Panyun jaku
Penti nya atur ke ngasuh orang
ngereja sesebengkah utai. Penti pemali ti enda tau dilanggar ngapa. Enti dilanggar
tau ngasuh malu, bebadi, mati tauka gila.
Dalam tiap-tiap raban bansa endang ngembuan penti pemali ke dititi
ditali kenyau ari aki ini kelia. Raban bansa Dayak enggau sida ke ba menua
Sabah baka bansa Kadazan enggau Murut mega ngembuan penti pemali senentang
mayuh pekara.
Kenang aku sekali tu bisi kaul
enggau karang aku sebedau tu iya nya senentang bebasaka adat enggau budaya orang
empu menua. Nyadi sekali tu aku bekunsi enggau raban pemacha senentang penti
pemali maya neresa kampung puang. Penti pemali ke dirintai ditu asil ari
mending jaku sereta pansik ari orang tuai enggau orang ke seruran ke kampung. Enti
semak iya ke dirintai aku ditu enda sebaka enggau engkita, aku minta ampun
dulu.
Ngagai kitai ke suah nemuai
ngagai menua orang anang enda ingatka seruan jaku tuai ke madah enti bejalai
anang enda betungkatka adat. Baka nya mega lebuh kitai neresa kampung puang tentu
bisi penti pemali ke patut dititih ngambika pejalai kitai likun. Kitai mega
suah ninga orang ke enda nitihka penti pemali lebuh neresa kampung suah tesat
sereta sakit sepengudah pulai ari kampung. Ukai ngajihka rangkang ngachuk mata
tang uji kitai meratika sekeda ari penti pemali maya neresa kampung puang.
Anang chebur mulut
Enti maya kitai dalam kampung
anang sekali-kali chebur mulut kelebih agi lebuh kitai tepedaka utai nyelai
tauka utai ke jai pendiau bai nya utai tumbuh taukai utai idup baka jelu enggau
utai bukai. Bisi udah kala didinga cherita orang ketawaka sebuah pun kayu ti
jai pendiau. Ulah iya nya ngujungka iya tesat sereta nyau deka mai nyawa
ketegal ikak. Iya ngasaika diri tedingaka nyawa pangan iya mai nitih iya tang
ke bendar nya antu. Ku Iban nya mih antu kamba, antu ke selalu ngelalai orang. Agi
mit suba suah amat ninga cherita baka tu. Nya mih kebuah orang madah pending
antu ke diau di alam lubang di baruh kalang, minta dipelali enggau tanah liat.
Anang ngambi sebarang utai
Anang ngambi sebarang utai tang
semina gambar aja tau. Pia ku lalau orang ke tuai. Lebuh kitai ba dalam kampung
semua utai ke bisi nya endang empu ‘orang’ dalam nya. Nya alai kitai suah meda
sida ke kereja batang suah besampi ngagai petara tanah ba kem ramu sida. Antu ke
empu kampung sigi enggai meda sida, nya mih kebuah bala pengereja batang
begunaka pagar kena ngelindungka sida ari penusah.
Bejimat maya kemi
Kemi anang sengapa panching pia
ku orang tuai. Sida suah bendar ngelalau kitai ke biak enti deka kemi anang
enda minta pemendar taja pan nadai orang dalam kampung maya nya. Aku agi mit
suba diajar ngeludah udah kemi ngambika antu enda ngachau kitai. Nyentukka sehari
pekara nya agi dikemeran taja pan tusah mega deka arapka utai baka nya tang nya
mih chara kena madah ngagai antu ke nyangka bisi mansa kitai maya nya.
Enda milih nama bansa jaku asal
kitai udah minta pemendar laban kenu ku orang ke tuai antu nya nemu macha
runding kitai. Kelimpah ari nya mega ditagang kemi ba atas sarang indu utai,
pun kayu besai, bandir kayu tauka batu besai laban tu endur bala antu diau.
Tinduk ba endur ti likun
Ba sekeda endur, orang ke empu
menua pechaya palan ke berantu nya baka ba madang buluh, pisang enggau kayu
tapang. Mayuh amat cherita antu senentang endur tu. Tambah mega endur baka tu
endang sarang ular enda milih nya ke bisa tauka enda. Nya alai seliahka endur
ti baka tu. Giga endur ke likun agi.
Bau rengut
Enti nuan tesiumka bau rengut
tauka bau angi jaku lalau orang tuai madah anang memunyi. Anang sebarang utai
lara. Sama mega enggau utai nyelai ke didinga tauka dipeda.
Anang serebana
Orang dalam kampung suah
sereban madahka diri bepeluh tauka lelak. Tang pesan orang tuai enda ngasuh
kitai serebana ngapa laban ku sida bisi orang meratika sereta ulih nimpai
kitai. Ulah ke negatif baka tu tau ngasuh kitai enda lantang maya bejalai dalam
kampung.
Anang menyati jelu
Tiap utai idup nya endang empu
kampung ke ditujah kitai nya. Nadai salah ngasu beburu dalam kampung tang
menyati jelu tauka nundi raban jelu nya ukai ualah ke manah. Bisi kala cherita
ke madah orang ke ngasu jelu tulihka siku kera. Sebedau kera nya parai bala
sida pengasu tu nepu sebatang ruku ba mulut kera nya sambil diketawaka sida. Malam
nya langkau alai sida ngetu dipuput sereta ditabanka ribut.
Simpul penemu
Pechaya tauka enda rintai penti
pemali nya bepanggai ba kitai empu. Mayuh orang udah ngelanggar penti pemali
tang nadai utai jai nyadi ba sida. Nya ke ngasuh sida enda tentu pechayaka
penti pemali.
Tang penti pemali tu tau
disemaka baka sebengkah atur ke mudah sereta tang rega ba kitai ke nyadi
temuai. Mayuh orang Sabah enggau Sarawak kemaya hari tu udah ngemeran pengarap
baru baka Kristian enggau Islam tang mayuh ari sida agi ngasaika penti pemali
nya patut dititih maya neresa kampung puang. Pelaba aku nadai salah kitai
bebasaka rampa menua kitai laban nya enda ngiga adai.
Tiada ulasan:
Catat Ulasan