nepatka riap ai chiru.
Tiada ulasan:
Catat Ulasan